ОУЖБХ-ны Удирдах зөвлөлд Х.Эрдэнэт-Од сонгогджээ
ДАШТ-ээс медаль хүртсэн Монголын анхны эмэгтэй жүдоч, Гавьяат тамирчин Х.Эрдэнэт-Од Олон улсын жүдо бөхийн холбоо (IJF)-ны Удирдах зөвлөлд сонгогджээ.
Уржигдар дууссан Ташкентын “Их дуулга”-ын үеэр ОУЖБХ-ны Удирдах зөвлөл хуралдан, нийт 17 хүнийг сонгосон байна.
Х. Эрдэнэт-Од дэлхийд жүдогийн спортыг хөгжүүлэх зөвлөлд Японы Олимпийн хорооны ерөнхийлөгч, Жүдо бөхийн холбооны тэргүүн Ясухиро Ямашита, Кодокан жүдогийн их сургуулийн тэргүүн Харуки Уимуратай хамт ажиллана.
Монголын жүдогийн түүхэнд анхны тодотгол бүхий олон амжилтын эзэн Х.Эрдэнэт-Од ДАШТ-ээс хүрэл (2005), Азийн АШТ-ээс гурван алт, гурван мөнгө, гурван хүрэл медаль хүртсэн юм.
Өдгөө “Хилчин” спорт хорооны дасгалжуулагчаар ажиллаж буй тэрбээр Хөдөлмөрийн баатар Д.Сумъяа, ОУХМ Б.Хорлоодой зэрэг олон шилдгийн багш нь.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.