"Нийгмийн бүх л асуудлын гол зангилааг сурагчдын хичээлийг цахимд шилжүүлэх нэрээр хааж байна"

Боловсролын сайдын тушаалаар томуу, томуу төст өвчний тархалт нэмэгдэж буйтай холбогдуулан нийслэлийн ерөнхий боловсролын сургуулийн бага, дунд ангийн хичээлийг тодорхой хугацаанд цахим хэлбэрт шилжүүлэх шийдвэрийг хоёр хоногийн өмнө гаргасан.

Энэхүү шийдвэрт хувийн болон улсын сургуулийн удирдлага, суралцагчид ямар байр суурьтай байгааг тодруулан хүргэж байна.

Өчигдөр 2025.11.28 Монголын хувийн сургуулиудын холбоо боловсролын яамнаас гаргасан шийдвэрийн эсрэг хариу мэдэгдэл, шаардлагийг хүргүүлжээ.

Ингэхдээ, 1-5 дугаар ангийн сурагчдын танхимын сургалтыг цахим хэлбэрт шилжүүлэх шийдвэртэй холбогдуулан дараах шаардлагыг хүргүүлж байна.

Үүнд:

1. Уг шийдвэр нь ямар нэг урьдчилсан судалгаа, эрсдэлийн үнэлгээ, багш- сургууль-эцэг эхийн оролцоотой зөвшилцөлгүйгээр хэт богино хугацаанд хэрэгжүүлэх байдлаар гарсан нь сурагчдын сурч боловсрох үндсэн эрхэд ноцтой халдаж, хууль зөрчиж байна. Бага ангийн хүүхдүүд танхимын шууд харилцаанд тулгуурласан, насны онцлогт тохирсон сургалтыг зайлшгүй шаарддаг. Гэтэл ийм насны хүүхдүүдийг урьдчилсан бэлтгэлгүйгээр, гэнэтийн байдлаар цахим хэлбэрт шилжүүлэх нь мэдлэг, чадварын хоцрогдлыг эрс нэмэгдүүлж, боловсролын чанарт нөхөж баршгүй хохирол учруулна.
2. Сургууль нь хичээлийн жилийн батлагдсан бүтэц, улирлын шалгалт, эцэг эхийн хурал, арга хэмжээ зэрэг олон талын оролцогчтой нарийн төлөвлөгөөт үйл ажиллагааны циклтэйгээр ажилладаг. Энэ бүхнийг зогсоож, урьдчилсан сануулгагүйгээр шууд цахим хэлбэрт шилжүүлэх нь сургалтын зохион байгуулалтыг бүхэлд нь тасалдуулах, удирдлагын шийдвэр гаргах хугацаа, бэлтгэл хангах боломжийг бүрэн хаах, сургалтын хэвийн үйл ажиллагааг доголдуулах үр дагаврыг үүсгэж байна.
3. Бага насны хүүхдүүд хараа хяналтгүй үлдсэнээр тэдний аюулгүй байдал, сэтгэл зүйн тогтвортой байдалд сөрөг нөлөө үзүүлж, зохисгүй цахим хэрэглээ нэмэгдэх эрсдэл өндөр байна.

Мөн эрүүл мэндийн салбарын ачаалал, бодлогын доголдлыг боловсролын салбарт шилжүүлэн "шийдэл” болгон хэрэглэх нь хүүхдийн эрхийг хохироосон, бодлогын хувьд буруу жишиг юм. Дээрх үндэслэлүүдийн дагуу 1-5-р ангийн танхимын сургалтыг цахим хэлбэрт шилжүүлэх тухай шийдвэрийг яаралтай эргэн харж, сургуулиудын онцлог, өвчлөлийн зэрэг, удирдлагын шийдвэрлэх боломжоос хамааран танхимын сургалтыг хэвийн үргэлжлүүлэх нөхцөл бүрдүүлэх шаардлагатай" гэх мэдээллийг хүргэсэн байна.

Дээрх мэдэгдэлтэй холбогдуулан Монголын хувийн сургуулиудын холбооны тэргүүн Г.Өнөрсайхантай холбогдож, тодруулга мэдээлэл авлаа.

-Сурагчдын хичээл цахимд шилжиж байгаа нь анхны тохиолдол биш шүү дээ. Яагаад боловсролын сайд болон яам руу шаардлага хүргүүлэхээр болсон бэ?

-Шаардлага мэдэгдэлд дурдсанчлан хэд хэдэн асуудлаас болж, энэ удаа мэдэгдэл хүргүүллээ. Үндсэндээ бол улирлын чанартай томуу дэгдэж, жил бүр хүйтний эрч эрс нэмэгдсэн өдрүүдэд эмнэлэг ачааллаа дийлэхгүй, хүүхдүүд ихээр өвдөх тохиолдол гардаг. Гэхдээ халдвар хамгааллын дэглэмээ сайтар сахиад хичээллээд байх боломжтой шүү дээ. Өвдсөн хүүхэд нь эмчилгээгээ хийлгээд цахимд шилжиж, бусад нь танхимаар хичээллээд байж болно. Үндсэндээ бол бид бүгд өвлийн улирлын хүнлдийг мэднэ. Эцэг эх, багш, сурагчидгүй лор бүрнээ хичээгээд байхад заавал цахимд шилжих шаардлагагүй гэж үзэж байна.

Мөн өмнөх удаагийн тохиолдлуудыг санах хэрэгтэй. Нэг дарга гарч ирснээ "Маргааш хамгийн хүйтэн өдөр, хичээлийг цахимд шилжүүллээ. Эмч, багш нар ажил хаячихлаа. Хичээлийг цахимд шилжүүлнэ. Замын түгжрэлийг бууруулах хэрэгтэй. Хичээлийг цахимд шилжүүлнэ" гэж ярьдаг. Энэ бүхэн байж боломгүй зүйл л дээ. Хүүхдийн сурах боловсрох эрх энэ мэт дадал болсон энгийн жишээгээр зөрчигдөж л байна.

-Хичээл гэнэт цахимд шилжих болсныг эсэргүүцэж байгаа сургууль бий юу?

-Ганц, хоёроор тогтохгүй ээ. Ер нь эсэргүүцэж байгаагаа хэлсээр л байна. Олны хэлдгээр улирлын амралт эхлэх дөхсөн учраас багш нарыг үнэлэх шалгалтын ажил эхлэхээс гадна сурагчдын хувийн өсөлт, хөгжлийг тогтоох шалгалтууд эхэлж байгаа. Тийм хариуцлагатай ажил эхлэж байхад цахимд шилжээд байгааг эсэргүүцсээр л байна. Гэнэт ийм шийдвэр гаргахтай холбоотой цахимд шилжих нь бэлэн болоогүй сургууль ч бий. Тэр бүхэнд хүнд дарамт л даа.

Ер нь эцэг эхчүүдээс ч гомдол санал ирнэ. Цахимаас болж хүүхэд дэлгэцийн донтолттой болж байна гэх мэт, гомдол санал нэлээдгүй ирдэг.

Бид хувийн болон улсын сургуулиудын удирдлагуудтай холбогдон дараах тодруулгийг авлаа. Тус сургуулийн удирдлагуудын хүсэлтээр сургуулийн нэрийг нууцлав.

Хувийн сургууль 1

-Цахимд шилжих үед үүсдэг хүндрэлтэй нөхцөл байдлуудын талаар дурдвал?

-Дэлхий даяар тогтоосон хөл хорионы үеэс эхлэн бид цахимжиж эхэлсэн. Хэдий цахимд шилжих тоолондоо заах арга барилаа сайжруулж байгаа хэдий ч угтаа бол цахимд шилжихийг эрс эсэргүүцэж байна. Яагаад гэвэл бага ангийн тэр дундаа нэг болон хоёрдугаар ангийн сурагчид хичээлдээ дасаж, программдаа уусаж эхлэх үд л цахимд шилжүүлж байгаа юм. Мэдээж хэрэг танхимд суралцахаасаа муу үзүүлэлт гаргана. Бид яаж ч чанга хатуу байдлаар цахим хичээлээ хийсэн ч хүүхдүүд танхимаар суралцдаг шигээ өөрсдийгөө шахахгүй.

Хоёрдугаарт улирлын амралтаа урьтаж бид хүүхэд нэг бүрийн түвшин ахилт болон багшийн чадварыг бодьтой үнэлдэг. Үүн дээр ч гэсэн өөрчлөлт үүсэх эрсдэлтэй. Танхимаар суроалцаж байгаад яг хичээлээ ойлгож эхэлсэн хүүхэд цахимаас ойлгохоо больчихвол тэр хүүхдийн ахиц өөрчлөгдөж, цаашлаад багшийн ур чадварт ч нөлөөлнө.

-Томуугийн тархалттай энэ үед таны бодлоор ямар арга хэмжээ авах хэрэгтэй вэ?

-Ковидоос хойш бид халдвар хамгааллын дэглэм барьж сурсан. Ердөө л тэр.

Хувийн сургууль-2

-Хичээл цахимд шилжихтэй холбоотой ямар байр суурьтай байна вэ, энэхүү шийдвэрийг дэмжиж байгаа юу?

-Нэг дэхь өдрөөс эхлээд, шийдвэрийн дагуу цахимаар хичээллэхээр болсон. Одооноос багш нар маань цахим хичээлээ бэлтгэж байна. Нэг үеэ бодвол бид цахимаар хичээллээд сурсан. Гэхдээ онц ноцтой хөл хорионы үеэр л цахимд шилжихийг илүүд үзнэ үү гэхээс биш. Ханиад, томууны тархалт их гэсээр байн байн цахимд шилжээд байж болохгүй. Хүүхдийн хичээл, сурлагад нөлөөлнө. Ер нь бол цөөн үгээр хэлэхэд, нийгмийн бүхий л асуудлын гол зангилааг сурагчдын хичээлийг цахимд шилжүүлэх гэсэн нэрийн доор хааж байгаа.

Улсын сургууль-1, сургалтын менежер

-Хувийн сургуулиудын холбооноос мэдэгдэл гаргаж, шаардлага хүргүүллээ. Цахимаар хичээллэх болсныг хэрхэн хүлээж авч байна вэ. Цахимд бэлэн үү?

-Бүх л хүмүүс хэлэх байх. Бид цахимаар хичээллээд сурчихсан хүмүүс. Улсын сургуулиуд нэн ялангуяа олон тооны хүүхэдтэй ч арга барилаа өөрчилсөөр эвээ олсон гэхэд болно. Гэхдээ дан ганц багш нар болон сургууль гэхгүй, эцэг эхчүүд бидэнтэй хамтрах хэрэгтэй. Сурагчдын хичээл болон хичээл хийж байгаа байдалд анхаарал хандуулах хэрэгтэй. Бага ангийн сурагчдыг олон цагаар суулгаад байж болохгүй. Тэглээ гээд учиргүй хичээл хийлгэхгүй байж болохгүй. Үсгээ үзнэ, холбож уншиж сурна. Гэхдээ үүнийгээ сайн давтах хэрэгтэй. Цахимд шилжсэн үед эцэг эхчүүд урьдынхаасаа илүү анхаарал тавих шаардлагатай.

Энэ мэдээнд өгөх таны үнэлгээ

Хуваалцаарай Жиргээрэй