Японд байгаа С.Мягмаржаргал: Эмчилгээгүй гэж оношлогдсон аавтайгаа хурдан уулзаж, үнсүүлэх юм сан

Коронавирусийн халдварын улмаас Монголын мянга мянган иргэн гадаадын оронд гацан, эх орондоо ирэх боломжгүй байгаа билээ. Японы Айчи мужийн Нагоя хотод байгаа монгол иргэн Сандагийн Мягмаржаргалын аав нь элэгний хорт хавдар тусчээ. Тэрбээр энэ айхтар мэдээг энэ сарын 7-нд мэдсэнээсээ хойш Монголдоо, аав дээрээ хурдан ирэх сэн гэж яаран, дээшээ тэнгэр хол, доошоо газар хатууг мэдэрч явна. Хүний нутагт цөхрөнгөө барьж, уйлахаас өөрөөр аавдаа олигтой тусалж чадахгүй байгаадаа өөрийгөө зэмлэж суугаа түүнтэй ярилцлаа.

-Аавынх нь бие гэнэт муудсаны улмаас эх орондоо яаралтай ирэх зайлгүй шаардлага гарсан гэсэн. Энэ тухайгаа тодруулна уу?

-Дөрөвдүгээр сарын 5-ны орой аавын минь бие гэнэт халуурсан гэсэн. Тэгээд маргааш нь Улаанбаатар хотод ирэн, эмнэлэгт үзүүлж, ЭХО-нд харуулахад хоёр бөөр нь устай, атгасан гар шиг, элэг нь хавдартай байсан гэсэн онош гарсан юм билээ. Ээж надтай холбогдон “Аавыг нь үзүүллээ. Хавдартай байна гэнэ” гээд уйлаад хэлсэн. Би итгэж ядан “Худлаа байгаасай” гээд шөнөжингөө уйлж хонов.

Монголд байдаг нэг эмч найзтайгаа холбоо барин, тусламж хүсэхэд “Аавтай нь уулзъя. Шинжилгээнийх нь бичгийг үзье” гэлээ. Тэгээд ээж аавыг СОНГДО-д дагуулж очоод уулзсан юм. Дараа нь манай найз над руу яриад “Аавынх нь бие их тааруу байна” гэв. Тэгэхээр нь “Найздаа туслаач. Нарийвчилсан шинжилгээ хийлгэж болох уу” гэхэд зөвшөөрсөн.  Маргааш аавын биеийг үзүүлээд, шинжилгээнийх нь хариуг яаралтайгаар гаргуулав. Найз маань над руу яриад “Уучлаарай найзаа, ийм муухай мэдээ дуулгаж байгаад. Аав чинь элэгний хорт хавдартай байна” гэхэд нь юу гэх учраа олоогүй.

Сандарсандаа “Ээж мэдэж байгаа юу” гэхэд “Хэлсээн. Үнэнийг хэлэхэд эдгэрэх найдвар байхгүй” хэмээсэн. “Хэр удах вэ” гэж тодруулахад “Удлаа л гэхэд нэг сар. Мэс засалд ороод нэмэргүй. Хавдар нь ерөнхийдөө хүнд шатандаа орчихож, бүх биеэр нь тархсан байна” гэлээ. Энэ тухай аав мэдээгүй байгаа. Ээж минь ийм хариу сонсчихоод аавын дэргэд юу ч болоогүй юм шиг, нулимсаа тэвчэн суух ямар хэцүү байгаа бол.

Охин минь энэ жил 11 настай. Надтай фэйсбүүкээр холбогдсоноо “Ээж ээ, өвөө үхэх юм уу. Эмчлэх ямар ч арга байхгүй юм уу” гээд палхийтэл хэлсэн. Тэгэхээр нь “Өвөөгийнх нь бие зүгээр ээ. Өвөөдөө мэдэгдэж ерөөсөө болохгүй” гэсэн. Охиндоо хүртэл ингэж худлаа ярих үнэхээр хэцүү юм байна.

Аавын шинжилгээний хариуг сонссоноосоо хойш эх орондоо, аав дээрээ хурдан очих сон гээд яарч, арга мухардаж сууна. Монголд байсан бол гүйж очоод тэврүүлэх сэн. Гэтэл хүний нутагт, тэгээд ийм айхтар халдвар гарчихсан байхад ийм байдалд орчихлоо. “Яах вэ, бурхан минь надад туслаач” гэж өчигдөржин гэрийнхээ хажуу талын голын захад ганцаараа залбирч суусан. Монголдоо хурдан очиж, аавтайгаа ганц ч удаа болтугай уулзан, “Хайртай шүү” гэж хэлээд тэврүүлэхийг хүсэж байна.

-Аавынх нь бие өмнө нь өвддөг байсан уу?

-Ерөөсөө тав, зургаахан хоногийн өмнө хэвлий хэсэгт нь нэг хатуу юм гарсан юм билээ. Гурван хоногийн дараа дотор нь муухайраад. Тэгээд эмнэлэгт үзүүлэхэд ийм хариу гарлаа.

-Та эхээс гурвуулаа юм билээ. Хоёр дүү нь Монголд байгаа юу?

-Хоёр дүү маань Чехэд амьдардаг. Тэд маань эх орондоо, аав дээр очих ямар ч боломжгүй байгаа. Аавын шинжилгээний хариуны талаар эмэгтэй дүүдээ хэлэхэд “Яагаад ганцхан сар амьдарна гэж. Адаглаад хагас жил болохгүй юм уу, эгч ээ гээд уйлсан. Орой нь халгаж, халгаж байгаад эрэгтэй дүүдээ хэлэхэд “Би аав, ээжийнхээ төлөө л энд ажиллаж байгаа шүү дээ. Аав минь өөд болчихвол би яаж амьдрах юм бэ” гээд хоёулаа шөнөжин уйлсан.

“Бурхан болохоос нь өмнө аавтайгаа уулзаж чадах болов уу” гэх айдас бид гуравт байна. Шөнө нойр хүрэхгүй, хоол идэх хүсэлгүй, уйлахаас өөр хийж чадах юмгүй аргаа барж сууна. Өвчин хэлж бус хийсэж ирдэг. Харамсалтай мэдээ сонссоноосоо хойш гэрийнхээ хажуу талын гол дээр өдөржин уйлж, өдрийг өнгөрөөж байна сууна.

-Юу юунаас илүү аавтайгаа хурдан уулзах сан гээд яарч байгаа нь мэдээж. Аавтайгаа цахимаар үргэлж холбоотой байгаа юу?

-Аав минь фэйсбүүк ашигладаггүй. Ээжийн цахим хаягаар дамжуулан аавтайгаа ярьдаг. Яавал эх орондоо, аав дээрээ хурдан очих вэ гэхээс өөр юм бодох сөхөө надад алга.

-Аавын тань бие одоо ямархуу байгаа вэ?

-Алхахаар хэвлий хэсэг рүүгээ унжиж өвдөөд байгаа гэсэн. Элэгний хорт хавдрын зовуурь нь тийм байдаг юм байна. Элгийг дүлий эрхтэн гэж ярьдаг шүү дээ. Хэвлий хэсэгт нь хатуу юм гарч ирж байж л мэдэгдэсэн гэнэ лээ. Бие нь дээр нь хатуу юм гараад нэг их удаагүй байхад л бие нь шарласан. Аавынхаа шаралсан царай, цонхийсон нүдийг нь хараад өөрийн эрхгүй утсаа салгасан. “Арай ч дээ. Аавын минь царай, нүд нь ийм болчих гэж. Уйлахаас өөр юу ч хийж чадахгүй ингэж байгаад бурхан болгочихвол яана аа” гээд өөрийн эрхгүй уйлсан.

-Та ер нь эх орондоо яаралтай ирэх талаар хэр удаан хөөцөлдөж байгаа вэ. ГХЯ, МИАТ-д хүсэлт гаргасан уу?

-Аавын шинжилгээний хариуг дөрөвдүгээр сарын 7-нд мэдсэнээсээ хойш хөөцөлдөж байна. Япон улсад суугаа Монгол Улсын Элчин сайдын яамны дугаарыг хайгаад, захидал бичсэн. Одоо хэр хариу алга. Маргааш нь Токио дахь элчинтэй холбогдоход “Бүртгэл хийхгүй. Монголоос тусгай үүргийн онгоц хэзээ ирэх нь тодорхойгүй байгаа. Харамсалтай байна” гэсэн.

Ийм мэдээ сонсоод үнэхээр цочирдсон, тэгээд бүр ганцхан сар амьдрахаар байна гэж хэлэхэд нь. Гэрт байхаар давчдаад дэмий голын эрэг дээр очоод уйлж суудаг. Япон дахь монголчуудын цахим группт “Гэртээ харих юм сан” гэж пост оруулсан чинь зарин нь “Харин тийм ээ. Хурдан харимаар байна” гэсэн байна лээ. Бас зарим нь “Байгаа газраа зохицоод амьдрах хэрэгтэй”, “Далайг гатлаад оч” гэсэн байсан. Аав минь бие тааруу, хүүхдүүдтэйгээ уулзах сан гээд өдөр хоногийг тоолж байхад би энд ингээд уйлахаас өөр хийж чадах юмгүй сууна. Саяхан Япон руу тусгай үүргийн нислэг хөөргөж, монгол иргэдээ авчирсан. Тухайн үед аавын хавдрын талаар мэдээгүй, ийм хариу гараагүй байсан юм аа.

-Ойрын хугацаанд Япон руу тусгай үүргийн нислэг хөөргөх сураг гараагүй байгаа. Эх орондоо ирэх ямар гаргалгаа хайж байна вэ?

-Хайртай хүмүүстээ аль болох цаг гаргаж, баярлуулж байгаарай. Бие нь өвдөөд, хугацаа хэлсэн үед хайртай, хамгийн эрхэм хүнийхээ үнэ цэнийг улам мэдэрдэг юм байна. Өмнө нь анзаардаггүй байсан зүйлээ хүртэл зурагнаас хардаг юм байна. “Яагаад миний аав гэж” хэмээн харамсдаг юм байна. Ээж маань хоёр шөнө унтаж чадахгүй, над руу чат бичлээ. Өчигдөр “Ээж нь гурван хүүхдийнхээ төлөө, ханиа амьдруулахын төлөө бүхнийг хийнэ” гэсэн. Би ч бас аавыгаа урт удаан жил амьдруулахын төлөө бүхнийг хиймээр байна. Хэрвээ нааштай хариу гарахгүй би энд байхад аав минь бурхан болчихвол яах вэ. Одоо үнэндээ цаг хугацаа юу юунаас илүү чухал байна. Аавыгаа дахиад олон олон жил амьдруулмаар байна. Бүр боломжгүй гэхэд аавтайгаа уулзан, хайртайгаа хэлээд тэврүүлмээр байна. Надад болон хоёр дүүг минь эх орондоо очин, аавтайгаа уулзахад туслахыг монгол түмнээсээ, Ерөнхийлөгч Х.Баттулга, Ерөнхий сайд У.Хүрэлсүх, УОК, ГХЯ, Япон Улсад суугаа Монгол Улсын Элчин сайдын яам туслахыг чин сэтгэлээ хүсье. Үнэхээр чин сэтгэлээсээ гуйж байна. Энд эх орондоо хурдан юм сан гээд Монголоос онгоц хүлээсэн, байх айл хайсан зөндөө олон монгол хүн бий.

Энэ мэдээнд өгөх таны үнэлгээ

Хуваалцаарай Жиргээрэй