"Харанга" хамтлагийн ахлагч Ц.Энхманлай тэнгэрт дэвшлээ

"Харанга" хамтлагийн ахлагч, МУГЖ Ц.Энхманлай ертөнцийн мөнх бусыг үзүүлжээ.

1980-аад оноос эхлэн Монголын урлаг, соёлын ертөнцөд хүнд рок урсгалыг анхлан нутагшуулахын төлөөх их үйлс нь "Харанга" хамтлаг болон үргэлжилж, тэд тавуул 35 жилийн турш тайзан дээр амьдарлаа.

Хамгийн сүүлд Европ дахь аялан тоглолтоос буцаж ирэхэд нь Ц.Энхманлайгийн дүү нас барж, хамтлагийнхан нь эмгэнэл илэрхийлж байв.

Талийгаачийн ар гэр, найз нөхөд, "Харанга" хамтлагийнханд гүн эмгэнэл илэрхийлье.

Ц.Энхманлай нь 1956 оны есдүгээр сарын 27-нд Улаанбаатар хотноо төрсөн.

1974 онд анх уран бүтээлийн замналаа эхэлж "Ногоон гэрэл" хамтлагт гитарчнаар орж, Я. Одсүрэнтэй хамт тоглодог байсан. 1977-78 онд "Айзам" хамтлагт бөмбөрчнөөр тоглож байв. 1978 онд цэрэгт татагдан "Соёмбо" хамтлагт орж, 1986 он хүртэл хүчин зүтгэжээ. "Соёмбо" хамтлагт Ц. Чулуунбат, Н. Пүрэвдаш, Х. Лхагвасүрэн нартай танилцсан байна.

Я.Одсүрэнтэй "Ногоон гэрэл" хамтлагт тоглодог байхаасаа тэрээр хүнд рок хамтлаг байгуулахыг хүсч мөрөөдөж явжээ. Энэ мөрөөдөл нь 1989 онд биеллээ олж Ц. Чулуунбат, Н. Пүрэвдаш, Я. Одсүрэн, Х. Лхагвасүрэн нартай хамтран "Харанга" хамтлагийг байгуулсан юм. "Харанга" хамтлагийн анхны тоглолтын нэр түүний үг, аяыг нь зохиосон, төрийн шагналт бүтээл болох "Амьдрал" дууны нэрээр нэрлэгдсэн юм. "Зэрэглээ" дууны үг, "Аялгуу" дууны ая, "Манан" дууны үг гээд олон олон хит дуу түүний урын санд бий.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй