Ханиадтай хүүхдийг гэрээр эмчлэх эмчилгээний багцыг өрхийн эмнэлгээс өгдөг болно гэж Эрүүл мэндийн сайд Т.Мөнхсайхан өнгөрөгч есдүгээр сарын 18-ны өдөр мэдэгдсэн.
Ингэхдээ, "Бид ханиад томууны улирлыг яаж хүүхдүүдээ өвтгөхгүйгээр даван туулах вэ гэдэг бодлого чухал. Үүний нэг гол арга хэмжээ нь вакцинжуулалт. Энэ жил томуугийн вакцинжуулалт өмнө жилүүдийнхээс эрт эхэлж байгаа. Учир нь дархлаажуулалт маань вакцин хийгдсэнээс хойш сарын хугацаанд тогтож эхэлдэг учраас эрт эхэлж байна.
Хоёрдугаарт сургууль цэцэрлэгийн эрүүл ахуй халдвар хамгаалал ариутгалыг сайжруулах ажлын хэсэг гарсан ажиллаж байгаа. Сургууль цэцэрлэгт томуугийн халдварлалт их явчих гээд байдаг. Нөгөө талаасаа эмнэлгүүд ачаалал их байдгийн шалтгаан нь эмнэлэг дээр очоод хэвтээд тусламж үйлчилгээ авахаар үнэ төлбөргүй байдаг. Өрхийн эмчилгээ үзүүлээд үйлчилгээ авахаар эмийн сангаас өндөр өртөгтэй эм, тариа авч хэрэглэх болдог. Үүнээс үүдэлтэй эмнэлгийн ачаалал ихэсдэг учраас тухай багцуудыг өрхийн эмнэлгүүдэд гаргаж байгаа. Ханиад томуу туссан хөнгөн шатандаа байгаа хүүхдүүдэд хэрэглэх эм тариаг өрхийн эмнэлэг дээр нь үзээд эмийг багцаар нь өгөөд гэрээр эмчлэх боломжийг олгоно" хэмээсэн.
Мөн өрх, сум, тосгоны ЭМТ-өөс үзүүлэх дөрвөн төрлийн тусламж, үйлчилгээнд 2024 онд шинээр хэрэгжүүлэхээр төлөвлөж буй хүүхдийн өдрийн эмчилгээг /ханиад томуугийн эмийн багц/, 2.2 тэрбум төгрөгөөр нэмэгдүүлэхээр тооцсон гэв.
Бид ханиадны багцад ямар эм бэлдмэл багтаж буй, хэчнээн хүн багцыг өрхийн эмнэлгээс авсан талаарх мэдээллийг тодруулахаар Баянзүрх дүүргийн 16 дугаар хороонд байрлах ӨЭМТ-д очлоо.
Тус эмнэлгийн зүгээс "Манай эмнэлэгт одоогоор ханиадны багц ирээгүй. тэр багцад ямар эм бэлдмэл багтаж буйг мэдээгүй л байна. Эмнэлгээр ханиадтай хүүхдийн хөл тасрахгүй байгаа бөгөөд ирж үзүүлж буй хүмүүсийн 70 хувь нь ханиадтай. Ханиадны багцын талаарх мэдэгдэл гарснаас хойш сураглан ирэх хүмүүс ч мөн олширч байна" хэмээсэн юм.
Цаашлаад энэ талаарх мэдээллийг ЭМДЕГ-ийн Бодлого төлөвлөлтийн газрын ахлах мэргэжилтэн Б.Янжиндолгороос тодрууллаа.
Тэрбээр "Ханиадны багц гэж байхгүй. ЭМДЕГ-аас тухайн багцыг тараагаагүй. Иргэд болоод хэвлэл мэдээллийн байгууллагууд үүн дээр буруу ойлголттой байна. Та бүхний ханиадны багц гэж нэрлээд буй зүйл нь өрхийн эрүүл мэндийн байгууллагуудын үзүүлж буй өдрийн эмчилгээ, үйлчилгээ юм.
Өдрийн эмчилгээг ихэвчлэн 0-5 хүртэлх насны зорилтот бүлгийн хүүхдүүдэд бичиж өгч эмчилгээнд хамруулж байна.
Учир нь эмч эмчилгээ, эм бичээд өгөхөөр авч чадахгүй хүмүүс олон байдаг. Тэгснээр хүүхдийн өвчлөл хүндэрч эмнэлэгт хэвтэх шаардлагатай болдог. Тиймээс зорилтот бүлгийн хүүхдүүдэд зориулсан өдрийн эмчилгээний тусламж үйлчилгээг гаргасан. Ханиад томуу ихэссэн үед эмнэлгүүдийначаалал эрс нэмэгддэг учир үүнээс сэргийлэх зорилготой" гэв.
М.АГАР
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.