Шүүхийн ерөнхий зөвлөлийн дарга Р.Онончимэгийн даргалж ажиллах хуульд заасан хугацаа дуусгавар болсонтой холбогдуулан Шүүхийн ерөнхий зөвлөл өнөөдөр (2023.12.25) хуралдаж, шинэ даргаа сонголоо.
Ерөнхий зөвлөлийн нийт гишүүдийн олонхын саналаар Шүүхийн ерөнхий зөвлөлийн даргаар Л.Энхбилэг сонгогдлоо. Түүнд Шүүхийн ерөнхий зөвлөлийн тамгыг Шүүхийн ерөнхий зөвлөлийн гишүүн Р.Онончимэг хүлээлгэн өгч “Шүүхийн ерөнхий зөвлөлийн даргын өндөр нэр хүндтэй албыг өндөр хариуцлагатай гүйцэтгэнэ гэдэгт итгэлтэй байна” хэмээн ажлын амжилт хүслээ. Шүүхийн ерөнхий зөвлөлийн дарга Л.Энхбилэг “Энэхүү хариуцлагатай албыг эрч, хүчтэй Та бүхний итгэлийг дааж гүйцэтгэнэ” гээд талархал илэрхийлэв.
Лхагвадоржийн Энхбилэг нь 1994-1997 онд Цагдаагийн академи, эрх зүйч, 1997-1998 онд Төрийн захиргааны удирдлагын хөгжлийн институт, 2007-2009 онд Монголын үндэсний дээд сургууль, магистр, 2021 онд МУИС-ийн сэтгэл судлалын магистрантаар тус тус дүүргэсэн. 1993 онд Чингэлтэй дүүргийн шүүхэд шүүх хуралдааны нарийн бичгийн дарга, 2000-2001 онд Хан-Уул дүүргийн шүүхэд туслах шүүгч, 2001-2021 онд анхан шатны шүүхэд шүүгч, Ерөнхий шүүгчээр тус тус ажиллаж байсан туршлагатай бөгөөд 2021 оны 10 дугаар сарын 11-нээс Шүүхийн ерөнхий зөвлөлийн гишүүн, 2023 оны 12 дугаар сарын 25-наас Шүүхийн ерөнхий зөвлөлийн даргаар ажиллаж байна.
Монгол Улсын шүүхийн тухай хуульд Ерөнхий зөвлөлийн даргыг гишүүд дотроосоо нэг жилийн хугацаагаар олонхын саналаар нууц санал хураалтаар зөвхөн нэг удаа сонгохоор заасан байдаг.
Б.ХАШ-ИЛД
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
2024 онд ман ан-ыг бүү сонго.зөв боловсролтой зөв хүнийг сонгох хэрэгтэй