Ялгаа: Л.Оюун-Эрдэнийн зөвлөлд бизнесменүүд, Г.Занданшатарын зөвлөлд гишүүд, эрдэмтэд

Л.Оюун-Эрдэнэ Ерөнхий сайд байхдаа "Эдийн засгийн бодлогын зөвлөл" гээчийг байгуулан тэргүүлж, Монголын хамгийн том бизнесмэнүүдийг багтаасан. Тухайлбал, Шунхлай группийн ерөнхийлөгч П.Батсайхан, MCS группийн ТУЗ-ийн дарга Ж.Оджаргал, МАК-ийн Ерөнхийлөгч Н.Цэлмүүн, Таванбогд группийн ерөнхийлөгч Ц.Баатарсайхан, "Ньюком" группын Ерөнхий захирал Б.Баатармөнх зэрэг томчууд багтсан байдаг. Мөн Засгийн газрын сайд, агентлагийн зарим дарга нар, хөрөнгийн биржийн захирал зэрэг хүмүүс багтсан. Тэд, эдийн засгийн бодлогын чиглэлээр мэргэжлийн судалгаа, шинжилгээ хийж, санал, зөвлөмж гарган Ерөнхий сайд, Засгийн газрын үйл ажиллагаанд мэргэжлийн туслалцаа, дэмжлэг үзүүлж, цаг үеэ олсон зөвлөмж, арга зүй, мэдээллээр хангана.

Харин Г.Занданшатар захирамж гаргаж, дэргэдээ “Хөгжлийн бодлогын зөвлөл” гээчийг байгуулжээ. Уг зөвлөл нь 37 хүний бүрэлдэхүүнтэй бөгөөд шинжлэх ухааны салбарын тэргүүлэх 20 гаруй эрдэмтэн, судлаач, экспертүүдээс бүрдсэн байна. Мөн Парламентын 14 гишүүнийг багтаасан аж. С.Цэнгүүн, Г.Лувсанжамц, С.Эрдэнэболд, Ж.Галбадрах, Б.Бат-Эрдэнэ, Ч.Анар, Б.Заяабал, Б.Хэрлэн, Д.Рэгдэл, Ж.Баярмаа, С.Зулпхар, Б.Пунсалмаа, Ж.Золжаргал, Л.Соронзонболд нар. Тэд, ирэх таван жилийн үндсэн чиглэлд туссан зорилтуудыг хувийн хэвшлийн оролцоо, хөрөнгө оруулалттай нийцүүлэн хэрэгжүүлэх оновчтой стратеги, шийдлийг боловсруулах зорилготой. Эдийн засаг, нийгмийн хөгжил, техник технологийн инноваци, байгаль орчин, хот байгуулалт, гэр бүл, залуучууд гэсэн чиглэлүүдээр шийдэл санал болгоно.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй