Фокус: Зургаан эгнээ, хоёр урсгалтай шинэ зам дээрх Л.Оюун-Эрдэнэ, Х.Нямбаатар нар

Яармагаас ТЭЦ-4 хүртэлх зургаан эгнээ, хоёр урсгалтай зам өнөөдөр нээлээ.

Энэ зам нийт 2.4 км урт. Туул, Дунд гол дээгүүрх гурван гүүртэй. Энэ ондоо багтан явган бөгөөд дугуйн зам, гэрэлтүүлэг зэрэг тохижилтыг хийхээр төлөвлөжээ. Замын ажил өнгөрсөн 2023 онд эхэлсэн гэхээр жилийн дотор ашиглалтад орж байна.

Нэг урсгалдаа гурван эгнээтэй энэ томоохон зам ийн ашиглалтад орсноор Яармагийн ачаалал 20-30 хувиар буурах аж.

Ташрамд, энэ зам цаашид “Хархорин” захтай холбогдоно. Мөн Гурвалжингийн гүүр, “Хөсөг трейд” рүү явдаг хөндлөн замыг дөрвөн эгнээ болгож өргөтгөх юм байна.

Шинэ бүтээн байгуулалтын нээлтэд Ерөнхий сайд Л.Оюун-Эрдэнэ, Нийслэлийн Засаг дарга Х.Нямбаатар нар оролцлоо.

Х.Нямбаатарын хувьд “Түгжрэл бууруулах хүрээнд 2027 он хүртэл дөрвөн үе шаттайгаар, шинэ гол замуудыг нээнэ. Эхний үе шат нь өнөөдөр дуусаж байна” гэж мэдэгджээ.

Харин Ерөнхий сайд Л.Оюун-Эрдэнийн хувьд, сүүлийн хоёр жилд Засгийн газар Нйислэлийн асуудалд онцгойлон анхаарч байгааг дурдсан байна. Тэрбээр “Улаанбаатар хотын тулгамдсан олон асуудлыг сууриар нь шийдвэрлэхэд чиглэсэн хууль эрх зүйн болон үйл ажиллагааны цогц реформ хийх зорилт тавин ажиллаж байна. Сүүлийн 30 жилд нийслэлд нийт 11.5 их наяд төгрөгийн хөрөнгө оруулалт хийгдсэн бол 2024-2028 онд үүнээс гурав дахин их буюу 30 их наяд төгрөгийн хөрөнгө оруулалт хийхээр төлөвлөсөн. 20 минутын стандарт бүхий хотын төлөвлөгөөг боловсруулж, УИХ-д өргөн барихаар ажиллаж байна” гэж тодотгожээ.

Өнгөрсөн долоо хоногт “Сэлбэ дэд төв”-ийн бүтээн байгуулалтын ажилтай танилцах үеэрээ Ерөнхий сайд Л.Оюун-Эрдэнэ ингэж хэлсэн. "Би Х.Нямбаатар даргын талд бүх зүйлээр зогсож, дэмжиж ажиллах болно"

"Сэлбэ дэд төв" бүтээн байгуулалтын ажил ид өрнөж байна. Гэр хорооллыг орон сууцжуулах, олон нийтийн хувьд бүтэшгүй мэтээр ойлгогдож дассан энэ ажил анх удаа маргаангүй газраа чөлөөлж, урагшилж байгаа нь энэ. Өнөөдөр бол түгжрэл бууруулах чиглэлд хийгдэх дөрвөн үе шаттай ажлын эхнийх нь дуусаж, зургаан эгнээ, хоёр урсгалтай 2.3 км автозамыг нээчихлээ.

Нийслэлд манай хүн амын тал нь амьдардаг. Анхнаасаа 1.5 сая хүн амьдарна (жил бүр энэ тоо өсдөг) гэж төлөвлөөгүй Улаанбаатар хот амаргүй нөхцөлд ороод олон жилийг үдлээ. Үе үеийн хотын мээрүүд зөвхөн улсын Нийслэлийг гацсан гацаанаас гаргахын төлөө үүрэг хүлээн ажилладаг.

Гэхдээ Нийслэл өөрөө бие даасан маш том бүтэц болчихсон. Гарц шийдэл нь, бүтээн байгуулалт нь манайдаа улсын хэмжээний далайцтай, тэр хэрээр хөрөнгө оруулалт болон эдийн засгийн хүрээ том. Үүнийг хийхийн тулд адаглаад хууль эрх зүйн орчин ээлтэй, санхүүжилтийн механизм оновчтой байх учиртай. Мөн түүнчлэн, Нийслэлийн Засаг дарга нь улстөржилтөөс ангид, ажлаа урагшлуулах боломжоор хангагдсан байх ёстой.

Үүнийг урьдын он жилүүд батлан харуулсан. Нийслэл өөрийн гэсэн эрх зүйн тогтолцоогүй. Санхүүжилт босгох боломжгүй, жил бүр улсын төсвийг л хардаг. Дээр нь улстөржилт газар авсан нөхцөлд хотын дарга үр бүтээлтэй ажиллаж чаддаггүй байсан.

Э.Бат-Үүлийг Нийслэлийн сайн Засаг дарга байсан л гэдэг. Олон ажил санаачилж, болгож бүтээх гэж үзсэн учраас тэр. Харин Ерөнхий сайд нь Н.Алтанхуяг байв. Улсын эдийн засаг тэлж, бонд ч босгож, хөрөнгө оруулалт татаж байсан үе. Гэхдээ л Н.Алтанхуягтай ойлголцож чадаагүй учраас Э.Бат-Үүлийн ажил дорвитой урагшилж байсангүй жишээ бий.

Харин өдгөө Ерөнхий сайд нь хотын даргынхаа ажлыг ямар ч үед нь дэмжинэ гэдэг улс төрийн байр сууриа мэдэгдчихлээ. Энэ бол Монголын улс төрд бүтээн байгуулалт, реформын шинжтэй ажил хийгддэггүй гол суурь асуудлыг шийдлээ гэсэн үг.

Түүнээс өмнө гэхэд Л.Оюун-Эрдэнэ МАН-ын даргын хувьд мөн Нийслэлд хийгдсэн эрх зүйн орчны шинэчлэлийг дэмжсэн. Ямар нэг хаалт тавиагүй. Өдгөө Нийслэл бие даасан хуультай болсноор илүү бие даасан, өргөн хүрээний үйл ажиллагаа явуулах боломжтой болсон. Нийслэл өөрөө бонд босгодог боллоо. Гэр хорооллыг орон сууцжуулж, агаарын бохирдол бууруулж, түгжрэл багасгах чиглэлд ч тусдаа хууль баталсан. Ийм хууль байгаа учраас энэ удаа "Сэлбэ дэд төв"-ийн бүтээн байгуулалт газраа иргэнд ээлтэй, сэтгэл ханамжтай чөлөөлж чадав.

Ерөнхий сайд Л.Оюун-Эрдэнэ "Би Х.Нямбаатартай хамтарч Засгийн газрын түвшинд олон ажлын ард гарсан. Ийм улстөрч цөөн. Тийм учраас УИХ, ЗГ-ын гишүүнээс нь буулгаж байж хотын дарга болсон. Түүнд итгэхийг хүссэн. Өнгөрсөн 30 жилд хийсэнтэй тэнцэх 30 их наяд төгрөгийн хөрөнгө оруулалтыг Улаанбаатар хотод хийх гэж байна. Эгзэгтэй, хариуцлагатай үе. Энэ нь нийслэлчүүдэд хэрэгтэй" гэж нэмж ярьжээ.

Энэ үнэн. Х.Нямбаатар ХЗДХ-ийн сайд байхдаа ЗГ-ын хамаг галыг үүрч ирсэн, ирээдүйтэй, чанга улстөрч байв. Гэвч нэг өдөр л хотын дарга болгох намын шийдвэр ирснийг тэр хүлээн авсан. Сайд ч биш, УИХ-ын гишүүн ч бус болсноос гадна 2024 оны УИХ-ын сонгуулийг өнжсөн. Ингээд зөвхөн Нийслэлд төлөвлөсөн ажлаа хийхэд төвлөрсөн.

Ирэх дөрвөн жилд хэд хэдэн мега төсөл эхлүүлэхээр бэлтгэл ажлаа хангачихлаа. Ажил явж, Ерөнхий сайд нь ч дэмжлэгээ илэрхийлнэ гэдэг ийнхүү олон талаар хот өөрчлөгдөхөд ээлтэй нөхцөл бүрджээ. Яг ямар чиглэлд Засгийн газар Нийслэлийг бодлогын түвшинд дэмжиж буйгаа ч өнөөдөр Ерөнхий сайд Л.Оюун-Эрдэнэ дээр дурдсанчлан тайлбарласан байна.

Үе үеийн улстөрчид "Хот том бүтэц болчих вий, тэр хэрээр эрх мэдэл төвлөрчих вий. Улмаар УИХ, ЗГ-ыг давсан хүчирхэг мөнгөний бүтцийг өөр нэгэнд алдчих вий" гэсэн далд аминч эрмэлзлээр асуудалд хандаж ирсэн. Одоо үзэл санааны түвшинд өөрчлөгдсөн нь дээрх мэтээс анзаарагдаж байх шиг.

Ямартай ч хотын даргад Ерөнхий сайдынх нь бөгөөд намын даргынх нь бодлогын дэмжлэг байна гэдэг юунаас ч чухал. Улс төрийн үүднээс ч хаалт, хамгаалалт болох юм. Харин өөрөө ХЗДХ-ийн сайдаар ажиллахдаа реформын шинжтэй ажлуудыг гол төлөв үүрч ирсэн Х.Нямбаатар зоригтой, тууштай байх ёстой. Хэрэв тэгж чадвал ирэх дөрвөн жилийн хугацаа Улаанбаатар хотыг нэгээр тогтохгүй алхмаар урагшлах, шинэ шатанд гарч дэвших түүхэн мөчлөг байх болно.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй