Нийгмийн

С.Энхболд: Сайд очихоороо л ажил шалгадаг юм биш...

Эрүүл мэндийн сайд С.Энхболд өөрийн цахим хуудсандаа мэдэгдэл оруулсан байна. “Наадмын өдрүүдээр эмнэлгийн бүх албан хаагчид өндөржүүлсэн бэлэн байдалд цаг, наргүй ажиллаж байгаа. Сайд очихоороо л ажил шалгадаг юм биш ээ. Яамны зүгээс амарч чадахгүй байгаа хэдтэйгээ уулзаж урам өгч, дэмжин ажиллах нь чухал. Яамны албан хаагчид маань бүх л ковидын эмнэлгүүдээр энэ хэдэн өдрүүдэд эмчилгээ, тусламж үйлчилгээний чиглэлд дэмжиж, тусалж ажиллана даа” гэжээ.

Тэрбээр Халдвартай бүсүүдэд очиж ажлын явцтай танилцжээ.

Өнөөдөр Эрүүл мэндийн сайд С.Энхболд, Эмнэлгийн тусламжийн бодлого, хэрэгжилтийг зохицуулах газрын дарга Б.Буянтогтох нар Цэргийн төв эмнэлэг, Яармаг дахь яаралтай тусламжийн төв болон Баянгол дүүргийн Эрүүл мэндийн төвийн Хүүхдийн эмнэлгийн улаан бүсэд орж ажиллав.

Цэргийн төв эмнэлэг 570 ортойгоор үйл ажиллагаа явуулж байна. Өнөөдрийн байдлаар хэвтэн эмчлүүлж байгаа 342 хүн байна. Коронавируст халдвараар батлагдсан 322 хүн тус эмнэлэгт хэвтэн эмчлүүлж байгаагийн эрчимт эмчилгээний тасагт 15 хүн эмчлүүлж байна. Эрүүл мэндийн сайд С.Энхболд тус эмнэлгийн улаан бүсэд орж ажиллав. Тэнд нөхцөл байдал хүнд байгааг Цэргийн төв эмнэлгийн дарга ерөнхий эмч хурандаа С.Батболд онцолж байлаа. Цэргийн төв эмнэлэг нь Ковид-19 цар тахал Монгол улсад бүртгэгдсэнээс хойш тэргүүн эгнээнд зэрэгцэн явж байгаа эмнэлгүүдийн нэг билээ. Тус эмнэлгийн эмч сувилагч давхардсан тоогоор нийт 1540 хүний бүрэлдэхүүнтэйгээр Ковид-19 цар тахалтай тэмцэн ажиллаж байна. 

Үүний дараа Яармаг дахь Яаралтай тусламжийн төвийн улаан бүсэд орж ажиллав. Тус төвийн хувьд харьяалал харгалзахгүй батлагдсан тохиолдлыг хүндрэхээс өмнө хүлээн авч, эмчилж эргээд харьяа дүүргийн эмнэлэгт нь шилжүүлэх хөдөлгөөнийг зохион байгуулдаг. Өнөөдрийн байдлаар Яаралтай тусламжийн төв 68 ортойгоор үйл ажиллагаа явуулж байна. Төлөвлөгөө ёсоор Хагас сайн өдөр нэмэлтээр орнууд дэлгэж нийт 145 орыг дэлгэн ажиллах юм. Нийт хэвтэн эмчлүүлж байгаа 30 хүн байгаагийн эрчимт эмчилгээний тасагт 7 хүн эмчлүүлж байна. Үүнд нэн хүнд 84 настай нэг хүн байгааг тус төвийн эмч хэлж байлаа. Улаан бүсийг ахлан ажиллаж байгаа эмч Ж.Уламсайхан Улсын Хоёрдугаар төв эмнэлгийн яаралтай тусламжийн төвийн эрхлэгч нэмэлтээр ирж дайчлагдан ажиллаж байна. Мөн тус төвд уушгины мэргэшсэн Монос сургуулийн багш Л.Алтанхуяг өөрийн хүсэлтээр ажиллаж байна. Эрүүл мэндийн сайд С.Энхболд тус төвийн улаан бүсэд ажиллаж эмч эмнэлгийн ажилчдын санал хүсэлтийг сонслоо. 

Мөн Баянгол дүүргийн эрүүл мэндийн төвийн Хүүхдийн эмнэлгийн үйл ажиллагаатай танилцжээ. Тус эмнэлэг Ковидын 115 ор дэлгэгдсэн байна. Өнөөдрийн байдлаар 17 хүүхэд, маш хүнд 4 хүн нийт 133 хүн хэвтэн эмчлүүлж байна. Улаан бүсийг ахлан ажиллаж байгаа Э.Бямбарагчаа эмч бүрэлдэхүүн нийт 22 эмч сувилагч асрагч  ажиллаж байна. Наадмын өдрүүдээр эмнэлгийн бүх албан хаагчид өндөржүүлсэн бэлэн байдалд цаг наргүй ажиллаж байна. Улаан бүсэд нөхцөл байдал бол хүнд байгаа ч цаг алдалгүй эмнэлгийн тусламж үйлчилгээг үзүүлж ард иргэдийнхээ эрүүл энхийн манаанд ажиллаж байгаа нийт эмч эмнэлгийн ажилчдадаа Эрүүл мэндийн сайд С.Энхболд талархал илэрхийлж амжилт хүсэв.

Энэ мэдээнд өгөх таны үнэлгээ
Like
Love
Haha
Wow
Sad
Angry

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

guest
0 Сэтгэгдэл
Inline Feedbacks
View all comments

Холбоотой мэдээ

Back to top button