ШИНЭ ТӨСӨВ: Ч.Номин сайдын зардлуудыг хамруулж, 2.4 их наядын бууралт хийхдээ орлогоо 544 тэрбумаар багасгаж төсөөлжээ

Орлого нь 33.9 их наяд, зарлага нь 35.8 их наяд, алдагдал 1.9 их наядтай тэнцэх 2025 оны төсвийн тухай хуульд Ерөнхийлөгч бүхэлдэн хориг тавьж, УИХ хүлээж авсан. Ингэснээр Засгийн газар орлого, зарлага нь 33.3 их наяд байхаар тооцож, АЛДАГДАЛГҮЙ төсвийг өргөн барихаар бэлтгэжээ.

Уг төсвийг өнөөдөр |2024.12.04| өргөн барих бөгөөд өчигдөр намын бүлгүүдэд танилцуулагдсан төслийн PPT хувилбарыг тайлбарлан хүргэж байна. Энэ нь олон нийтэд ил гарсан албан ёсны хувилбар биш гэдгийг тодотгоё.

Төсвийн алдагдлыг бууруулахдаа орлогын төсөөллөө 544 тэрбумаар багасгаж, 2.4 их наядын зардлыг танажээ

• Урсгал зардлыг хасах замаар 1.4 их наяд,
• Хөрөнгийн зардлыг бууруулах 0.8 их наяд,
• Орлогын бууралтыг нөхөх замаар гадаад зээлийн дүнг нөхөх 0.2 их наяд дүнгээр гэсэн гурван аргачлал хэрэглэж, нийт 2.4 их наядаар бууруулсан байна.

Өөрөөр хэлбэл, хүчингүй болж буй 33.9 их наядын орлогын төсөөллөө Засгийн газар 544 тэрбумаар багасгаж, алдагдлын хэмжээ 1.9 их наяд байсныг 2.4 их болгосон нь анхаарал татав. Уг нь Ерөнхийлөгчийн хориг нь орлого бууруулах чиглэлд тодорхой чиглэл өгөөгүй байв.

Орлогын 544 тэрбумын бууралтад гаалийн орлогоос гадна гурван төрлийн татвар, НДШ, ЭМД багтаасныг дээрх хүснэгтээс харна уу. Тэгвэл хөндөхгүй орхих зардлыг доод хүснэгтээс хараарай.

Дээд, доод хүснэгтэгтүүдээс харахад, Монгол Улс ирэх онд 2.4 их наядыг хэмнэхдээ,

• Хүүхдийн мөнгөнд 1.6 их наяд зарцуулж,
• Гадаад зээлийн хүүгийн төлбөрт 1.3 их наяд,
• Төрийн алба хаагчдын цалинд 5.4 их наядыг зарлагадаж,
• 36 сарын тэтгэмжид 0.5 их наяд өгөх агуулгуудыг зайлшгүй зардалд эрэмбэлсэн байна.

Үндсэндээ халамж болон цалингийн зардлаар эдийн засгийн урсгалаа дэмнэж, зээлийн хүүнүүдээ төлөх байдлаар энгийн айлын горимд шилжих юм.

Зардал дээр юуг анхаарав

Сангийн сайд өнгөрсөн парламентаар баталсан шинэ хуулиудыг хэрэгжилтийг дагах зардлуудыг эргэж харахаас өөр аргагүй гэдгээ өмнө нь онцолсон. Энэ дагуу Ч.Номин сайдын кино үзэх ваучер тэргүүтэй олон нийтийн шүүмжлэл хүлээсэн хэд хэдэн хуулийн заалтууд хүчингүй болж байна.

Хүчингүй болох хуулиудын заалтыг харцгаая

Соёлын бүтээлч үйлдвэрлэлийн тухайн хуулийн,

8.2.Үндэсний соёлын агуулгыг түгээх, таниулах болон соёлын бүтээлч үйлдвэрлэл эрхлэгчийн бизнесийн өрсөлдөх чадварыг дээшлүүлэх зорилгоор Монгол Улсын иргэнд соёлын бүтээгдэхүүн, үйлчилгээ худалдан авах эрхийн бичгийг төрөөс үнэ төлбөргүй олгоно.

8.3.Энэ хуулийн 8.2-т заасан соёлын бүтээгдэхүүн, үйлчилгээ худалдан авах эрхийн бичгийг 16-18 насны иргэнд жил бүр олгоно.

8.4.Энэ хуулийн 8.1, 8.2-т заасан үндэсний соёлын агуулгыг дэмжих, соёлын бүтээгдэхүүн, үйлчилгээ худалдан авах эрхийн бичиг олгох, хянах, хэрэглэгчийн статистик мэдээлэлд үндэслэн хязгаарлалт тогтоохтой холбоотой журам болон эрхийн бичгийн санхүүжилтийн хэмжээг Засгийн газар батална.

Биеийн тамир, спортын тухай хуулийн 11.1.3 дахь заалт нь хуулиндаа алга байв.

Засгийн газрын тусгай сангийн тухай хуулийн,

3.2.Нийгмийн даатгалын сан, Эрүүл мэндийн даатгалын сан, Нийгмийн халамжийн сан, Хөдөлмөр эрхлэлтийг дэмжих сан, Төсвийн тогтворжуулалтын сан, Ирээдүйн өв сан, Хуримтлалын сан, Хөгжлийн сан, Зэвсэгт хүчний хөгжлийн сан, Цагдаагийн хөгжлийн сан, Улсын авто замын сан, Кино урлагийг дэмжих сан, Мэргэжлийн боловсрол, сургалтыг дэмжих сангийн бүрдүүлэлт, зарцуулалтын онцлогтой холбогдсон харилцааг тусгай хуулиар, нийтлэг харилцааг энэ хуулиар зохицуулна.

5.3.9.Кино урлагийг дэмжих сан, мөн Кино урлагийг дэмжих тухай хуулийн дөрөвдүгээр бүлэг,

Соёлын тухай хуулийн,

34.3.1.соёлын бүтээлч үйлдвэрлэлийг дэмжих арга хэмжээг хэрэгжүүлэх;

34.3.3.инновац шингэсэн бүтээгдэхүүн, үйлдвэрлэлд санхүүгийн дэмжлэг үзүүлэх;

34.4.Соёлын бүтээлч үйлдвэрлэлийг дэмжих арга хэмжээг Засгийн газар батална.

Эрүүл мэндийн тухай хуулийн,

8.1.21.иргэний эрүүл мэндээ хамгаалах, өвчлөхөөс урьдчилан сэргийлэх, өвчин, эмгэг, гэмтлийн улмаас эрүүл мэндэд үүсэх үр дагаврыг багасгах, арилгах чиглэлээр сургалт, сурталчилгаа хийх, эрүүл мэндийг дэмжих арга хэмжээг зохион байгуулах;

Ирэх жил улс тавилга огт шинээр АВАХГҮЙ, гадаад, дотоод томилолтын зардлыг 50 хувь БУУРУУЛНА

Энэ мэдээнд өгөх таны үнэлгээ

Хуваалцаарай Жиргээрэй