БАРИМТ: Д.Батбаяр 32 тэрбумыг ЗАЛИЛАХДАА Ц.Элбэгдорж, М.Энхболд, С.Батболд, Н.Алтанхуяг нарын гарын үсгийг ХУУРАМЧААР ЗУРЖЭЭ

Eguur.mn сайт гадны хөрөнгө оруулагчдыг санхүүгийн нарийн схем үүсгэж, төрийн байгууллага, улстөрчидтэй хамтран хулхидах замаар их хэмжээний мөнгөн хохирол учруулдаг дотоодын ААН-үүдийн буруутай үйлдлүүдийг баримтаар дэлгэж буй. Энэ хүрээнд бид өмнө нь, “БАРИМТ: Ж.Мөнхбатын ХҮРГЭН АХ Д.Буянтогтохын хөрөнгө оруулагчдыг 70 сая ам.доллараар хохироосон түүх” нэртэй контент бэлтгэж нийтэлсэн. Уг контентод ЗГХЭГ-ын дарга асан Ж.Мөнхбат 162 тэрбумын концесс өгч байсан Д.Буянтогтох захиралтай “Засагчандмань Майнз” компани Хонконгод бүртгэлтэй GRF  хөрөнгө оруулалтын сангаас 19 сая.долларын зээлийг хөрвөх гэрээгээр авч, бусдад 70 сая ам.долларын өр үүсгэсэн хойноо оргон зугтсан талаарх мэдээлэл, улс төрийн нөлөөлөл, зээлийн схем зэргийг баримтаар дэлгэсэн юм.

Харин энэ удаа УИХ-ын гишүүн асан, Кёкүшюзан Д.Батбаярын БНХАУ-ын “Евроази интернэшнл инвестмент групп” -ээс залилан мэхлэх замаар 32.7 тэрбум төгрөг авсан баримтыг хүргэж байна. Хамгийн сонирхолтой нь, Кёкүшюзан Д.Батбаяр нар нь Ерөнхийлөгч асан Ц.Элбэгдорж, Ерөнхий сайд асан С.Батболд, Тэргүүн шадар сайд асан Н.Алтанхуяг, Шадар сайд М.Энхболд, Монголбанкны Ерөнхийлөгч асан Л.Пүрэвдорж нарын гарын үсгийг хуурамчаар үйлдсэн албан бичиг, батламжууд үйлдэж, урд хөршийн компанид Монголын газрын зургийн нэгээхэн хэсгийг илгээн “Засаглан захир, казино, банк байгуул, 80 жил үнэгүй ашигла, өвлүүл” хэмээсэн байдаг нь ихээхэн анхаарал татдаг билээ.

ХЭРЭГ: КЁКҮШЮЗАН Д.БАТБАЯР НАР ТАВАН ЖИЛИЙН ТУРШ ЗАЛИЛАНГАА ҮРГЭЛЖЛҮҮЛЖ, 32.7 ТЭРБУМЫГ ХАЛААСАЛЖЭЭ

ХЭРГИЙН ТУХАЙ ТОВЧ ӨГҮҮЛЭХЭД, Кёкүшюзан Д.Батбаяр Засгийн газар, Ерөнхийлөгчийн дэмжлэгээр Зам-Үүдэд чөлөөт бүс байгуулах 50 мянган га талбайг БНХАУ-ын “Евроази интернэшнл инвестмент групп”-д 80 жилийн хугацаатай ҮНЭГҮЙ ашиглуулахаар “ХУУРАМЧ” гэрээ байгуулсан байдаг. Нэг ёсондоо Монголын Засгийн газраас Замын-Үүдэд барих чөлөөт бүсийн бүх ажлаа эл байгууллагад даатгасан гэх утгыг компанийн эздэд  ойлгуулсан гэсэн үг. Ингэхдээ уг газрын эзэмшигч гэгдэх “Евроази интернэшнл инвестмент групп”-д:

-Ашигт малтмал олборлох эрхийг бүрэн өгч,

-Банк шинээр үүсгэн байгуулах,

-Казино байгуулах,

-Тавантолгойн ордоос хувь эзэмших,

-Нийт  ТАВАН  орд газрыг бэлгэнд авах,

-Өөрийн хүссэнээр засаглалаа хэрэгжүүлэх зэрэг эрхийг зөвшөөрсөн гэх утгаар тухайн үеийн төрийн өндөр албан тушаалтнуудын гарын үсэг бүхий албан бичгүүдийг хуурамчаар үйлдэж, итгүүлэх замаар мөнгө авч байжээ.

Бүр 2009-2014 оны хооронд буюу нийт таван жил дамнан үргэлжилсэн уг залилангийн хэрэг өрнөсөн процесс нь, иргэн Н.Болормаа өөрийгөө Замын-Үүд чөлөөт бүсийн захирагч хэмээн урд хөршийн компанид танилцуулж, мөнгө салгаж явах зуураа УИХ-ын гишүүн асан Кёкүшюзан Д.Батбаяртай холбож, улмаар үгсэн хуйвалдах замаар үргэлжлүүлэн залилж, найз “Сайхан ордос туурь” ХХК-ийн захирал Б.Цэрэндоржоо татан оролцуулсан байдаг аж.

Уг хэргийг АТГ-аас Цагдаагийн байгууллага руу шилжүүлж, эдүгээ ЦЕГ-ын Мөрдөн байцаах албаны Залилан мэхлэх гэмт хэрэгтэй  тэмцэх хэлтэст Д.Батбаяр нарыг мөрдөн шалгаж, улмаар яллагдагчаар татаад байгаа аж. Тэднийг:

Эрүүгийн хуулийн тусгай ангийн 17.3 дахь

“Хуурч, эсхүл баримт бичиг, эд зүйл, цахим хэрэгсэл ашиглаж, эсхүл зохиомол байдлыг зориудаар бий болгох, бодит байдлыг нуух замаар бусдыг төөрөгдөлд оруулж, эсхүл нэр хүнд, урьдын харилцааны явцад бий болсон итгэлийг урвуулан ашиглаж эзэмшигч, өмчлөгчийн эд хөрөнгө, эд хөрөнгийн эрхийг шилжүүлэн авсан...” гэх үндэслэлээр,

Мөн хуулийн 17.3.2.2.2:

“Бусдад ноцтой, эсхүл их хэмжээний хохирол учруулж үйлдсэн бол арван мянган нэгжээс дөчин мянган нэгжтэй тэнцэх хэмжээний төгрөгөөр торгох, эсхүл ХОЁР ЖИЛЭЭС НАЙМАН ЖИЛ ХҮРТЭЛ ХУГАЦААГААР ХОРИХ ЯЛ ШИЙТГЭНЭ” гэсэн зүйл ангиар яллахаар зүйлчилжээ.

Ингээд тэдний хуурамчаар үйлдсэн албан бичгүүдтэй танилцъя.

Баримт 1: Д.Батбаяр Ерөнхийлөгч асан Ц.Элбэгдоржийг “Миний хүүгийн хуурай аав” хэмээн танилцуулжээ

Кекүшюзан Д.Батбаяр “Евроази интернэшнл инвестмент групп”-ийн захирал Вү Сэн Чиангд өөрийгөө УИХ-ын гишүүн, Үндэсний аюулгүй байдлын зөвлөлийн гишүүн хэмээн танилцуулж байсан аж. Улмаар тухайн үеийн гишүүний нэр нөлөөгөө ашиглах замаар Вү Сэн Чиангд итгэл төрүүлэхийн тулд хэд хэдэн уулзалт зохион байгуулсны нэг нь, Ерөнхийлөгч Ц.Элбэгдоржтой хийсэн уулзалт байжээ. Уулзалтын үед Ерөнхийлөгч асан Ц.Элбэгдорж  дипломат ёсоор “Төслийг дэмжинэ” гэж дуугарсан гэх.

Эх сурвалжийн мэдээллээр Д.Батбаяр уг уулзалтын дараа “Ерөнхийлөгч миний хүүгийн хуурай аав тул төслүүдийг дэмжинэ” гэж амлаж байсан гэх. Ингэж нэлээд хэмжээний санхүүжилт нэмж салгасан бөгөөд мөрдөн байцаалтын явцад уг асуудлаар Ц.Элбэгдоржоос мэдүүлэг авч, өнөөх нь тус уулзалтыг огт санахгүй байсан гэх мэдээлэл бий.

Баримт 2: Замын-Үүдэд 50 мянган га талбайг 80 жилийн хугацаатай ашиглаж, ЗАСАГЛАЖ, ӨВЛҮҮЛЭХ эрхийг өгчээ

Тухайн үед Ерөнхий сайдаар С.Батболд, Тэргүүн шадар сайдаар Н.Алтанхуяг ажиллаж байж. Д.Батбаяр нар тэдний гарын үсгийг хуурамчаар үйлдэж, Монголын Засгийн газраас Замын-Үүдэд чөлөөт бүс хөгжүүлэх дэд бүтцүүдийг эргэн төлөгдөх нөхцөлтэйгөөр хийх, улмаар тогтвортой байдлын гэрээг зуруулсан байна.

Ингэхдээ “Евроази интернэшнл инвестмент групп”-д Замын-Үүд дэх 50 МЯНГАН га газраа өөрийн дураар ЗАСАГ ЗАХИРГААНЫ НЭГЖ ТОГТООЖ,  өвлүүлж,  ашигт малтмалыг нь АШИГЛАЖ, бүсээс айл болон бусад ААН-үүдийг гаргах замаар тэднийд бүрэн өгөхөөр гэрээнд тусгаж өгсөн байдаг.                                            

Баримт 3: Тавантолгойн ордын 63 хувийг эзэмшүүлэхээр УИХ, Засгийн газрын түвшинд хэлэлцэж байна гэж итгүүлжээ

Дараачийн хуурамч бүрдүүлбэр нь, Ерөнхий сайд асан С.Батболдын “...танай компанийг Тавантолгой ордод хувь эзэмшүүлэх чиглэлд зохих дэмжлэгийг үзүүлэхэд бэлэн байна” гэсэн утга бүхий албан бичиг. Уг хуурамч бичгийг 2009 онд үйлдэж, Хятадын талдаа үзүүлж байжээ. Улмаар дараа жил нь тухайн үед Шадар сайдаар ажиллаж байсан М.Энхболдын гарын үсэг бүхий “...Монгол Улсын Төр та бүхэнтэй хамтран ажиллаж болох гэж үзэн, Тавантолгойн орд газраас 63 хувийг нь эзэмшүүлэхээр Засгийн газар, УИХ дээр хэлэлцэж байна” гэсэн бичиг хүргүүлсэн байна.

Баримт 4: “Евроази интернэшнл инвестмент групп”-д ТАВАН ОРД БЭЛЭГЛЭСЭН БИЧИГ

Нийтдээ таван жил орчим үргэлжилсэн уг залилангийн явц дахь хамгийн жигтэй кэйсд таван ширхэг ордыг “Евроази интернэшнл инвестмент групп”-д бэлэглэнэ гэх агуулга бүхий албан бичиг ордог. Уг албан бичгийг 2009-2010 оны хооронд хэд хэдэн удаа хуурамчаар үйлдэж, Хятадын талдаа үзүүлжээ. Хуурамч албан бичигт дурдсанаар,

-Орхон аймгийн зэсийн орд,

-Сүхбаатар аймгийн төмрийн орд,

-Төв аймгийн алтны орд,

-Дорноговь аймгийн нүүрсний орд,

-Өмнөговь аймгийн Оюутолгой ордын зүүн урд байрлах нүүрсний уурхайнуудыг БЭЛЭГЛЭСЭН  байна.

Нэг ёсондоо, “Замын-Үүдэд танайх бүх зардлаа гаргаж, чөлөөт бүс байгуулах учраас бид найр тавьж, ТАВАН ОРД БЭЛЭГЛЭН дайлж байна” гэх талархлын үг аятайгаар ордуудаа хуурамчаар бэлэглэж явжээ.

Баримт 5: Чөлөөт бүсэд БАНК  байгуулахыг зөвшөөрсөн батламж илгээжээ

Эхний хуурамч гэрээгээр “Чөлөөт бүсдээ юу ч хийж болно. Өөрсдөө мэдээд дураараа дургиарай” гэх агуулгыг Ерөнхий сайд, Тэргүүн шадар сайдын гарын үсгээр оруулчихсан байдаг. Тиймээс ч дараа нь тэд энэ амлалтад дүйцэх юм олж итгүүлэх хэрэгтэй болсон гэх логик харагддаг. Энэ хүрээндээ Монголбанкны Ерөнхийлөгчийн гарын үсэг бүхий БАНК БАЙГУУЛАХ сертификат гаргаж өгч байжээ.

Ингэхдээ 2009 оны зургадугаар сард тухайн үеийн Монголбанкны Ерөнхийлөгчийн Л.Пүрэвдоржийн хуурамч гарын үсэг бүхий “Банк байгуулахыг дэмжинэ” гэх албан бичиг илгээж, жилийн дараа сертификатаа илгээж, жүжгээ тавьсан байна.

Баримт 6: “Чөлөөт бүсэд КАЗИНО  байгуулахыг төрөөс дэмжинэ” гэсэн амлалт өгсөн хуурамч бичиг

Монгол Улсын Засгийн газрын сайд Л.Долгорын гарын үсэг бүхий албан бичигт “...Казино, амралт зугаалгын бүс хийхэд төрөөс дэмжин туслах болно” гэсэн бичгийг “Евроази интернэшнл инвестмент групп”-д илгээж байжээ. Уг  хуурамч бичиг 2009 оны долдугаар сард илгээгдсэн байна.

ДҮГНЭЛТИЙН ОРОНД: Эд хэрэглэлээ гамтай сайхан хэрэглэдэг айлд зочлогсод нь хүртэл хүндлэлтэй хандаж, үг үйлдлээ цэнэдэг. Харин замбараагүй, байгаа зүйлээ хайрладаггүй айлд зочлогсод орон дээр нь хамтдаа гарч, үсэрч дэвхэрч тоглодог билээ. Чухам ийм дүр зураг дээрх кэйсүүдээс харагдана. Ард түмнээ төлөөлж парламентын танхимд суугаа УИХ-ын гишүүн нь “Энэ ч ордыг аваад өгье, тэр ч банкийг байгуулаад өгнө. Газрыг дураараа ашиглаж болно” хэмээн гадны компанид ойлгуулж, тэд нь ч “Алтан загасны үлгэр”-т гардаг эмгэн шиг загнасан мэт дүр зураглал үлджээ.

Хятадын бизнесмен эр ч тэр яаж бодохоороо тусгаар улсын нутаг дэвсгэрт өөрсдийн засаглал тогтоож, Тавантолгойн ордын 63 хувийг эзэмшиж, таван орд бэлгэнд авч болно гэж сэтгэснийг таахад бэрх юм. Ямар ч байсан тэд таван жилийн турш ийм үлгэрт итгэж, нэгэн үес Японд “Мэхний их дэлгүүр” хэмээн алдаршиж явсан Кёкүшюзан Д.Батбаярт 32.7 тэрбумаар залилуулжээ. Мөнгө мөртэй, өгсөн авсан нь ч нотлогдож буй тул Улсынхаа Ерөнхийлөгч, Ерөнхий сайд, Монголбанкны Ерөнхийлөгчийн гарын үсгийг хуурамчаар үйлдсэн хэрэгт Кёкүшюзан Д.Батбаяр унах нь үндсэндээ тодорхой болжээ. Гишүүн байхдаа ийм залиланг ичих сэтгэлгүй хийж явсан хүн эргээд дахин УИХ-д нэр дэвшсэн гэж бодохоор манай улсад олон асуудал үнэхээрийн буруу зүй тогтлоор өрнөж байгааг илтгэнэ.

Ж.МЯДАГБАДАМ

Гадны хөрөнгө оруулагчдыг залилсан асуудлаарх өмнөх контент:

“ БАРИМТ: Ж.Мөнхбатын ХҮРГЭН АХ Д.Буянтогтохын хөрөнгө оруулагчдыг 70 сая ам.доллараар хохироосон түүх” контентыг ЭНД ДАРЖ уншина уу.

Энэ мэдээнд өгөх таны үнэлгээ

Хуваалцаарай Жиргээрэй