Хилс хэрэгт гүтгэсэн гэх Э.Бат-Үүл, Б.Чулуудай нарын долоон хүн ЯЛЛУУЛАХ болсон холбоо, сүлжээ

УИХ-ын гишүүн, Нийслэлийн Засаг дарга бөгөөд Улаанбаатар захирагч зэрэг өндөр албан тушаал хашиж байсан Э.Бат-Үүл нарын 11 хүнд холбогдох хэрэг хэдэн жил үргэлжилж, шүүх хурал 20 гаруй удаа хойшилсны эцэст шийдвэрээ гаргасан. Тодруулбал, тэдний долоог нь гэм буруутай гэж үзэж ял оноов. Харин үлдсэн дөрвөн хүнийг энэ хэрэгт холбогдолгүй хэмээн цагаатгасан юм. Гэвч олон нийт эдгээр хүмүүсийг гэм буруугүй байсан гэж сошиалаар давалгаалж, улсын баатраа хорилоо хэмээцгээж буй юм. Тэр ч бүү хэл хэргийн оролцогч, торгуулийн ял хүлээсэн Б.Чулуудай "Би болоод миний эцэг ямар ч гэм буруугүй” хэмээн итгэл төгс хэлээд зогсож байсан юм. Тиймээс энэ удаад Э.Бат-Үүл, түүний хүү Б.Чулуудай нарын долоон хүн яг ямар хэрэг үйлдэж, яллуулсан талаар тодорхой мэдээлэл хүргэж байна.

-Э.БАТ-ҮҮЛ ТӨСВИЙН МӨНГӨ АШИГЛАЖ, ХҮҮГИЙНХЭЭ КОМПАНИД ДАВУУ БАЙДАЛ БИЙ БОЛГОСОН-

Э.Бат-Үүлийг хотын дарга байхдаа эрх мэдлээ урвуулан ашиглаж, хүү Б.Чулуудайгийнхаа компанид давуу байдал олгосон хэрэгт буруутгасан билээ.

Тодруулбал, Э.Бат-Үүлийг нийслэлийн Засаг даргаар ажиллаж байхдаа ТОСК-ийн захирал А.Гантулгад нөлөөлж, “Буянт-Ухаа-2” орон сууцын хорооллыг барих төслийн ажлыг санхүүжүүлэх зориулалттай Хөгжлийн банкны 35.5 сая ам.долларын зээлээс “Бэрэн групп” ХХК-ийн ХААН банкны данс руу 2015 оны наймдугаар сарын 27-нд таван тэрбум, есдүгээр сарын 11-нд эл компанийн “Голомт” банкны данс руу дөрвөн тэрбум төгрөгийг ямар нэг хүү, барьцаагүйгээр шилжүүлжээ. Улмаар ус мөнгөнөөс Б.Чулуудайн “Гранд лайн” компани руу 2015.08.28-нд хоёр тэрбум, есдүгээр сард 3.5 тэрбумын шилжүүлсэн байдаг аж.

Түүнд 2002 оны Эрүүгийн хуулийн 263.2-т заасан “Төрийн албан тушаалтан албаны эрх мэдэл буюу албан тушаалын байдлаа урвуулан ашигласны улмаас их хэмжээний хохирол учирсан” гэм буруутайд тооцон, нийтийн албанд ажиллах эрхийг нь гурван жил хасаж, нээлттэй хорих ангид дөрвөн жил ял эдлүүлэхээр шийдвэрлэсэн.

-Б.ЧУЛУУДАЙН КОМПАНИ Э.БАТ-ҮҮЛИЙН НӨЛӨӨГӨӨР ГЭР ХОРООЛЛЫН ДАХИН ТӨЛӨВЛӨЛТИЙН ГҮЙЦЭТГЭГЧЭЭР ШАЛГАРСАН Ч НЭГ Ч БАРИЛГА БАРИАГҮЙ-

Түүний хүү Б.Чулуудайг мөн л “Төрийн албан тушаалтан албаны эрх мэдэл буюу албан тушаалын байдлаа урвуулан ашигласны улмаас их хэмжээний хохирол учирсан” гэм буруутайд тооцсон. Түүнд нийтийн албанд томилогдох эрхийг хоёр жил хасч, 15 сая 360 мянган төгрөгөөр торгох ял оноосон. Мөн тэднээс ТОСК-д учирсан есөн тэрбум төгрөгийн хохирлын тодорхой хэсгийг гаргуулж, улсад тушаахаар шийдвэрлэсэн.

Б.Чулуудайн “Гранд лайн” компани гадаад худалдаа, брокер дилерийн үйл ажиллагаа явуулах чиглэлийнх. Гэтэл уг компанийг гэр хорооллын дахин төлөвлөлтийн төслийн гүйцэтгэгчээр шалгаруулж, хүүхдэдээ давуу байдал олгосон нь мөрдөн байцаалтаар тогтоогдсон байдаг. Тодруулбал, Баянзүрх дүүргийн XII хорооны нутаг, Амгалан орчимд хэрэгжүүлэх гэр хорооллын дахин төлөвлөлтийн төсөл хэрэгжүүлэгчээр “Зуншин”, “Сайрам булган”, “Гранд лайн” ХХК-ийн түншлэл шалгарсан байхад уг түншлэлийг бус, “Гранд лайн”-ыг төсөл хэрэгжүүлэгчээр 2013 оны тавдугаар сарын 29-нд баталсан байдаг аж. Гэвч энэ хугацаанд орон сууцны нэг ч барилга бариагүй бөгөөд түүнээс болж хашаа байшингаа алдсан олон олон хүн орох оронгүй болж, үйл тамаа үзсэн гэлцдэг. Тэдний энэ хууль бус үйлдлээс болж иргэд болон улсад тэрбум гаруй төгрөгийн хохирол учирсан гэж буруутгасан байдаг.

-А.ГАНТУЛГА АЛБАН ТУШААЛАА АШИГЛАЖ, УЛСЫН МӨНГИЙГ ЗОРИУЛАЛТ БУСААР ЗАРЦУУЛСАН, ХАХУУЛЬ АВСАН ХЭРЭГТ ХОЛБОГДЖЭЭ-

Э.Бат-Үүл А.Гантулгад нөлөөлснөөр ТОСК-д нийт есөн тэрбум төгрөгийн хохирол учирсан байдаг. Тэрбээр Нийслэлийн Засаг дарга Э.Бат-Үүл, “Бэрэн групп”-ийн ерөнхий захирал Б.Мөнхтөр, “Гранд лайн” ХХК-ийн захирал Б.Чулуудай нартай хамтран ТОСК-аас хэрэгжүүлж буй “Буянт-Ухаа-2” орон сууцын хороолол барих төслийг санхүүжүүлэх зориулалттай Хөгжлийн банк болон ТОСК-ийн хооронд 2015 оны зургадугаар сарын гэрээ байгуулж авсан 35.5 сая ам.долларын зээлийг зориулалтын бусаар зарцуулсан хэрэг холбогдсон.

Улмаар тус мөнгөнөөс ТОСК-ийн “Голомт” банкин дахь данснаас “Бэрэн групп” рүү есөн тэрбум төгрөг ямар нэг хүү, барьцаагүйгээр шилжүүлсэн. Тэр мөнгөнөөс Б.Чулуудайн “Гранд лайн” ХХК-ийн эзэмшлийн данс руу 5.5 тэрбумыг шилжүүлсэн байдаг.
Мөн “Могул скай” ХХК-ийн гүйцэтгэх захирал Д.Жаргалсайханд зээл гаргаж өгсөнийхөө төлөө хээл хахууль өгөхийг шаардан хясан боогдуулж Зайсанд барьсан “Могул таун” хотхоных нь байрнаас 166.8 сая төгрөгийн үнэтэй орон сууцыг найз С.Одонтуяагаар дамжуулан авсныг АТГ тогтоожээ.

ТОСК-ийн захирал асан А.Гантулгад хуулийн этгээдийн удирдах албан тушаалтан ашиг хонжоо олох зорилгоор эрх мэдлээ урвуулан ашигласан, бусдаас хахууль авсан гэм буруутайд тооцож нээлттэй хорих ангид таван жил ял эдлүүлэхээр шийтгэн, нийтийн албанд томилогдох эрхийг мөн хугацаагаар хассан юм.

-ГЭМТ ХЭРГИЙН ХАТГАГЧ, ХАМТРАГЧ Б.МӨНХТӨР ХУУЛИЙН ЦООРХОЙГООР ЯЛГҮЙ ҮЛДЭВ-

ТОСК-ийн “Голомт” банкин дахь данснаас “Бэрэн групп” рүү есөн тэрбум төгрөг ямар нэг хүү, барьцаагүйгээр шилжүүлсэн. Тэр мөнгөнөөс Б.Чулуудайн “Гранд лайн” ХХК-ийн эзэмшлийн данс руу 5.5 тэрбумыг шилжүүлсэн байдаг. Эл мөнгө бол угтаа ТОСК-аас хэрэгжүүлж буй “Буянт-Ухаа-2” орон сууцын хороолол барих төслийг санхүүжүүлэх зориулалттай Хөгжлийн банкнаас олгосон зээл юм.

Ийнхүү “Бэрэн групп” ХХК-ийн Б.Мөнхтөрийг гэмт хэргийн улмаас олсон гэдгийг мэдсээр Э.Бат-Үүл, Б.Чулуудай нартай хамтран дээрх мөгийг зарцуулсан, мөнгө угаах гэмт хэргийг байнга тогтвортой үйлдсэн гэж буруутгажээ. Өөрөөр хэлбэл түүнийг гэмт хэргийн хатгагч, хамтран оролцогч, зохион байгуулагч хэмээн үзсэн байна.
“Бэрэн групп” ХХК-ийн ерөнхий захирал Б.Мөнхтөрийг Эрүүгийн 22.12-1 дэх хэсэгт заасан хэргийг үйлдсэн гэм буруутайд тооцсон ч хөөн хэлэлцэх хугацаа дууссаны дараа эрүүгийн хэрэг үүсгэж яллагдагчаар татсан үндэслэлээр хэргийг нь хэрэгсэхгүй болгож, эрүүгийн хариуцлагаас чөлөөлсөн юм.

-Т.ГЭРЭЛТ-ОД ҮНЭГҮЙ ОЛГОХ ЁСТОЙ БАЙРЫГ ӨӨРТӨӨ АВЧ, БУСДАД ЗАРДАГ БАЙЖЭЭ-

ТОСК-ийн Маркетинг, борлуулалтын хэлтсийн дарга Т.Гэрэлт-Одыг хуулийн этгээдийн гүйцэтгэх албан тушаалтан эрх мэдлээ урвуулсан нь хангалттай нотлогдсон гэж үзээд долоон сая төгрөгөөр торгосон.

А.Гантулга ТОСК-ийн захирал байхдаа “Буянт-Ухаа-2” хорооллын байрнаас үнэ төлбөргүй олгох иргэдийн нэрсийн жагсаалтад иргэн Ч.Түмэннастын иргэний үнэмлэх ашиглан оруулж, 92.5 саяын үнэтэй байрыг ТОСК-ийн Маркетинг, борлуулалтын хэлтсийн дарга Т.Гэрэлт-Од үнэгүй авах боломж бүрдүүлжээ. Т.Гэрэлт-Од хүргэн дүү Ж.Гантөмөрийн ээж Ч.Түмэннастын иргэний үнэмлэхийг ашигласан байжээ. Мөрдөн шалгах ажиллагааны явцад Т.Гэрэлт-Од дээрх байрнаас гадна төрсөн дүү Т.Цолмонгэрэлийн нөхөр Ж.Гантөмөрийн иргэний үнэмлэхийг ашиглан үнэ төлбөргүй байр авах хүмүүсийн жагсаалтад нэрийг нь оруулан 92.5 сая төгрөгийн үнэтэй гурван өрөө сууц авч, иргэн Б.Оюун-Эрдэнэд худалдан ашиг олсныг хууль сахиулагчид илрүүлсэн байна. Тэрбээр энэ үйлдлээ хийхдээ ТОСК-ийн ерөнхий нягтлан бодогчоор ажиллаж байсан Ю.Алтангэрэлтэй хамжжээ

-Ю.АЛТАНГЭРЭЛ Т.ГЭРЭЛТ-ОДЫН ХАМЖИГЧ БОЛЖ, ХАХУУЛЬ АВЧЭЭ-

ТОСК-ийн ерөнхий нягтлан бодогч Ю.Алтангэрэлийг “Буянт-Ухаа-1” хороололд нэг иргэнд төлбөргүй орон сууц олгохоор болсон ч үнэгүй байр өгч байгаа тухай хэлэлгүй, урьдчилгаанд төлсөн 21 сая төгрөгийг нь Т.Гэрэлт-Одтой хамт завшсан гэм буруутай гэж дүгнэн 2.7 сая төгрөгөөр торгох ял шийтгэсэн байна.

Тодруулбал, ТОСК-ийн Маркетинг, борлуулалтын хэлтсийн дарга Т.Гэрэлт-Од төрсөн дүү Т.Цолмонгэрэлийн нөхөр Ж.Гантөмөрийн иргэний үнэмлэхийг ашиглан үнэ төлбөргүй байр авах хүмүүсийн жагсаалтад нэрийг нь оруулан 92.5 сая төгрөгийн үнэтэй гурван өрөө сууц авч, иргэн Б.Оюун-Эрдэнэд худалдан ашиг олсныг хууль сахиулагчид илрүүлсэн байна. Тэрбээр энэ үйлдлээ хийхдээ ТОСК-ийн ерөнхий нягтлан бодогчоор ажиллаж байсан Ю.Алтангэрэлтэй хамжжээ.

-Д.ЖАРГАЛСАЙХАН А.ГАНТУЛГААС ЗЭЭЛ АВАХЫН ТУЛД 166 САЯЫН ҮНЭТЭЙ ОРОН СУУЦ ХАХУУЛЬД ӨГЧЭЭ-

“Могул скай” ХХК-ийн гүйцэтгэх захирал Д.Жаргалсайхан ТОСК-аас хоёр тэрбум төгрөгийн зээл авсан аж. А.Гантулга хуучнаар ОССК-ийн гүйцэтгэх захирлаар ажиллаж байхдаа ТУЗ-өөс нь гэрээ байгуулах эрх олгоогүй байхад “Могул скай” ХХК-ийн захирал Д.Жаргалсайханд хоёр тэрбум төгрөгийн зээл жилийн долоон хувийн хүүтэй өгөхөөр тохиролцжээ.
Улмаар уг мөнгөө олгохын тулд Д.Жаргалсайханаас хээл хахууль өгөхийг шаардаж, хясан боогдуулж Зайсанд барьсан “Могул таун” хотхоных нь байрнаас 166.8 сая төгрөгийн үнэтэй орон сууцыг найз С.Одонтуяагаар дамжуулан авсныг АТГ-ынхан тогтоожээ.Тиймээс есөн сая 792 мянган төгрөгөөр торгож шийдвэрлэсэн юм.

Мөн шүүхээс ТОСК-аар дамжуулан Б.Чулуудайгийн “Гранд лайн” ХХК-ийн хувьцааг худалдан авсны төлбөрт шилжүүлсэн есөн тэрбум төгрөгийг иргэний хариуцагч “Бэрэн групп” ХХК-иас гаргуулахаар болсон бол А.Гантулгаас 210.6 сая, Т.Гэрэлт-Одоос 120 сая, Ю.Алтангэрэлээс 10.5 сая төгрөг авч хохиролд тооцуулан дээрх корпорацад олгохоор шийдвэрлэсэн билээ.

Өөрийн сэтгэгдлээ илэрхийл

Share Tweet