Ярих биш харуулж байж хэрэглэгчид та бүхэнд итгэнэ, хиам, махан бүтээгдэхүүн үйлдвэрлэгчид ээ

Эмээлтийн бодис хольсон, өмхий махны асуудал сөхөгдсөнөөр энэ асуудал яг одоо анхаарлын төвд байна. Албаныхан Эмээлтийн махны чиглэлийн аж ахуй нэгжүүдэд эрчимтэй шалгалт хийж, 20 аж ахуй нэгжийн үйл ажиллагааг зогсоогоод байна.

Тэгвэл үүнтэй зэрэгцэн иргэд мах, хиам, хагас боловсруулсан бүтээгдэхүүн худалдаж авах нь эрс багасч, айдастай байгаа юм. Үүний хор уршиг нь мэдээж дотоодын үйлдвэрлэгчдэд хүндээр тусч буй.

Тийм ч учраас өнгөрсөн баасан гарагт Монголын Махны холбооноос мэдээлэл хийж, иргэдийг бүтээгдэхүүнд нь эргэлзэхгүй байхыг хүссэн.

Тухайлбал “Мах маркет” ХХК-ийн гүйцэтгэх захирал Л.Болор "Бид өглөө болгон түүхий эдээс эхлээд, эцсийн бүтээгдэхүүн хүртэл дээж авч, шинжилгээнд оруулдаг. Ингэж эрүүл, эргэлзээгүй бүтээгдэхүүнийг хэрэглэгчдэд нийлүүлдэг. Зөвхөн дотоодод биш гадаадад хүлээн зөвшөөрөгдсөн учир бүтээгдэхүүнээ экспортолдог. Жил бүр гаднаас экспертүүд ирж шалгаж, гэрчилгээний эрхийг сунгадаг. Тиймээс иргэд та бүхэн хиам, махан бүтээгдэхүүнийг идэж болохгүй гэж битгий туйлшраач ээ. Үндэсний үйлдвэрлэлдээ итгэлтэй байгаарай” хэмээсэн юм.

Гэвч хэн нэгний "итгэж болно" гэх үг ард иргэд, хэрэглэгчдэд үнэмшилтэй санагдахаа больж, үнэндээ итгэл алдарчээ. Чихээр сонсож уярч суух биш одоо хэрэглэгчдэд нүдээр хараад итгэх боломжийг мах, махан бүтээгдэхүүн үйлдвэрлэгчид аж ахуй нэгжүүд харуулах хэрэгтэй байна. Өөрөөр хэлбэл үйлдвэрийн процесс, ямар мах ашигладаг, юутай хольж хиам болгож үйлдвэрлэдэг, лаазалсан бүтээгдэхүүндээ юу хольдог гэх мэт бүхий л мэдээллээ хэвлэлийнхэнд нээлттэй болгох хэрэгтэй байна. Ингэж байж иргэд, хэрэглэгчид та бүхний хооронд итгэлцэл үүсэх нөхцөл байдал үүсээд байна.

Энэ мэдээнд өгөх таны үнэлгээ

Хуваалцаарай Жиргээрэй