Ерөнхий сайдын онцолсон "Нүүрс зөөдөг бүлэг этгээдүүд"-д ЯМАР ГИШҮҮД багтав

Ерөнхий сайд Л.Оюун-Эрдэнэ мэдээлэл хийх үеэрээ “Нүүрсний бизнесээс мөнгө завшдаг бүлэглэл бий бөгөөд нөлөө бүхий гишүүд байгаагийн нэг нь А.Адъяасүрэн. Сүүлийн 17-20 жилийн хугацаанд нүүрс зарахдаа тонн тутамд 60-70 орчим ам.долларыг завшиж байсан бүлгийг илрүүлэх ажлын хэсэг байгуулагдсан” хэмээн зарласан.

Түүнийг мэдээлэл хийснээс хойш тухайн бүлэглэлд ЯМАР гишүүд багтсан бэ гэдэг таамаг хөвөрч эхлээд байгаа юм. Тэдгээр гишүүдийн дунд Ерөнхий сайд, Байнгын хорооны дарга зэрэг албан тушаал хашиж буй болон хашиж байсан хүмүүс багтсан гэх мэдээлэл цацагдаад байгаа юм.

-ХЭН ХЭН БАГТАВ-

Тэгвэл бидэнд олдсон мэдээллээр:

А.Адъяасүрэн: Ерөнхий сайдын ил цагаан нэрлэснээр тэр хамгийн эхэнд багтана. Эл гишүүний нэр С зөвшөөрлийн авлигын асуудалтай хамгийн түрүүнд нэр холбогдоно. Тэрбээр нүүрс тээврийн "С" зөвшөөрөл авахаар бусдад авлига өгсөн байж болзошгүй гэх хэрэгт холбогдон шалгагддаг ч, өдгөө таг чиг. 100 мянган ам.долларын авлига өгсөн гэх хэргээр яллагдагчаар татагдан шалгасан. Уг хахуулийг БНХАУ-ын иргэнтэй хамтран эзэмшдэг “Сан тээвэр групп”, “Тэнгри транс групп”, “Ульгансар транс” ХХК-д нийт 680 автомашины улс хоорондын ачаа тээврийн С зөвшөөрлийн асуудлыг шийдвэрлүүлэхээр өгсөн гэгддэг. Авлигын хэрэг 2020 оны гуравдугаар сард гарсан бөгөөд тухайн үед А.Адъяасүрэн нь Ерөнхийлөгчийн орон тооны бус зөвлөх гэсэн статустай байсан.

Ч.Ундрам: Тэрбээр нүүрсний компанийн эзний охин буюу “Өсөх зоос” компанийн Ч.Чинбатын охин. Түүний аав нүүрсний бизнес эрхэлсээр асар удаж байгаа. Гурван тэсийн нүүрсний талбайгаа шүүхдэлцэж байгаад МАК-иас авсан бөгөөд Өмнөговь аймгийн Гурван тэс суманд Өсөх зоос компаниараа дамжуулж жилдээ олон сая тонн нүүрс урагшаа зөөдөг. Ардчилсан Залуучуудын Холбооны дэд Тэргүүн байсан охиноо намаас нь гаргаж, эрх баригч МАН-д элсүүлж, НАМЭХ-ны дэд Ерөнхийлөгч болгосон бөгөөд Ерөнхий сайд У.Хүрэлсүхтэй ойртуулж, МАН-аас УИХ-д нэр дэвшүүлж гаргааж ирсэн гэх хэл аманд орооцолдож байв. Ямартай ч энэ удаад ааваасаа болж нүүрсний бүлэглэлийн дотор нэр нь багтах нь ээ.

Д.Бат-Эрдэнэ: Олны хэлж заншсанаар “ажнай”. Эл гишүүний тухай УИХ-ын дарга Г.Занданшатар аль 2018 онд нүүрс хулгайлдаг байж болзошгүй гэж зарлаж байсан. “Тавантолгой”-н тээвэрлэгч компани болох “Тавантолгой транс” гэх компани “Эрдэнэс Тавантолгой”-н газраас хил давуулан 60 тэрбумын нүүрс олборлосон нь түүнд хамаардаг. “Тавантолгой транс” компанийн 70 хувийг тухайн үед Д.Бат-Эрдэнэ гишүүн эзэмшиж байв.

Г.Дамдинням, Х.Ганхуяг: Тэдний эрх ашиг “Вертекс майнинг партнер” ХХК дээр нэгддэг. Тус компанийн үндсэн хувьцаа эзэмшигчээр УИХ-ын гишүүн Г.Дамдинням бүртгэлтэй. Харин Гүйцэтгэх захирлаар нь УИХ-ын гишүүн Х.Ганхуягийн дүү Хассуурийн Хашчимэг ажилладаг. Тус компанийн үйл ажиллагааны нэг чиглэлд уул уурхай багтсан нь анхаарал татдаг.

Тэд нүүрснээс 60-70 ам. долларыг хэрхэн завшдаг вэ. Тавантолгойн нүүрс уурхайдаа бол 60 ам.доллар, хилийн цаана очихдоо 120-180 болчихдог. Энэ дундах 60-70 ам.долларын зөрүүг завшдаг бүхэл бүтэн бүлэглэл байна. "Эрдэнэс Монгол" тэргүүтэй нүүрсний төрийн өмчит компаниудаар дамжин бүх процесс өрнөдөг.

-БНХАУ РУУ НҮҮРС ТЭЭВЭРЛЭХ С ЗӨВШӨӨРЛИЙГ ЯМАР КОМПАНИУД ЭЗЭМШИЖ БАЙНА ВЭ-

Нүүрснээс мөнгө завшихын тулд нүүрс тээвэрлэх хэрэгтэй болно. Ингэж тээвэрлэхийн тулд мэдээж хятад руу хил дамнуулан гаргах С зөвшөөрөл хэрэгтэй. Авто тээврийн үндэсний төв олгодог.

БНХАУ талаас С зөвшөөрлийг 6000 болгосон. Ингэснээр хязгаарлагдмал тоотой С зөвшөөрөл олж авах гэсэн компаниудын өрсөлдөөн ширүүсэж, авлига цэцэглэх үндэс, гэмт хэргийн том сэдэл болсон. Угтаа С зөвшөөрөл авахад улсаас тогтоосон үндсэн төлбөр гэж бий. Тэр нь 99,000 төгрөг. Гэхдээ үүнийг хэн бүр аваад байх боломжгүй. АТҮТ-ийнхан С зөвшөөрлийг хөшигний ард наймаалцдаг. Жинхэнэ өндөр мөнгөн дүнтэй авлига өрнөдөг.

2018 онд нэг С 2500 юань, 2019 онд 5000 юань, 2020 онд 8000-10.000 юань байсан бол 2021 онд авлигын ханш огцом өсч 15,000-30,000 юань болжээ. Өөрөөр хэлбэл, нэг С зөвшөөрөл авахад монгол мөнгөөр 12,000,000 төгрөг байв.

Тэгэхээр нүүрсний бүлэглэлүүдийг ярихын тулд одоогоор ямар компаниуд С зөвшөөрөлтэй вэ гэдэг нь зүй ёсоор анхаарал татах асуудал.

Өнөөдрийн байдлаар 143 компани 4836 автомашины зөвшөөрөл эзэмшиж байна.

Энэ мэдээнд өгөх таны үнэлгээ

Хуваалцаарай Жиргээрэй