Өвөл ид дундаа орсон ч, Хятадаас ИРЖ ЯВАА угаарын хий мэдрэгчээс СУРАГ АЛГА

Засгийн газрын аравдугаар сарын эхээрх хуралдаанаараа гэр хорооллын 220 мянган өрхөд угаар мэдрэгчийг үнэ төлбөргүй суурилуулах шийдвэрийг гаргасан билээ. Улмаар Ерөнхий сайд энэхүү ажлыг арваннэгдүгээр сарын 1-ээс өмнө судалж, хэрэгжүүлэхийг Байгаль орчин, аялал жуулчлалын сайд Н.Цэрэнбат болон Хотын дарга С.Амарсайхан нарт даалгасан байдаг.

Тухайн үед Хотын дарга С.Амарсайхан “Угаар мэдрэгч төхөөрөмжийг айл өрхүүдэд тарааж өгөх үүргийг хүлээлээ. Ирэх сарын 1-ээс өмнө гэр хорооллын өрхүүдэд угаарын хийг мэдрэгч бага оврын төхөөрөмжийг суурилуулж өгөхөөр боллоо. Өнөөдөр гэр хорооллын 200 мянга гаруй өрх бий” гэж ярьж зогссон билээ.  

Гэвч ингэж яригдаад ГУРАВ, хэрэгжсэн байх ёстой хугацаанаасаа хэтрээд бүтэн ХОЁР сар болох гэж байна. Угаарын хий мэдрэгч нь одоо хүртэл таг чиг. Хамгийн сүүлд эрх баригчид Хятадаас ирж байгаа тухай мэдээлэл дуулгасан.

Найм хоногийн өмнө буюу арванхоёрдугаар сарын 10-нд Нийслэлийн Засаг даргын орлогч Ж.Батбаясгалан “Угаарын хий мэдрэгчийг БНХАУ-аас захиалан авахаар гэрээ хийсэн, Ирж яваа. Энэ ажлыг зохион байгуулахад анх зургаан тэрбум төгрөг шаардлагатай гэж тооцож байсан. Харин үйлдвэрлэгчтэй шууд харилцсанаар энэ зардал тодорхой хэмжээнд хэмнэгдэнэ” гэх зүйл ярьсан.

Ийнхүү дарга нар ярьсаар, бас дахин ярьсаар байтал өвөл ид дундаа орлоо. Нөгөө ЗУРГААН ТЭРБУМЫН өртөгтэй угаарын хий мэдрэгч хаана яваа нь тодорхой бус. Сураг алга.

У.УЯН

Өөрийн сэтгэгдлээ илэрхийл

Share Tweet