Хагарсан, хагаралдаагүй хоёр "сүр данзан"

Гурван аравны зөрүү

Найман жил төрийн эрх барихаар УИХ-ын хоёр удаагийн сонгууль, Төрийн тэргүүний сунгаанд ялалт байгуулсан МАН. Энэ нам дотор үе солигдох процесс явагдаж байгаа гэдэг нь тэнэг хүнд ч илхэн л харагдаж буй. Угаас энэ намын түүх нь юм. Залуус нь түрж гарч ирээд, ах нараа явуулдаг.

Энгийн логикоор бодоход ч тэр, явж буй ах нар нь дүү нараа барьж авч үнсээд л "Заа, эрх мэдлээ сайхан хэрэгжүүлээрэй" гэж ерөөгөөд, дуу дуулаад гараад алхчихгүй. Тэд өөрийн карейрийн нэгэн хэсгээ дүү нартаа хүчээр л өгч, эл үе солигдох процесст чанагдаж оддог.

Бүлэг, фракциуд ч хүчээ саарахаар "Цаст уулын цагаан барс цагаа болохоор шоргоолжид бариулах"-ын үлгэрээр намаасаа хэрчүүлдэг жамтай.

Тийн МАН доторх тогтсон хэлбэршил эдүгээд У.Хүрэлсүх, Л.Оюун-Эрдэнэ нарын дунд өрнөж байна. Тэдний насны зөрүү 22 бөгөөд үечлэлээрээ 60, 70 оныхноор цэвэр зааглагдаж, 80 он руу орно. Бүдүүлэг дүнгээр бол бараг л гурван арван тэднийг зааглаж, дунд нь 70 оныхон пээдийн зогсчээ.

Хоёул худалч, хоёул эх оронч

Манай "Роомоо" гаригаас ирсэн хэт мөрөөдлийн хауст амьдрагч Ерөнхий сайд Л.Оюун-Эрдэнэ өчигдөр "МАН дотор үе солигдож байгаа. У.Хүрэлсүх, Л.Оюун-Эрдэнэ нар муудалцсан гэж хэвлэлийнхэн их бичиж байгаа. Тэдний хүслээр болохгүй байх аа" гэж ярив.

Үнэндээ урд орой нь л гэхэд тамхины цэгийн мэдээгээр тэр У.Хүрэлсүхээр "Та нар УИХ-аа тарааж, шинэ сонгуулийн дараах үр дүнгээр Засгийн газраа шинээр эмхлэн байгуул. Нүүрсний хулгайч илрүүлэх ажил тань намын нөхөд рүү орохгүй байна. Нэг мөр үүнийгээ ажил болгохгүй бол би өөрөө санаачлагыг гартаа авна" гэх агуулгаар навс загнуулсан байв.

Тийн атлаа Л.Оюун-Эрдэнэ "Ерөнхийлөгч тийм шахалт үзүүлээгүй" гэв. Мэдээллийн хурлаас өмнөхөн Ерөнхийлөгчийн хүмүүс хэвлэлүүд рүү ярьж, "Ерөнхийлөгч УИХ тарахгүй бол засагтай үзэлцэнэ" гэдэг мессижээ хэдийнэ хүргэсэн байв.

Хөгтэй ч хоёр бол доо. Үнэндээ нийтийн дэмжлэг авах жагсаалд тэд анхандаа дуртай хандацгаасан. Нэгт, нүүрсний асуудалд Засгийн газар нийтийн дэмжлэг авах хүсэлтэй. Хоёрт, тэдний булаацалдаж буй МАН-ын генсекийн суудлыг Бага хурлаар шийдэх гэж байсан ч эцэслэн тохирч чадаагүй байсан үе. Утгачилбал, жагсах үймэх нь тэдний хэн хэнд хэрэгтэй байсан агаад ордонд жагсагчдыг нэвтрүүлэх дүр зургийг эртнээс тооцсон байсан гэгдэж буй.

Тийн атлаа жагсаалын пянгаа хэн хэн нь даасангүй. Нийтийн уур амьсгалаас хоёулаа айв. Айсан учраас дараалан, айхтар эх оронч мэдэгдлүүд хийв. Гэвч хоёулаа худлаа ярив. Тэднийг үнэндээ хэвлэлүүд муудалцуулсан биш. Өөрсдөө л дотооддоо уралцаж буй.

Хагарсан, хагаралдаагүй хоёр цаашдаа хэрхэх вэ

Үнэндээ У.Хүрэлсүх шиг өнгөрсөн хугацаанд нүүрсчидтэй нийлэлдэн хоршин давхисан хүн байхгүй. Б.Ганхуягийг зөвхөн Эрдэнэт хотод Ерөнхийлөгчийн сонгуулиар нүүрсний хичнээн төгрөг аваачиж, тараасан гэж бодно. Маш их шүү. Голомтын Б.Баясгалан У.Хүрэлсүхийн эхнэртэй нэг анги, тэд гэр бүлийн найзууд гээд л цааш үргэлжилнэ. Тийн атлаа манай, танай нам ялгахгүй нүүрсчидтэй тэмц гэж ил шоудав.

Л.Оюун-Эрдэнийн хувьд жагсаалаас "Энэ бүх асуудал ерөөсөө л тогтолцооны гажуудлаас үүссэн" гэх нийтийн түрлэг барьж аваад, ҮХНӨ-ийг явуулах ашигтай бланс дээр буужээ. Төрийн гурван өндөрлөгийн хүрээнд 2023 онд УИХ-ын сонгуулийг ээлжит бусаар зарлах агуулга дээр тохирсон харагдав. Гэхдээ ингэснээрээ тэд найрамдчихсан юм биш.

Ирэх өдрүүдэд У.Хүрэлсүх, Л.Оюун-Эрдэнэ нарын дунд УИХ-ын сонгуулийн мандатаа ямар харьцаагаар хуваан авах уу гэдэг том дайн үүснэ.

Цаашлаад АН-аас У.Хүрэлсүх шуудхан С.Баярцогтыг дэмжчихвэл нөгөөх нь гөжүүдэлж зогсохоо л бодох юм. Энэ мэтээр МАН доторх үе солигдох процесс мандат хуваарилалт, шинээр бүрдэх Засгийн газрын бүрэлдэхүүн зэрэгт тэд ихээхэн өрсөлдөөн үүсгэх нь тодорхой харагдаж буй.

Хэсэгхэн харахад л, Хэнтийн хоёр сүртэй даргыг хэвлэлээс болж муудаагүй. Хамгийн эвтэй байж болох байсан ч эрх мэдлийн төлөөх тэмцэл тэднийг гүн хагалсаар буйг анзаарчхаж болно. Тэр цаг хугацаа одоо ч өрнөж буй. Хагарсан, хагаралдаагүй хоёр баатар яахав, гэхдээ. Хамгийн чухал нь, тэд нийтийн эрх ашиг дээр хэрхэн тоглохыг л анзаараарай.

Энэ мэдээнд өгөх таны үнэлгээ

Хуваалцаарай Жиргээрэй