Өнгөрөгч аравдугаар сард болсон нөхөн сонгуулиар Хэнтий аймгийн Засаг даргаар ажиллаж байсан Ц.Идэрбат УИХ-ын гишүүнээр сонгогдож, парламентад орж ирсэн билээ.
Тэгвэл түүнийг халааг Ц.Чогсомжав авч аймгийн Засаг даргаар томилогдсон байна. Өчигдөр /2021.11.03/ УИХ-ын гишүүн Ц.Идэрбат түүнд тамгыг гардуулан өгчээ.
Аймгийн Засаг даргаар сонгогдсон Ц.Чогсомжав нь Хэнтий аймгийн 31, 32 дахь Засаг дарга нарын орлогчоор ажилласан нэгэн аж.
Тэрбээр тамгаа гардаж авахдаа “Өндөр итгэл хүлээлгэсэн ард иргэд, аймгийн ИТХ-ын төлөөлөгчид, УИХ-ын гишүүд, МУ-ын Ерөнхий сайдад талархал илэрхийлээд, төрийн ажил тасралтгүй үргэлжилж байгаа. Өнөөдөр бид өвөлжилтийн бэлтгэл байдал, 2022 оны төсөв, Ковид-19 цар тахлын нөхцөл байдал, Малын гоц халдварт өвчин гээд цаг үеийн тулгамдсан олон ажлуудтай нүүр тулан ажиллаж байна. Аймгийн Засаг даргаар ажиллаж байсан орон нутгийнхаа жаргал зовлонг сайтар мэдэх УИХ-ын гишүүнтэй боллоо. Ц.Идэрбат гишүүний эхлүүлсэн мөрийн хөтөлбөрийг хэрэгжүүлж, ирэх жилүүдэд нэг баг болж ажиллана” хэмээсэн байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.