БНСУ-ын жуулчинтай осолдсон монгол шүхэрчин компаниа ганцаараа ажиллуулдаг байжээ

2025 оны зургаадугаар сарын 21-ний өдөр Баянзүрх дүүргийн 11-р хорооны нутаг дэвсгэр, “Ургах Наран” хорооллын хойд талын уулын энгэрт шүхрийн нислэгийн үед ноцтой осол гарч, Монгол болон БНСУ-ын иргэн амиа алдсан харамсалтай хэрэг бүртгэгдсэн.

Хэргийн талаар цагдаагийн ерөнхий газраас "Монгол Улсын иргэн мэргэжлийн шүхэрчин нь БНСУ-ын нэгэн жуулчныг хамт тээвэрлэн, шүхрээр нисэж байхдаа газарт унаж осолдсон бөгөөд хоёулаа газар дээрээ нас барсан" гэж мэдээлсэн.

Мөн одоогоор шалгалтын ажиллагаа явагдаж байгаа учир ослын талаарх мэдээллийг албаныхан өгөх боломжгүй гэдгийг хэлж буй. Тиймд одоогоор осол юунаас болсон талаарх мэдээлэл тодорхойгүй байгаа.

Харин тухайн үед шүхрийн нислэг үйлдэж байсан компанийг нь хайж үзэхэд, “Ургах Наран” хорооллын хойд талын уулын энгэрт үйл ажиллагаа явуулдаг “UB Paragliding” гэх компани гарч ирж байна.

Энэхүү компани нь 2020 оноос эхлэн үйл ажиллагаа явуулж эхэлсэн. 2022 оноос үйл ажиллагаагаа өргөжүүлж олон нийтэд нээлттэй сурталчилгаа явуулж, урьдчилсан захиалга авдаг болжээ.

• Үйлчилгээний хувьд:

“UB Paragliding” нэг мэргэжлийн нисгэгчтэй. Тухайн нисгэгч нь нэг зорчигч тээвэрлэж шүхрээр хөөрдөг. Нисгэгч шүхрээ Баянзүрх уулын энгэрээс хөөргөж, 5-7 минут яваад газарддаг байжээ. Энэ зуурт 2000-3000 хүртэлх метрийн өндөрт гардаг байсан байна.

• Үйлчилүүлэгчийн хувьд:

Тус компани 20-100 кг гэсэн жин зааж, хүүхэд болон томчуудад үйлчилдэг байсан байна. Тарифын хувьд нэг удаагийн нислэг 200 мянган төгрөг. Захиалгаа Shoppy.mn болон өөрийн цахим хуудсаар дамжуулан урьдчилж авдаг байжээ.

Ослоос өмнө тус компани үйл ажиллагаа таван жил хэвийн явуулж байсан бөгөөд хэрэглэгчдийн зүгээс сэтгэл гаргадаг, соёлтой үйлчилгээтэй хэмээн үнэлэгдэж байв.

Харин дээрх харамсалтай ослын дараа тус компани үйл ажиллагаагаа зогсоож, байршлаасаа буусэн байна.

Мөн осолдсон монгол хүний хувьд тус компанийн ганц мэргэжлийн нисгэгч эрэгтэй байж магадгүй байгаа юм.

Энэ мэдээнд өгөх таны үнэлгээ

Хуваалцаарай Жиргээрэй