Н.Учралын танхимд удирдах салбараасаа ангид мэргэжил, ажлын туршлагатай 4 сайд байна

"Үнэнээ хэлье, сайдын 32 шинж төгс бүрдсэн, супер хүмүүс томилоогүй нь үнэн" гэсээр Н.Учрал өөрийн Засгийн газрын танхимынхаа гишүүдийг УИХ-д танилцуулсан. Тэгвэл түүний танхимыг бүрдүүлж байгаа 19 сайдаас:

• Эрх зүйч- 6
• Улс төр судлаач - 2,
• Санхүүгийн чиглэлээр төгссөн - 6,
• Олон улсын харилцаа, бизнесийн удирдлагаар төгссөн- 1,
• Цахилгааны инженер- 1,
• Гадаад хэлний багш- 1,
• Нийгмийн ухааны багш- 1 ,
• Олон улсын сэтгүүлч- 1 байна.

Харин удирдах салбараасаа ангид мэргэжил, ажлын туршлагатай дөрвөн сайд байна.

Н.Учралын Засгийн газрын сайд нар хаана, ямар сургуульд, ямар мэргэжил эзэмшсэн болохыг дараах инфографикаас харах боломжтой

Хэнийг танхимдаа ажиллуулж, сайдаар томилох нь Ерөнхий сайдын бүрэн эрх. Гэхдээ хариуцаж буй салбарынхаа чиглэлээр суралцаагүй, ажилласан туршлагагүй хүмүүсийг сайдаар томиллоо хэмээн Н.Учрал олон нийтээс багагүй шүүмжлэл сонсоод буй юм. Тэгвэл суралцсан, ажилласан байдлаараа одоо удирдах салбараасаа ангид явж ирсэн сайд нарыг нэрлэе.

Э.Батшугар. Эдийн засагч, санхүүч мэргэжилтэй. JPMorgan хөрөнгө оруулалтын банкир, МАХН-ын гадаад харилцаа хариуцсан нарийн бичгийн дарга, Монгол банкны Дэд ерөнхийлөгч, Медиахолдинг ХХК-ийн ТУЗ-ын гишүүн, Монгол Улсын Их Хурлын гишүүн, Цахим хөгжил, инновац, харилцаа холбооны сайдаар ажилласан туршлагатай. Гэхдээ Н.Учралын Засгийн газарт Эрүүл мэндийн сайдаар ажиллахаар болсон. Түүнийг томилогдох үеэр гишүүд багагүй шүүмжилсэн. Хариуд нь Н.Учрал "Сүүлийн гурван Засгийн газарт эмч нар эрүүл мэндийн салбарт ажилласан. Сайжраагүй. Би Э.Батшугарыг мэс засал хий гэж томилоогүй. Энэ салбарын менежер хий гэсэн юм" хэмээн хэлсэн билээ.

Ц.Идэрбат. Гадаад хэлний багш мэргэжилтэй. Гэхдээ энэ мэргэжлээрээ ч ажиллаагүй. 2003 оноос 2021 он хүртэл Хэнтий аймагтаа улс төрийн ажилтан, Засаг даргын орлогч, МАН-ын хорооны дэд дарга хийж сүүлд Засаг даргаар нь ажиллаж байгаад УИХ-ын гишүүн болсон нэгэн. Сая Хүнс хөдөө аж ахуй, хөнгөн үйлдвэрийн сайд болов.

Д.Батлут. Цахилгааны инженер мэргэжилтэй. "Эрдэнэт хивс” ХХК-д туслах ажилтан, “Дэлхийн Зөн Монгол” олон улсын байгууллагад гүйцэтгэх захирал, Орхон аймгийн Газрын харилцаа, барилга хот байгуулалтын газарт мэргэжилтэн, Орхон аймгийн Баян-Өндөр сумын Засаг даргын орлогч, НАМЗХ-ны дарга, Орхон аймгийн МАН-ын дарга, Баян-Өндөр сумын НАШБ-ын дарга, Орхон аймгийн ИТХ-ын төлөөлөгч, тэргүүлэгч, бүлгийн дарга, Орхон аймгийн Засаг дарга бөгөөд Эрдэнэт хотын захирагч хийсэн ажлын туршлагатай. Улмаар 2020, 2024 онд гишүүнээр сонгогдож, Г.Занданшатарын Засгийн газарт Батлан хамгаалахын сайдаар томилогдож, сая Н.Учралын Засгийн газарт улиран томилогдсон билээ.

Ц.Сандаг-Очир. Нийгмийн ухааны багш мэргэжилтэй. Нийслэлийн Багануур дүүргийн Засаг даргын Тамгын газрын 4 дүгээр хорооны нийгмийн ажилтан, хэвлэл мэдээлэл, олон нийттэй харилцах мэргэжилтэн, Нийслэлийн Багануур дүүргийн МАН-ын хорооны дэд дарга, Нийслэлийн Багануур дүүргийн Засаг дарга, дүүргийн МАН-ын хорооны дарга хийж, 2020 оноос УИХ-ын гишүүнээр сонгогдон ажиллаж буй. Эзэмшсэн мэргэжлийнхээ хүрээнд ажиллаж байгаагүй, БОУАӨ-ийн чиглэлд ер ажиллаж байгаагүй нэгэн юм. Түүнд тулгарч буй ойрын сорилт бол манай улсад зохион байгуулагдах COP17 олон улсын хурал юм.

Өөрийн сэтгэгдлээ илэрхийл

Share Tweet