Хойд Солонгос тагнуулын хиймэл дагуул болон тив алгасах пуужинг хөөргөх туршилтыг хийхээр зэхэж байна хэмээн Өмнөд Солонгосын тагнуулын алба дүгнэжээ.
Учир нь АНУ-Өмнөд Солонгосын цэргийн сургуулилт ба Зэмп-Дэвидэд болох АНУ, Япон болон Өмнөд Солонгосын гурван талт дээд хэмжээний уулзалттай холбоотойгоор уг өдөөн хатгалгыг хийж байгаа хэмээн үзэж буй.
Кэмп-Дэвидийн уулзалт өнөөдөр болно. Харин хамтарсан цэргийн сургуулилт энэ сарын 21-31-ний өдрүүдэд 10 хоног үргэлжлэх билээ.
Өмнөд Солонгосын тагнуулын газрын мэдээлснээр Умард Солонгост тив алгасах пуужинг хөөргөх бэлтгэлийн улмаас автомашинуудын хөдөлгөөн идэвхжиж эхэлсэн хэмээжээ.
Ингэхдээ хөөргөх хугацааг ч тодорхойлжээ. Умардынхан энэ сарын эцэс эсвэл ирэх сарын эхээр тив алгасах пуужин болон хиймэл дагуулыг хөөргөх аж. Тэд БНАСАУ-ын 75 жилийн ойн өдөр ч хөөргөх магадлалтай ажээ. Умардын ойн өдөр нь ирэх сарын буюу есдүгээр сарын 9-нд юм.
Н.АННА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.