ЕТГ-д ажиллаж байсан Д.Бум-Очир Ерөнхийлөгчийн сонгуулийн санал авах хугацааг "өөрчлүүлнэ"

УИХ-ын гишүүн Д.Бум-очир тэргүүтэй Ч.Анар, Ж.Баярмаа, Ж.Золжаргал нар Монгол Улсын Ерөнхийлөгчийн сонгуулийн тухай хуульд нэмэлт, өөрчлөлт оруулах тухай хуулийн төслийг өргөн барив.

Хуулиа танилцуулахдаа,

• 250 орчим мянган иргэдийн санал өгөх, сонгуульд оролцох боломжийг нь өргөжүүлэн нээж өгнө
• Хөдөө орон нутагт ажиллаж байгаа иргэд, хотод сурч байгаа оюутнууд тухайн газартаа саналаа өгөх боломжтой болно
• Гадаадад ажиллаж, амьдарч байгаа иргэд хоёр өдрийн дотор санал өгдөг байсныг нэмж 5 өдөр болгоно гэжээ.

Энэхүү хуулийн ерөнхий агуулгыг харвал урьдчилан санал өгөх гэдэг ойлголтыг хэд хэдэн заалтаар тусгаж өгсөн байв. Энэ нь тайлбарлагдахдаа хэдийгээр боломжийн мэт харагдавч манайх шиг сонгуулиар улс төржилт өндрийг авдаг улсад урьдчилсан саналыг өөрчлөх боломжгүй болчихож буй юм. Түүнчлэн саналын авах хоногуудад өөрчлөлт оруулахаар тусгажээ.

Ингэхдээ, Монгол Улсын Ерөнхийлөгчийн сонгуулийн тухай хуулийн,

"55.2.Сонгуулийн ерөнхий хороо саналын хуудсыг санал авах өдрөөс гурваас доошгүй хоногийн өмнө санал авах байранд хүргүүлэх ажлыг удирдан зохион байгуулна" гэсний “гурваас” гэснийг “дөрвөөс”  болгож,

57.1.Гадаад улсад байгаа сонгогчийн саналыг Сонгуулийн ерөнхий хорооноос тогтоосон санал авах өдөр, тухайн улсын орон нутгийн цагаар 07:00 цагаас 22:00 цаг хүртэлх хугацаанд салбар комиссын тогтоосон санал авах байранд авна гэснийг “Сонгуулийн ерөнхий хорооноос тогтоосон санал авах өдөр” гэснийг “тогтоосон санал авах өдрөөс 13 хоногийн өмнө эхлүүлж тав хоногийн хугацаанд” гэж, мөн “22:00” гэснийг “17:00” гэж өөрчлөх,

63.8.Хэсгийн хороо хүсэлтийг хүлээн авч нягтлан шалгаж, санал авах өдрөөс хоёроос доошгүй хоногийн өмнө ажиглагчийн үнэмлэх олгоно гэсний “хоёроос” гэснийг “дөрвөөс” болгож өөрчлөх байдлаар өөрчлөхөөр тусгажээ.

Энэ нь сонгуульд санал өгөх хоног хугацааг улам уртасгаж, энэ хэрээр саналын будлиан үүсэх, сонгуулийн зардал нэмэгдэх зэрэг эрсдлүүд бий болгож болзошгүй юм:

Мөн харьяалал харгалзахгүй ойролцоох хэсгүүдэд санал өгдөг болгохоор зохицуулсан бөгөөд энэ нь мөн л давхар санал өгөх асуудал гарах сул талтай.

Уг хуулийг УИХ-ын гишүүн Д.Бум-Очир өргөн барьж буй нь хууль санаачлагчийн хувьд шинэ зүйл биш хэдий ч тэрбээр парламентад орж ирэхээсээ өмнө Ерөнхийлөгчийн Соёл, шашны бодлогын зөвлөхөөр ажиллаж байсан. Өөрөөр хэлбэл, ЕТГ-т харьяалагдан ажиллаж байсан хүн гишүүн болмогцоо Ерөнхийлөгчийн сонгуулийн тухай хуулийн өөрчлөлтийг барьж орж ирж буй нь зарчмын хувьд хэр нийцтэй вэ.

Ингэхдээ бүр сонгуулийн саналын хугацааг өөрчлүүлэхээр эрмэлзэж, Ерөнхийлөгчийн сонгууль угтсан хуулийг парламентын босго давуулах гэж байна. Хэлэлцэн батлах эсэх эрх нь УИХ-д бий.

Т.БАТСҮРЭН

Өөрийн сэтгэгдлээ илэрхийл

Share Tweet