Ерөнхий сайдад хариу захидал бичсэн З.Ноёлог: Би инженер болно гэж боддог ч сургуулиудад хими, физикийн лаборатори алга

Ерөнхий сайд Г.Занданшатар энэ хичээлийн жилд 1-12 дугаар ангид элсэн суралцаж буй сурагчдад эрдэм ном сурах үйлсэд нь урам зориг, эрч хүч өгөхөөр 12 төрлийн захидал бичиж, хүргүүлсэн билээ. Харин түүний захидлыг хэдэнтээ уншсаныхаа дараа Нийслэлийн ерөнхий боловсролын 84-р сургуулийн VII ангийн сурагч З.Ноёлог хариу захиа бичсэн байна. Тэрбээр Г.Занданшатар сайдад хаягласан захиандаа өөрийн сурч, амьдарч байгаа орчинд нь тулгарч буй асуудлуудаа хөндөж, шийдвэрлэж өгөхийг хүссэн байв. Иймд бид Ерөнхий сайдад захиа дайсан 12 настай хүүтэй ярилцлаа.

-Ерөнхий сайд намайг сайн сураарай гэж захисан. Би хичээнэ ээ. Харин миний захиандаа дурдсан хүсэлтүүдийг биелүүлж өгөөрэй-

-Ярилцлагын эхэнд манай уншигчдад өөрийгөө дэлгэрэнгүй танилцуулахгүй юу?

-Би ирэх 11 сард 13 нас хүрнэ. Зургаан ам бүлтэй айлын дунд хүү. Аав, ээж, ах, хоёр дүүгийн хамт амьдардаг. Айлын дунд хүү байна гэдэг сонин, бас гоё байдаг. Гэр бүлтэйгээ гадаадаар аялсан нь хамгийн сайхан дурсамж болсон. Бас олон гоё дэлгүүрээр хэсэж, дуртай зүйлсээ авсан.

MongolZ гэж багийг та мэдэх үү. Би тэр багийн тоглолтуудыг үзэх маш их дуртай. Тэр дундаа Mzino ахыг дэмждэг, уулзаж үзэхийг хүсдэг дээ. CS2 тоглоомыг тоглох сонирхолтой. Сүүлийн 2-3 жил тоглож байгаа.

Одоогоор Монгол хэл, Уран зохиол, Физикийн хичээлдээ сонирхолтой. Том болоод инженер юм уу прокурор болно гэж бодож байгаа. Үнэнийг хэлэхэд яг одоогийн байдлаар тийм ч сайн сурахгүй л байгаа. Хичээлийн дүн 70-80 буюу дундаж. Гэхдээ энэ жилээс эхлэн хичээлдээ шамдан суралцаж мөрөөдлөө биелүүлэхээр шийдсэн.

-Ерөнхий сайдаас захиа хүлээн авахад хамгийн түрүүнд ямар сэтгэгдэл төрөв. Яагаад хариу захиа бичье гэж бодов?

-Би хэзээ ч том даргаас захиа авч байгаагүй. Сайдын илгээсэн "Эрхэм дүүдээ" захиаг бараг таван удаа уншсан л даа. Бидэнд хандаж захиа илгээсэн болохоор хариу бичих нь наад захын соёл хэмээн бодож хариу илгээхээр шийдсэн.

-Чиний бодлоор Ерөнхий сайд гэж ямар хүн бэ?

-Ерөнхий сайд бол Монгол Улсын хэмжээнд томоохон байр суурь эзлэх, эрх мэдэлтэй хүн шүү дээ. Хүүхэд бүрийн хүслийг биелүүлдэг өвлийн өвөө биш ч гэлээ. Гэхдээ зөв зүйлд уриалсан байвал олж харж, шийдвэр гаргаж чадах хүн гэж боддог.

-Сайдад хариу захиа бичсэн хүүхэд өөр байгаа болов уу?

-Улсын хэмжээнд хичээлд суралцаж байгаа олон мянган хүүхдэд тэрхүү захиа очсон шүү дээ. Би ганцаараа хариу бичээгүй байх. Сошиал сүлжээнд захиагаа нийтэлсэн болохоор л онцгой санагдаж байж мэднэ. Гэхдээ олон зөв асуудлыг хөндөж, Ерөнхий сайдад хаягласан захианууд байгаа байх.

Миний захиаг гэр бүлийнхэн болон ангийн найзууд, анги удирдсан багш гээд бүгд л олж уншсан байсан. "Яаж ийм санаа төрөв өө, чамд" гэж ангийнхан маань асууж байна лээ. Хариуд нь би "Захианд хариу бичих чинь соёл шүү дээ, зүгээр л бичсэн юм" гэсэн дээ.

-Их нямбай бичсэн харагдсан. Хэдэн удаа бичсэн бэ?

-Дөрвөн удаа бичсэн. Утгын болон үгийн алдаа гаргаад байсан болохоор дахин дахин бичээд л байсан.

-Захиагаа дугтуйд хийгээд шууданд дайж болно шүү дээ. Яагаад сошиалд байршуулах сонголтыг хийв?

-Шууданд дайх бодол байсан. Гэхдээ надаас өөр олон хүмүүс сайдад хандаж захиа илгээдэг байх. Тэр олон захиагаа уншиж, хариу илгээх гэсээр уддаг ч байж мэднэ шүү дээ. Тиймээс сошиалд байршуулчихвал сайд хурдан харах байх гэж бодсон минь тэр. Тэгээд л өөрийнхөө facebook хаягтаа захиагаа нийтэлсэн.

-Ерөнхий сайд миний захиаг уншчихсан л байх-

-Сагсны талбайн хүрэлцээ, сургуулийн лаборатори, анги дүүргэлтийн талаар захиандаа дурдсан байсан шүү дээ. Энэ талаар дэлгэрэнгүй ярихгүй юу?

-Хотод амьдардаг миний үеийн хүүхдүүдэд чөлөөт цагаа үр бүтээлтэй өнгөрүүлэх газар тэр бүр байдаггүй. Гараад тоглох гэхэд цөөн тооны сагсны талбайтай. Бөмбөгөө аваад тоглохоор очвол заримдаа шийдний цагираг хугарч, гэмтсэн байдаг л даа. Тэгж явсаар нэг гайгүй талбай олоод тоглох гэхэд ах нар дээрэлхээд явуулчихдаг. Энэ байдлаас шалтгаалан интернэт тоглоомын газарт чөлөөт цагаа өнгөрүүлэхээс өөр аргагүй болдог. Хэрэв тоглох талбай хүрэлцээтэй бол бид интернэт тоглоомын газарт хүүхэд насаа өнгөрүүлэхгүй шүү дээ. Мөн компьютер тоглолоо гэж эцэг, эхчүүд ч бухимдахаа болих байх.

Харин сургуулиудын лаборатори бол тулгамдаж байгаа асуудлуудын нэг мөн. Төрөлжсөн хичээлүүд дээр туршилт хийж байж л тэр агуулгаа сайн ойлгож үлдэнэ шүү дээ. Гэтэл сургуулиудад хими, физикийн лаборатори анги тэр бүр байхгүй. Тоног төхөөрөмж, бодисууд нь хүрэлцээгүй байдаг.

Мөн олон хүүхэдтэй нэг ангид суух асуудал. Манай анги 44 хүүхэдтэй. Жижигхэн талбайтай ангид олуулаа суухад бүгчим, чимээ шуугиантай. Гэхдээ томчуудын хэлснээр 44 сурагч нэг ангид байгаа нь бага тоо гэж хэлсэн. Зарим сургуулиуд бүр 60-70 хүүхэд нэг ангид хичээллэдэг гэсэн. Тиймээс энэ асуудлыг заавал шийдэх хэрэгтэй байх.

Би Ерөнхий сайдыг дэргэдээс нь харж байгаагүй л дээ. Зурагтаар л харж байсан. Нүдний шилтэй л хүн байсан. Миний захиаг бараг олоод уншчихсан л байх. Захианд дурдсан дээрх хүсэлтүүдийг минь биелүүлж өгнө гэдэгт итгэж байгаа.

-Ерөнхий сайдад, сургуулийн удирдлагад, бас томчуудад хэлэх нь-

-Өмнө нь захиа авч, хариу бичиж байсан уу?

-Хоёр удаа захиа авч байсан юм байна. Бага ангийн багшаасаа нэг удаа, нөгөө нь ээжээсээ. Одоо санахад ээжид захианых нь хариуг өгсөн ч багшдаа бол явуулаагүй орхижээ. Уг нь багш минь намайг өвдөөд чөлөө авчихсан гэртээ байхад "Бие нь сайн уу, хурдан эдгээд хичээлдээ ирээрэй" гэсэн байсан. Харин ээжийн зүгээс "Хайрт хүүдээ сурлагын амжилт хүсье. Сайн хүү шүү" гэх утгатай захиа өгч байсан юм.

-Ерөнхий сайдад хэлж амжаагүй үлдээсэн зүйл байна уу?

-Би хичээлдээ дугуйгаа унаад ирдэг. Дугуйн зам байхгүй тул дийлэнхдээ явган хүний замаар явах болдог. Гэтэл "явган хүний замаар дугуйтай явлаа" гэж том хүмүүс загнадаг. Хүмүүст саад болохыг ерөөсөө хүсээгүй. Гэхдээ автомашины замаар явах нь илүү аюултай болохоор загнуулаад ч хамаагүй явган хүний замаар явж, сургуульдаа ирдэг. Тиймээс дугуйн замтай болгож өгөөсэй.

-Сургуулийн удирдлага болон томчуудад хандаж хэлэх үг бий юу?

-Сургуулийн орчинд гэвэл ариун цэврийн өрөөний тохижилтын асуудал байна. Хаалгагүй, суултуур нь бохир байдаг болохоор бие засах бүрд таагүй мэдрэмж төрдөг. Үүнийг засаж сайжруулаасай гэж боддог.

Харин томчуудад хандаж хэлэхэд сургууль орчмын гарцыг хааж автомашинаа байрлуулахаа болих хэрэгтэй. Ганцаараа л хүүхдээ авахаар ирж байгаа юм шиг бусдын явах замыг хааж болохгүй шүү дээ. Нэгдүгээр эгнээ, гарц дээр автомашинаа байрлуулсантай холбоотойгоор эцэг эхчүүд сургууль руу орж хүүхдээ авч чадахгүйд хүрдэг. Багш нарт нь оройтлоо гэж загнуулдаг. Тиймээс бусдад саад болохгүй, сургуулийн орчинд соёлтой байхыг томчуудаасаа хүсэж байна.

Энэ мэдээнд өгөх таны үнэлгээ

Хуваалцаарай Жиргээрэй