Өнгөрсөн сарын байдлаарх малын зах зээлийн дундаж үнийн мэдээллээс харахад мал аж ахуйн салбарын үнэ ханш өсөлттэй хэвээр байна. Энэ нь малчдын орлого, амьжиргаанд эерэг нөлөө үзүүлж байгаа боловч зах зээлийн хэлбэлзэл, хэрэглэгчдийн зардалд үзүүлэх нөлөөг давхар анхаарах шаардлагатайг харуулж буй.
Нас гүйцсэн эр үхрийн үнэ Сүхбаатар аймагт 2.6–2.7 сая төгрөгт хүрч хамгийн өндөр, харин Баян-Өлгий аймагт 1.35 сая төгрөгөөр хамгийн бага байна. Хязаалан гунан үхрийн үнэ 1.9 сая төгрөг болж, өмнөх оны мөн үеэс 300–340 мянган төгрөгөөр өссөн нь үхрийн аж ахуй эрхлэгчдийн орлого нэмэгдэх нөхцөл бүрдүүлжээ. Мөн ат 1.8 сая, соёолон үрээ 1.3 сая, эр хонь 310 мянга, эр ямаа 220 мянган төгрөг болж, бүгд өмнөх оноос 50–300 мянган төгрөгөөр өссөн үзүүлэлттэй байна.
Хэдийгээр үнийн өсөлт нь малчдад ашигтай ч хот, суурин газрын иргэдийн махны хэрэглээний зардлыг нэмэгдүүлэх хандлагатай. Ялангуяа Цагаан сарын өмнөхөн махны эрэлт нэмэгддэг тул 1 дүгээр сард ажиглагдсан өсөлтөд улирлын шинжтэй хүчин зүйл нөлөөлсөн байх боломжтой. Үүнээс гадна тээвэр, шатахуун, хадгалалтын зардал зэрэг нь жижиглэнгийн үнэд давхар нөлөөлж байна.
Иймээс малын үнийн өсөлт нь хөдөө орон нутгийн малчдад орлогын боломж нэмэгдүүлж байгаа ч төв суурин газрын хэрэглэгчдийн хувьд хүнсний зардлын дарамтыг өсгөх талтай байна.
Э.БАЯНМӨНХ
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Хятадууд ихтэй газар махны үнэ гаарч байна