Засгаас ҮҮРЭГДСЭН ч Х.Бадамсүрэн 571 саяар цалинжиж, сайд дарга нар ТАНСАГЛАЛАА орхиж чадахгүй

Кейсүүд: 

-“Эрдэнэт үйлдвэр”-ийн захирал Х.Бадамсүрэн өнгөрөгч онд 571 сая төгрөгийн цалин авч, охиныхоо 102  сая төгрөгиийн сургалтын төлбөрийг төлүүлсэн баримт сөхөгдсөн. Тус үйлдвэрийн орлогч захирлууд сардаа 20 сая төгрөг авах бөгөөд захиргаа удирдлагын зардал нь нийт цалингийн 8.8 хувийг эзэлж байгаа талаар хэвлэлүүд хөндөв. 

-Монголбанк эдийн засгийн гүн хямралтай үеэр 300 сая төгрөгийн фитнес заал тохижуулах хэрэглэлийн тендер зарласан. Олон нийт, хэвлэлийн хүрээнийхэн эсэргүүцэхэд Төв банкны Ерөнхийлөгч Б.Лхагвасүрэн “Шантаажны сэдэв үүссэн учир тендерээ цуцаллаа” гэж ууртай мэдэгдэв. 

-Өмнөговь аймгийн ИТХ-ын албаны машиныг нэрээр 257  сая төгрөгөөр Лексус 570 авах тендер зарлагадав. 

-“Монголросцветмет” ТӨҮГ  289 сая, 93 сая төгрөгөөр тус тус суудлын автомашин худалдан авах тендер зарласнаа өөрчлөлт оруулах хүсэлт илгээжээ.

Шийдвэр:

Засгийн газраас 2021.02.17-ны өдөр ТӨҮГ, ТӨХК, орон нутгийн өмчит газруудыг хэмнэлтийн горимд шилжүүлж, шинээр автомашин, тавилга худалдан авахгүй байх, цалин хөлс шагнал урамшуулал нэмэхгүй байх, цаасан мэндчилгээ, бэлэг сэлтийн зардал гаргахгүй байх, орон тоо нэмэхгүй байх, сурталчилгааны чиглэлд ихээр мөнгө төсөвлөхгүй байх чиглэлүүдийг өгсөн.

Гэвч бодит байдал дээр Засгийн газраас үүрэгдэнгүүт дарга нар тансаглалаа зогсоох эсэх нь асар бүрхэг. Сайд нарын тухайд ч тэр, шинэ албаа авсныхаа дараа нойлоо засан тохижуулж, сандал ширээгээ хүртэл солиулдаг тогтсон жишиг бий. Нэг сайд заавал модон сандал дээр суух лүндэн буулгаснаар эхний загвар гологдож, хоёр ч удаа түүнд зориулан сандал хийлгэсэн талаарх яриа хөвөрдөг. 

ХЗДХ-ийн сайдаар Ц.Нямдоржийг очиход ШШГЕГ-ынхан тал засахдаа лексус 570 авч, асар үнэтэйгээр тоноглож өгсөн асуудал нэлээд удаан яригдсан. Очсон яамныхаа машиныг голох, хээ нь элэгдсэн дугуйнд нь хүртэл сэтгэл хангалуун бус байдал үзүүлдэг нь манай дарга, сайд нарын бүр тогтсон жишиг. Харин энэ удаагийн Засгийн газрын сайд нар Ерөнхий сайд Л.Оюун-Эрдэнэ чиглэл өгөнгүүт гэнэт тансаглах хүслээ гэнэт татаж чадах уу гэдэг асуудал үүсч байна. 

Агентлаг, ТӨХК, ТӨҮГ, аймгуудын ЗДТГ, орон нутгийн өмчит газрын дарга нарын тухайд ч тэр тансаглалаа шууд зогсоочихно гэхэд асар хэцүү. Засгийн газраас автомашин авч болохгүй гэсэн шийдвэр гаргачихаад байхад л зэрэгцээд Хэнтийн аймаг, “Монголросцветмет” тэргүүтнүүд суудлын үнэтэй автомашины тендер зарлачихсан байх жишээтэй. 

СЭТГҮҮЛЧИЙН ТЭМДЭГЛЭЛ: Засгийн газраас  хэмнэлтийн горимд шилжих шийдвэр гарлаа ч “Эрдэнэт” үйлдвэрийн захирал Х.Бадамсүрэн 571 сая төгрөгийн цалингаа авч, жилдээ хэдэн арван саяар нь мөнгөн аяга авахаа зогсоочихно гэвэл түүн шиг худлаа зүйл гэж үгүй. Х.Бадамсүрэн гэнэт ухаажаад, үнэтэй тавилгуудаа зарчихгүй, охиныхоо төлбөрийг яаж ийгээд үйлдвэрээсээ гаргуулах гэж л зүтгэх нь тодорхой. Ерөөс агентлаг, ТӨХК, ТӨҮГ-иудын захирлууд нэг томилогдоод очлоо л бол тэр газраа хаан сууж, хүссэн эрх ямбаа эдэлцгээдэг тогтсон жишгийг Засгийн газрын ганц чиглэлээр халчих боломжгүй юм. Цаашлаад тийм үүрэг өгөөд сууж буй Засгийн газрын гишүүд нь ч эрх ямба эдлэх амбицаа дарж тоглоход асар хэцүү. Улсын төсвийн орлого 20 гаруй хувиар тасрах нь тодорхой  болж, зах зээл рүү механик аргаар Төв банк мөнгө нийлүүлэх гэж буй ийм үеийн зовлонг том дарга нар амьдрал дээрээ мэдрэх ч үгүй. Хамгийн хүндийг нь харин хэдэн ажилтнаа цалингийн тасалдалгүй шиг чирэхийг хичээж буй ААН-үүд л үүрч байгаа юм. Тэгэхээр Засгийн газраас бүр нарийвчилж, дарга нарын тансаглах боломжийг сайтар хааж өгөхгүй л бол эдийн засгийн хямрал үнэндээ тэдэнд нэг их хамааралгүй өнгөрөх юм. 

Энэ мэдээнд өгөх таны үнэлгээ

Хуваалцаарай Жиргээрэй