Төсвийн алдагдал 2.1 их наяд төгрөг | Н.Учралын Засгийн газрын жинхэнэ дүнтэй ТАНИЛЦ

Н.Учралын тэргүүлсэн газар 110 дахь хоногийнхоо нүүрийг үзэж байна. Энэ хугацаанд иргэд үнийн өсөлтөөс өндийсөнгүй. Наадмын амралтын өдрүүдэд л гэхэд өргөн хэрэглээний бараа бүтээгдэхүүний үнэ 0.5 хувиар өссөн. Энэ долоо хоногийн статистикаар нэг килограмм үхрийн мах 40 мянган төгрөг шүргэж, мах, махан бүтээгдэхүүний үнэ өмнөх оны мөн үеэс 51.6 хувиар нэмэгдэв.

Энэ оны эхний хагаст жилийн байдлаар төсвийн алдагдал 2.1 их наяд төгрөг гарч ковидын үетэй эн зэрэгцэж, инфляцын түвшин 12 хувь болов. Энэ бол ҮСХ, Монгол банк зэрэг байгууллагын тайланд дурдсан тоо. Тодруулбал, наадмын өмнө 100 хоногоо урьдчилан тэмдэглэж, өөртөө онц дүн тавьсан Н.Учралын ажлын жинхэнэ үнэлгээ.

Тэрбээр Ерөнхий сайд болохдоо ид шид амлахгүй, иргэдэд ойр ажиллана хэмээн амлаж байв. Ингэж хэлээд нийслэлийн мега төслүүдийг царцаасан. Махны үнийг буулгана гэж лоозогноод хотын дарга Х.Нямбаатарыг өарийн хүн Б.Пүрэвдагваар сольсон.

Өчигдөр л гэхэд аймаг, нийслэлийн Засаг дарга нарт өвөлжилтийн бэлтгэл хангах талаар “Агаарын том том төсөл хөтөлбөр, 30,40 жилийн дараах хөгжил ярих хэрэггүй. Иргэдээ сонсож, төсвөө төлөвлө” гэж үүрэгдсэн.

Түүний эдгээр үгс сошиалаар лайк цуглуулах төдий попролт байсан нь цаг хугацаа өнгөрөх тусам тодорч байна. Дараах статистик дүн, албан мэдээ үүнийг илтгэнэ. Тоо худлаа хэлдэггүй гэх хэлцийн утга тэр.

Нэг. Мах магнаг болов

Засгийн газрын 100 хоногийн босгон дээр ч иргэд гурван ширхэг ууттай нөөцийн маханд дугаарлан зогсож байв. ҮСХ-ноос үхрийн цул мах кг нь 38,504, хонины ястай мах 27,798 төгрөгийн үнэтэй байна гэж мэдээлж буй. Харин манай сурвалжлах багийн мэдээллээс Хүчит шонхор захад дээрхээс 1000-1500 төгрөгийн үнэтэй байгаа юм. Ерөөс инфляц 12.4 хжвь болоход хүнсний инфляц жилийн 24.8 хувь болсон нь голлон нөлөөлжээ. Мах, сүү, төмс, өндөг зэрэг өргөн хэрэглээний барааны үнэ сарын дотор 0.9 хувиар нэмэгдсэн үзүүлэлттэй байна.

Хоёр. Бензин, шатахууны нөөц ердийн дунджаас доод түвшинд очив

Ерөнхий сайд Н.Учрал сүүлийн өдрүүдэд “өвөлжилтийг бэлтгэлийг эртнээс шуурхай хангаж эхэллээ” гэдэг PR түлхэх болов. Гэхдээ шатахууны нийлүүдэт хэвийн, үнэ нэмэгдэхгүй гэдгийн адил болох вий гэж иргэд эмээж байна. Учир нь, Засгийн газар иргэдийг тайван байхыг уриалж орон нутгийн замд гаргасан ч наадмын уур амьсгалаар халхалж бензиний үнийг нэмэгдүүлсэн.

Одоогоор нийслэлд АИ92 бензин 250 төгрөгөөр нэмэгдэж дунджаар 2840 төгрөгөөр зарагдаж байна. Түүнчлэн шатахууны нөөц бусад үетэй харьцуулахад огцом унажээ. Эх сурвалжийн мэдээлснээр АИ92-н 19 хоногийн, дизель түлшний 24 хоногийн нөөцтэй байна. Өмнөх улирлын мэдээллийг харвал тогтмол АИ 92 бензин 40-өөс дээш хоногийн, дизель 30-аас дээш хоногийн нөөцтэй явж иржээ.

Гурав. Залуусын орон сууцанд орох мөрөөдөл улам алсарсаар

Засгийн газрыг Орон сууцжуулалтын банк байгуулна гэж агаарын зүйл ярьж, хуулийн төсөл нааш цааш шидэлцэх хооронд орон сууцны үнэ жилийн 7.1 хувиар өссөн байна. Орон сууцны дундаж үнэ мкв нь 4.74 сая төгрөг болжээ.

Д.ХАДААН

Өөрийн сэтгэгдлээ илэрхийл

Share Tweet