ХЭРЭГ: Барилгын лифтний хонгилд дахин нэг ажилтан унаж амиа алджээ

Улсын хэмжээнд орон сууцны хороолол ихээр баригдаж түүнийг дагасан олон гэмт хэрэг гарсаар байгаа юм. Тухайлбал, орон сууц зарна гэх зарын дагуу олон мянган иргэдээс урьдчилгаа мөнгө авч залилах, богино хугацаанд чанарын шаардлага хангаагүй орон сууц нийлүүлж оршин суугчдыг хохироох болсон. Мөн барилгын ажлыг хөдөлмөр хамгааллын журмын дагуу хийж гүйцэтгээгүйн улмаас ажилчид амь насаараа хохирсоор байгаа билээ.

-БАРИЛГЫН ТУСЛАХААР АЖИЛЛАЖ БАЙСАН 33 НАСТАЙ ЭРЭГТЭЙ Б НЬ НАС БАРСАН-

Хөдөлмөр аюулгүй байдлын журам зөрчсөнөөс үүдэн дахин нэг барилгын ажилтан лифтний хонгилд унаж амь насаа алдсан харамсалтай хэрэг гарчээ.

Хэргийг тодруулбал, Баянзүрх дүүргийн дөрөвдүгээр хороонд байрлах Американ дэнжийн хажууд шинээр баригдаж байгаа барилгын цахилгаан шатны /лифт/ хонгилд нэг хүн унаж нас барсан хэрэг гарсан байна.

Уг хэрэг арван хоёрдугаар сарын 19-ний өдөр гарсан гэх бөгөөд тухайн барилгын ажилчид тэнд хүн унасныг бас л мэдээгүй байсан гэх. Хэргийн газрын үзлэг шинжилгээгээр, тухайн барилгын туслах ажилтан болох Хэнтий аймгийн Эрдэнэцагаан сумын харьяат эрэгтэй 33 настай Н.Б нь тус барилгын лифтний хонгилд унаж нас барсан байжээ.

Эх сурвалжийн мэдээлж байгаагаар, барилгынхан хөдөлмөр хамгааллын журам зөрчсөн бөгөөд тухайн туслах ажилтнаа алга болсныг мэдээгүй байж байгаад хонгилд нас барсан байсныг олсон юм байна.

Амь хохирогч нь тухайн барилгын хоёр давхарт дотор засал хийж байгаад унаж нас барсан аж. Баянзүрх дүүргийн цагдаагийн хоёрдугаар хэлтэст хэргийг мөрдөн шалгаж байгаа ба Мэргэжлийн байгууллагын дүгнэлт гаргуулахаар ханджээ. Одоогоор тус барилгын үйл ажиллагааг түр зогсоож шалгаж байгаа юм байна.

Г.ШАГДАР

Өөрийн сэтгэгдлээ илэрхийл

Share Tweet