Коронавируст халдварын тоо өдөр бүр нэмэгдэж байгаатай холбогдуулан Налайх дүүргийн ЭМТ нь хүүхдийн эмнэлгээ "Ковид-19"-ыг эмчлэн тусгаарлах байр болгож, энэ сарын 14-ний өдөр эхний 40 хүнийг хэвтүүлэн эмчилж эхэлсэн.
Эмчлэн тусгаарлах байранд таван мэргэжилтний бүрэлдэхүүнтэй 1-р ээлжийн эмчилгээний баг 10 хоногийн хугацаанд ажилласан бөгөөд өчигдөр /2021-04-23/ эхний 6 хүнээ эмчлэн эрүүлжүүлж, гэрийн тусгаарлалтад, өрхийн эмчийн хяналтад шилжүүллээ.
Нэгдүгээр ээлжийн эмчилгээний багт Халдвартын их эмч П.Уртнасангаар ахлуулсан, халдвартын тасгийн ахлах сувилагч П.Энх-Од, халдвартын сувилагч Ц.Цэвэлмаа, туслах сувилагч Б.Жайнагүль, асрагч Д.Даваацэцэг нар ажиллалаа. Тэд эмчлэн тусгаарлах байранд 10 хоног ажиллаж, үргэлжлүүлэн 14 хоногийн тусгаарлалт руу шилжиж байна.
Энэ нь "Ковид-19" халдварыг дүүргийн эмнэлгийн онцлогт тохируулан халдвар хамгааллын дэглэмийг мөрдөн эмчилж буй хоёр дахь удаагийн тохиолдол билээ. Халдварыг дүүрэгтээ эмчилж эхэлснээр Улаанбаатар руу чиглэх хөдөлгөөн тэр дундаа ХӨСҮТ-ийн ачааллыг бууруулахад өндөр ач холбогдолтой болжээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.