Б.Цэцэгийн төсөлд түгжрэл бууруулахаас ХОЁР ДАХИН ИХ мөнгө төсөвлөчхөөд Д.Сумъяабазар таг, чиг сууна

Сэлбэ голын орчин тойрныг тохижуулах төслийг иргэн Б.Цэцэг удирдах болсон нь нийгмийн анхаарал татах сэдэв болсоор багагүй хугацааг өнгөрөөж байна.

Б.Цэцэгийн хувьд “Санал санаачилгыг маань дэмжсэнд баярлалаа. Энэ төслийг  хэрэгжүүлэхийн тулд хувиасаа мөнгө гаргаад ч явж үзсэн” хэмээн байр сууриа илэрхийлж байгаа.

Түгжрэл бууруулахад 1.7 тэрбум, Б.Цэцэгийн төсөлд 3.1 тэрбумыг төсөвлөжээ

Гэвч Нийслэлийн ЗДТГ-ын зүгээс процессын ямар ч тайлбар өгөхгүй байгаа. Б.Цэцэгийг уг төслийн нэгжийн удирдлагаар хэрхэн томилсон, сонгон шалгаруулалт зарласан эсэх нь одоо хүртэл тодорхойгүй. Өөрөөр хэлбэл, одоогийн ойлгогдож буй нөхцөл байдлаар Д.Сумъяабазар зүгээр л Б.Цэцэгийг “дуудаж” авчраад “Сэлбэ голын төслийн хариуц, хөрөнгийг нь төсөвлөж өгнө” гээд тохирчихсон мэт дүр зурагтай.

Удахгүй Нийслэлийн 2023 оны төслийг хэлэлцэн батлах гэж байна. Төсвийн төсөлд “Туул, Сэлбэ гол орчмыг сайжруулах төслийн нэгж”-д 3.1 тэрбум төгрөг төсөвлөсөн байгаа юм.

Гэтэл “Авто замын түгжрэлийг бууруулах нэгдсэн төслийн нэгж”-д 1.7 тэрбум төгрөг төсөвлөжээ. Өнөөдөр Улаанбаатар хотод автомашинтай иргэдийн тоо улам бүр нэмэгдэж, түгжрэл гэдэг эрх баригчдын өөрсдийнх нь дөжирсөн, болохгүй бол хамгаалалт гаргаад урсгал сөрөөд явчихдаг, байдаг л нэг асуудал болоод байна. Нэг ёсондоо түгжрэл гэдэг утаанаас, Сэлбэ голын орчин тойрноос илүү аминд тулсан асуудал боллоо.

Харин голын орчин тойрныг сайжруулахад 3.1 тэрбумыг, харин түгжрэл бууруулахад 1.7 тэрбумыг төсөвлөсөн нь ихээхэн зөрүүтэй.

Сэлбэ голд энэ жил зарласан 1.2 тэрбумын зургаан тендер хаачих вэ

Үүний дээр, зөвхөн төслийн нэгжид 3.1 тэрбумыг төсөвлөж, ирэх оны төсвийг оруулж ирснээс гадна энэ жилд л гэхэд зургаан тендерийг Сэлбэ голын хүрээнд зарласан. Зөвхөн Сэлбэ голын засвар тохижолт, авто замын бүтээн байгуулалтад зарцуулах энэ зургаан тендерийн нийт өртөг 1.2 тэрбум төгрөг. Бүгдийнх нь тендер шалгаруулах хугацаа дууссан. Энэ хаачих вэ, хэрэгжих үү, бүр хаях уу гэдэг нь ч анхаарал татна.

Тодруулбал,

1. 
   Сэлбэ голын явган хүний гүүр, тохижилтын ажилд 110 сая төгрөг /Нээсэн  огноо 2022.10.03/
2. Сэлбэ голын засвар тохижилтод 500 сая төгрөг /Нээсэн огноо 2022.08.08/
3. Сэлбэ голын баруун талын авто замаас хойшоо шинээр хийгдэх авто зам, замын байгууламжид 1.2 сая төгрөг /Нээсэн огноо 2022.06.27/
4. Сэлбэ голын засвар тохижилтод дахин 500 сая төгрөг /Нээсэн огноо 2022.06.10/
5. Сэлбэ голын баруун талын авто замаас хойшоо шинээр хийгдэх авто зам, замын байгууламжид дахин 1.2 сая төгрөг /Нээсэн огноо 2022.05.10/
6. Сэлбэ голын засвар тохижилтод дахин 500 сая төгрөг /Нээсэн огноо 2022.05.06/ багтаж байна. Утга давхардсан энэ тендерүүд дунд Б.Цэцэгийн төсөл ч байхгүй байгаа юм.

Хот хариуцсан бас нэгэн сайдтай болсон зэргээр Нийслэлийн зардал улам л данхайж, гэвч иргэдийнх нь стресс бухимдал нэмэгдсээр байна. Ийм цагт Нийслэлийн Засаг дарга Д.Сумъяабазар иргэн Б.Цэцэгт 3.1 тэрбумыг хуваарилчхаад аг, жиг сууж буй. Ядах нь аа яагаад түүнд итгэл хүлээлгэж, төслийн нэгж удирдуулахаар болсноо, ер Сэлбэ голын орчин тойрныг сайжруулах нь ямар ач холбогдолтой байгаа талаар ил яримаар, мэдээлмээр.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй