“Эрдэнэс Монгол” ХХК-ийн санаачилгаар Цагдаагийн ерөнхий газар, “Гашуун Сухайт Авто Зам” ХХК, “Юнител” ХХК хамтран зохион байгуулж буй “Бид нэг амьтай шүү” аян 2020 оны дөрөвдүгээр сарын 15-нд эхэлсэн. Монгол Улсын нүүрсний экспортын гол гарц Тавантолгой-Гашуунсухайт чиглэлийн 239 км авто замаар нүүрс тээвэрлэдэг хүнд даацын автомашины жолооч нарын эрүүл мэнд, аюулгүй байдлыг хангах үүднээс шинэ төрлийн коронавирус /COVID-19/-ийн халдвараас сэргийлэх зөвлөмж өгөхөөс гадна гэмт хэрэг, ослыг бууруулахад аяны зорилго чиглэжээ.
Гашуунсухайтын авто замд жолооч нар хурд хэтрүүлэн давхих, нойр хоолгүй зорчих, урсгал сөрөх зэрэг зөрчил их гардаг. Тиймээс тэдний аюулгүй байдлыг хангах чиглэлд цагдаагийн байгууллагаас хууль дүрэм сурталчлан, жолооч нарын ухамсарт нөлөөлөх ажлуудыг хийж байна. Мөн халдвар өвчин дэгдэж буйтай холбоотойгоор ариутгалын бодис, хамгаалалтын хэрэгсэл тарааж байна.
Хүн бүрийн ард амьдрал, олон амь бий. Жолооч танаас гэр бүл, үр хүүхдийн тань амьдрал хамаардаг гэдгийг сануулж, энэхүү аяныг “Бид нэг амьтай шүү” хэмээн нэрлэжээ. Тавантолгой-Гашуунсухайт чиглэлийн замд хэрэгжиж буй “Бид нэг амьтай шүү” аян 14 хоног үргэлжилнэ.
ЭХ СУРВАЛЖ: Эрдэнэс Монгол
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.