"Хар сарнай" хамтлагийн С.Амармандах наадмын нээлтэд хамтдаа дуулах байсан Маадайгаа "мурьжээ"

Монголын рок попын ертөнцөд өөрийн гэсэн өнгө төрхийг бий болгож, залуусыг байлдан дагуулсан домогт "Хар сарнай" хамтлаг 35 жилийн нүүрийг үзэж буй ууган хамтлагуудын нэг. Өнөөдөр өглөө Үндэсний баяр наадмын нээлтэд тус хамтлагийн ахлагч С.Амармандах ганцаараа "Миний нутаг" дуугаа дуулан наадамчин олны талархалыг ихээхэн хүлээсэн билээ. Гэвч харамсалтай нь С.Амармандах наадмын нээлтэд хамтлагаараа дуулах байжээ.

Энэ талаар хамтлагийн гишүүн Б.Баяржаргал буюу Маадай өөрийн цахим хуудсаараа мэдээлэл орууллаа. Тодруулбал, "Хүү ааваа, Амраа ах наадмын нээлтэд ганцаараа "Миний нутаг" дууг дуулж байна. Сонин юм бэ" гэнэ. Тэр асуултад би хэсэгхэн зуур хариулж чадсангүй. Уг нь бид энэ жилийн наадмын нээлтэд Төр түмнээ хүндэтгэн хамтдаа “Миний нутаг” дуугаа дуулж, ижилхэн улаан дээлээ өмсөн тайзан дээр гарахаар ярилцсан. Гэтэл хэд хоногийн өмнөөс холбоо тасарч, утсаа ч авсангүй.

Монгол Улсын орчин цагийн уран зохиолыг үндэслэгч, их зохиолч, соён гэгээрүүлэгч Д. Нацагдоржийн “Миний нутаг” гэх энэ агуу шүлгийг дуу болгон бүтээж, олон түмний хүртээл болгосон нь миний хөдөлмөр бүтээл. Гэхдээ би хэзээ ч минийх гэж эгодоогүй, биднийх гэсээр өдий хүрсэн. Миний аялгуу, аранжровшик, найрууллага, шийдэл. Үүгээрээ би үргэлж бахархаж дуулах бүртээ эрч хүч энерги авч эх орноороо бахархан омогшдог. Анд бүжгээ сайхан бүжиглэчихдэг дээ.

Амжилт, алдар нэрээр ганцаараа амбицлах хүсэл хэзээ ч хүнийг хол авч явдаггүй. Үүнийг өдий насандаа ойлгосон баймаар. Бидний нөхөрлөлд алдаа, оноо аль аль нь бий. Гэхдээ түүнээс илүүтэй хамтдаа бүтээл туурвиж, хамтдаа тайзан дээр асаж, хамтдаа түмэндээ хайрлагдаж, хүндлэгдэж явсан сайхан дурсамж тоймгүй олон. Увайгүй занг чинь уучилсаар л... Нөхөрлөлдөө хүлээцтэй хандаж ирсэн. Анд гэдэг нэрийг зүүх амархан. Харин андын үнэнч зан, итгэлийг насан туршдаа авч явах л хамгийн хэцүү" хэмээн бичжээ.

Өөрийн сэтгэгдлээ илэрхийл

Share Tweet