63 настай иргэнийг согтуугаар дайрч хөнөөсөн этгээд хуулиараа 1-5 жилийн ялаар шийтгүүлнэ

Гурав хоногийн өмнө буюу энэ оны 11 дүгээр сарын 01-ний өдөр хүнд зэргийн согтолттой жолооч автомашин жолоодож байх үедээ зогсоолд зогсож байсан хоёр автомашиныг мөргөн, явган зорчигчийг дайрч амь насыг нь хохироосон хэрэг гарсан тухай бид мэдээлсэн.

Энэ талаар ЦЕГ-аас “Хан-Уул дүүргийн 10 дугаар хороо Нисэхийн эцэс 230 дугаар цэцэрлэгийн урд замд энэ оны 11 дүгээр сарын 01-ний 17.05 цагт С нь Toyota Prius-30 маркийн автомашиныг жолоодож хөдөлгөөн эхлэх үедээ зогсоолд байсан Toyota Prius маркийн хоёр автомашиныг тус тус мөргөж улмаар явган хүний замаар явж байсан явган зорчигч Б /63 настай, эмэгтэй/-г мөргөж эрүүл мэндэд нь хохирол учруулсан дуудлага мэдээлэл бүртгэгдсэн.

Цагдаагийн байгууллагаас дуудлага мэдээллийн дагуу шалгалтын ажил хийсэн. Улмаар автомашинд мөргүүлсэн хохирогч Б нь 103 түргэн тусламжаар ГССҮТ-д хүргэгдэн хэвтэн эмчлүүлж байгаад нас барсан хэргийг Тээврийн цагдаагийн албаны Мөрдөн шалгах хэлтсээс шалгаж байна.

Ослын шалтгаан нөхцөл: Тoyota Prius маркийн автомашины жолооч С /38нас, эр/ нь архи согтууруулах ундааны зүйл хэрэглэсэн хүнд зэргийн согтолттой үедээ тээврийн хэрэгсэл жолоодон уг осол хэргийг үйлдсэн нь урьдчилсан байдлаар тогтоогдлоо” гэсэн мэдээллийг өгсөн.

Иргэн "Согтуугаар машин жолоодон хүний амь хөнөөсөн энэ залуутай байрныхаа гадна олон удаа таарч байсан. Дийлэнхдээ согтуу, энд тэнд унтчихсан байдаг" гэв.

-47-85 УНМ Улсын дугаартай автомашин 449 мянган төгрөгийн торгуультай, даатгал хийлгээгүй байна-

Бид тухайн жолоочийн унаж хөдөлгөөнд оролцсон 47-85 УНМ Улсын дугаартай Toyota Prius-30 автомашины торгууль төлөлт, даатгалын мэдээллийг шалгаж үзлээ. Ингэхэд нийт 159 мянган төгрөгийн товчооны төлбөр, 290 мянган төгрөгийн торгуультай байна. Тодруулбал,

• 2022 оны 12 сараас хойш 150 удаа товчоогоор нэвтэхдээ 159 мянган төгрөгөөр,
• 2024 оны зургаан сараас өнөөдрийг хүртэлх зургаан удаа нэгдүгээр эгнээгээр зорчин нийт 120 мянган төгрөгөөр
• 2024 оны зургаан сараас өнөөдрийг хүртэл дөрвөн удаагийн зөрчил гарган 70 мянган төгрөгөөр
• 2024 оны найман сард түр зогсох хориотой газар нэг удаа зогсон 20 мянган төгрөгөөр торгуулж, энд харагдаж буй нийт дүн болох 449 мянган төгрөгөө төлөөгүй байна.

Үүнээс гадна тус машинд албан журмын болон тээврийн хэрэгслийн даатгалын аль аль нь хийгдээгүй байна.

Одоогоор согтуугаар машин жолоодож байх үедээ хүний амь насыг хөнөөсөн 38 настай "С"-ийн хэргийн явц, өмнө нь хэрэгт холбогдож байсан эсэх нь анхаарал татаад буй.

Энэ талаар ТЦА-аас тодруулахад "Тус хэрэг цагдаагийн байгууллагад 11 сарын 01-нд бүртгэгдэн, мөрдөн шалгах ажиллагаа хийгдэж буй. Хувь хүний эрх тул өмнө нь хэрэгт холбогдож байсан эсэхийг мэдээлэх боломжгүй байна" хэмээсэн юм.

Эрүүгийн хуульд,

"27.10 дугаар зүйл, Тээврийн хэрэгслийн хөдөлгөөний аюулгүй байдал, ашиглалтын журам зөрчих зүйлд,

2.Энэ гэмт хэргийг:

• 2.1.согтуурсан, мансуурсан үедээ;
• 2.2.тээврийн хэрэгсэл жолоодох эрхгүй хүн;
• 2.3.хүний эрүүл мэндэд хүнд хохирол учруулж үйлдсэн бол тээврийн хэрэгслийг жолоодох эрхийг гурван жилээс дээш таван жил хүртэл хугацаагаар хасаж нэг жилээс гурван жил хүртэл хугацаагаар зорчих эрхийг хязгаарлах, эсхүл нэг жилээс гурван жил хүртэл хугацаагаар хорих ял шийтгэнэ.

3.Энэ гэмт хэргийн улмаас хүний амь нас хохирсон бол тээврийн хэрэгслийг жолоодох эрхийг таван жилээс дээш найман жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ" хэмээсэн байна.

З.УЧРАЛ

Энэ мэдээнд өгөх таны үнэлгээ

Хуваалцаарай Жиргээрэй