₮1.5 тэрбумыг хил дамнуулан угааж, зочид буудал болгосон Ж.Гарьд 9 жилийн дараа торгох ял л сонсов

УБТЗ-ын дарга Д.Жигжиднямаа агсны хүү Ж.Гарьд аавыгаа амьд байхад буюу 2017 онд хамтран үйлдсэн мөнгө угаах хэрэг нь есөн жилийн дараа шийдэгдэж, Хан-Уул дүүргээс гарахгүй, улсад хоёр тэрбум төгрөг төлөхөөр яллагдав.

Холбогдсон хэргийг тодруулбал, Ж.Гарьдыг “Скай профешнл ложистик” ХХК-иараа дамжуулан 2017 оны долоодугаар сард “Улаанбаатар төмөр зам”-аар олон улсын болон орон нутгийн харилцаанд тээшний вагон тээвэрлэх, хамтран ажиллах гэрээг нийтийн албан тушаалтан буюу аав Д.Жигжиднямаатайгаа байгуулж давуу байдал олж авсан.

Уг гэмт хэргийн улмаас бий болсон хөрөнгө, орлого болох 600,000 ам.долларыг Арабын Нэгдсэн Эмират Улсын нийслэл Дубай хотод байгуулсан “Ансу трейдинглимитед” компанийнхаа данс руу шилжүүлж, түүнийгээ буцаан “Жи ар ди реалти” ХХК-ийнхаа дансаар Монгол буцаан оруулж ирсэн. Түүгээрээ Баянгол дүүргийн 17 дугаар хорооны нутаг, Амарсанаагийн гудамж дахь 1495 ам метр талбай бүхий үйлчилгээний зориулалттай объект, газар буюу "Сити" зочид буудлын зургаан давхар барилгыг худалдан авч мөнгө угаасан хэрэгт холбогдсон байдаг.

Ж.Гарьдад холбогдох Эрүүгийн хуулийн 22.1_1, 18.6_1-р зүйл заалтад хамаарах Эрх мэдэл, албан тушаалын байдлаа урвуулан ашиглах, Мөнгө угаах хэргийн шүүх хурал сүүлийн хоёр жил хэд хэдэн удаа товлогдсон ч хойшилж шийдвэрлэгдсээр байв. Улмаар |2025-11-03|-ны өдөр анхан шатны шүүхээс шийдвэр гарсан нь Ж.Гарьдын угаасан гэх $600,000-т шинжээч томилоогүй учир хэргийг прокурорт буцаах байсан.

Тус хэрэг прокурор дээр дахин хянагдаж анхан шатны шүүхэд |2026.01.02|-нд хэлэлцэж, нийтийн албанд ажиллах эрхийг хоёр жилийн хугацаагаар хасаж, нэг жил зургаан сарын хугацаагаар зорчих эрхийг хязгаарлах ял оноож, улсад учруулсан 1.5 тэрбум төгрөгийг гаргуулж улсын орлого болгохоор шийдсэн. Гэтэл тэрбээр уг шийдвэрийг эс зөвшөөрч давж заалдах шатны шүүхэд хандсан юм.

Улмаар Ж.Гарьдын гомдлоорх давж заалдах шатны шүүх |2026.03.24|-ний өдөр хуралдаж дараах шийдвэрийг гаргасан байна.

Ингэхдээ нийтийн албанд ажиллах эрхийг хоёр жилийн хугацаагаар хасаж, нэг жил зургаан сарын хугацаагаар зорчих эрхийг хязгаарлах ялыг хэвээр нь үлдээсэн. Харин гэмт хэргийн улмаас улсад хохирсон мөнгөн дүн ₮1.5 тэрбум бус ₮2 тэрбумыг гаргуулж улсын орлого болгохоор шийдсэн байна.

Тухайн шийдвэрийг Нийслэлийн эрүүгийн хэргийн давж заалдах шатны шүүхийн шүүгч С.Болортуяа гаргасан юм. Шүүх хуралдаанд Ж.Гарьдаас гадна түүний өмгөөлөгч Н.Нарантуяа, А.Энхтүвшин Прокурор З.Хүслэн оролцсон байна.

Холбогдсон хэргийн зүйл анги- яллах заалт

22.1.1 Эрх мэдэл, албан тушаалын байдлаа урвуулан ашиглах

Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, эсхүл зориуд хэрэгжүүлэхгүй байж өөртөө, эсхүл бусдад давуу байдал бий болгосон бол нийтийн албанд ажиллах эрхийг хоёр жилээс таван жил хүртэл хугацаагаар хасаж нэг жилээс таван жил хүртэл хугацаагаар зорчих эрхийг хязгаарлах, эсхүл нэг жилээс таван жил хүртэл хугацаагаар хорих ял шийтгэнэ.

18.6.1 Мөнгө угаах

Гэмт хэргийн улмаас олсон хөрөнгө, мөнгө, орлого гэдгийг мэдсээр байж түүнийг авсан, эзэмшсэн, ашигласан; түүний хууль бус эх үүсвэрийг нь нуун далдлах, гэмт хэрэг үйлдэхэд оролцсон аливаа этгээдэд хуулийн хариуцлагаас зайлсхийхэд туслах зорилгоор өөрчилсөн, шилжүүлсэн; түүний бодит шинж чанар, эх үүсвэр, байршил, захиран зарцуулах арга, эзэмшигч, эд хөрөнгийн эрхийг нуун далдалсан бол зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ.

О.ОНОН

Өөрийн сэтгэгдлээ илэрхийл

Share Tweet