Нэг дороос | "Элэгний В вирусийн эм 15 биш 45 мянган төгрөгийн үнэтэй"

Эмийн үнэ, чанарын асуудлаарх нээлттэй мэдээллийг шинжлэн судлах сонсголын хоёр дахь өдрийн /2024.04.16/ нэгдсэн мэдээллийг хүргэж байна.

УИХ-ын гишүүн Б.Жаргалмаа: Элэгний В, Д вирустэй иргэн өчигдөр надад мэдээлэл өгч байсан. Өмнө нь Энтекавир гэдэг эмийг 15,000 төгрөгөөр худалдаж авдаг байсан бол хөнгөлөлттэй эмийн жагсаалтад ороод 45,000 төгрөг болсон. Энэ асуудалд аудит дүгнэлт хийж болох уу?

Дэд сайд С.Энхболд "Даатгалынхнаас асуухад зах зээлд 15,000 биш 45,000 төгрөгөөр зарагддаг гэсэн. Энтекавир эмийг хөнгөлөлттэй үнээр авах боломжийг бүрдүүлсэн гэсэн мэдээлэл өгсөн. Энтекавир бол В вирусийн эсрэг эм. Хаанаас ийм мэдээлэл авсныг мэдэхгүй. Ямарваа нэг юмыг ярихдаа эх сурвалжтай, бодитой нотолгоонд суурилж ярих ёстой" гэлээ.

-"Ковид-19"-ийн үед авсан 9.1 тэрбумын эмний хугацаа дууссан-

"11.3 тэрбум төгрөгийн эм, эмнэлгийн хэрэгсэл устгалд орохоор хүлээгдэж байна. Үүний 9.1 тэрбум төгрөгийн эм нь ковидын үед худалдан авч хугацаа нь дууссан эм байна" гэж мэдээлэгдэв.

НЭМЭЛТ: 12.00 цаг

-АТГ: Эрүүл мэндийн цус ойртсон салбар гэдгийг удаа дараа гаргаж ирсэн-

УИХ-ын гишүүн Б.Жаргалмаа "Эрүүл мэндийн яамны удирдлагын 110 хүнээс 87 нь эмийн салбартай хамааралтай гэж байна. Аалзны тор шиг санагдаж байна. Хүн амын эрүүл мэндийн манаанд зогсож байгаа хүмүүст зориуулсан хууль эрхзүйн орчин байхгүй юм уу. Хамааралтай хүмүүсийг байлгахгүй байх нь АТГ-ын ажил биш юм уу?

АТГ-ын комиссар н.Шинэбаяр: Ашиг сонирхлын зөрчлөөс сэргийлэх хуулийн дагуу албан тушаалтнууд гурван удаа мэдүүлэг өгдөг. Шинээр албан тушаалтнуудыг томилохдоо манайхаас мэдээлэл авахгүйгээр томилдог тохиолдлууд бий. Энэ тохиолдолд манайх илрүүлж, шаардлагаа тавьдаг. Эрүүл мэндийн салбар авлигад өртөх өндөр эрсдэлтэй. Шинжээч нарын дүгнэлт манайхаас өмнө шалгалт хийгээд гаргаж байсан мэдээллээс хамаарлын хувьд өндөр байна. Мэдээллийг авч шалгаж үзье. Цус ойртсон салбар гэдгийг АТГ удаа дараагийн шалгалтаараа гаргаж ирж байсан.

Ж.Чинбүрэн: “Намайг гүжирдлээ. Чи яасан том юм" гэсэн мессэж ирж байна

Хуралдаан даргалагч, УИХ-ын гишүүн Ж.Чинбүрэн: Албан тушаалтны харилцан хамаарал аалзны тор шиг шигджээ. Эрүүл мэндийн салбарын эмийн өсөлт өндөр байгаагийн үндсэн углуурга нь хамаарал бүхий компанитай этгээдүүдтэй холбоотой юм биш үү гэсэн дүгнэлтийг хийж байна.  Миний гар утсанд “Намайг гүжирдлээ. Чамайг шүүхэд өгнө. Чи яасан том юм“ гэсэн мессэж ирж байна. Эндээс бид айж ичихгүй. Хамаарал бүхий, нэгдмэл ашиг сонирхолтой гэсэн мэдээллээ хууль хүчний байгууллагад өгч бодитой байдлыг тодорхойлуулна. Энэ салбар дотор нэгдмэл ашиг сонирхолтой байна гэдэг өөрөө том асуудал" хэмээлээ.

НЭМЭЛТ: 11.00 цаг

"Т.Мөнхсайхан, Н.Номтойбаяр нарын хамааралтай компаниуд гарч ирж байна"

УИХ-ын гишүүн, Хянан шалгах түр хорооны гишүүн М.Оюунчимэг: Манай улсын эмийн зах зээлд аалзны тор үүрлэчихсэн, "мафижсан" гэж хэлээд загнуулж байсан. Бодит байдал яг л энэ байгаа байхгүй юу. Та нар сая харсан байна. ЭМЯ, ЭМДЕГ, хүний эмийн газар, Эм эмнэлгийн хэрэгслрийн газар, гааль, ЭМДҮЗ, аймгуудын эмнэлгийн дарга нар бүгд эм худалдаалдаг компаниудтай. Бодит байдал яг л ийм байгаа л даа. Хамаарлуудыг манай шинжээч нар сайн гаргаад тавьчихвал.

"Лондон лүүк" ХХК дээр ЭМ-ийн сайд асан Т.Мөнхсайхан, Хүний эмийн зөвлөлийн гишүүн Д.Гантуяа гэхчилэн гурван хүний хамаарал гарч ирж байна.

Мөн МСМ групп ХХК-ийн хамаарлууд гэхээр ХНХ-ын сайд асан Н.Номтойбаяр, ЭМЯ Эмнэлгийн тусламжийн газрын дарга Я.Буянжаргал нарын гурван хүний хамаарал гарч ирж байна.

Надад эдгээр нь ямар хамааралтайг тайлбарлаад өгөөч" хэмээлээ.

Шинжээч: Хамаарал бүхий этгээд гэдэг ангилалаар ялгаж байгаа. Хянан шалгах ажиллагаанд хэн нэгэн албан тушаалтан бус, эм ханган нийлүүлэх байгууллага нэгдмэл ашиг сонирхолтой этгээдүүд хамааралтай байдгийг л гаргасан. Тухайн этгээдүүд ямар аж ахуй нэгжээрээ, хэрхэн холбогдож байгааг хууль хяналтын байгууллагаар шалгуулах боломжтой.

УИХ-ын гишүүн Ц.Туваан: Бидний эмийн үнэ өсөөд байгаагийн шалтгаан энэ байна. Ахмадууд тэтгэврийнхээ гуравны нэгийг чанаргүй эмэнд тавиад туучихдаг. Гэвч эдгэдэггүй. Хянадаг, шалгадаг хүмүүс энэ дотор орчихжээ. Сайдаасаа эхлээд л. Авлигатай тэмцэх газар болон Цагдаагийн ерөнхий газрын Эдийн засгийн гэмт хэрэгтэй тэмцэх албаныхан шинжээч нараас мэдээлэл аваад энэ асуудлыг шалгах ёстой. Бид энд цаг нөгцөөх гэж сууж байгаа биш. Эндээс яман нэгэн үр дүн гарах ёстой. Хэрэглэж байгаа эмийн чанар, үнэ, өөрсдөдөө давуу байдал олгож уу гэдгийг хармаар байна.

НЭМЭЛТ: 10.40 цаг

Танилц: ЭМЯ-ныхны эмийн салбар дахь хамаарал бүхий ААН-үүд

Эм ханган нийлүүлэх байгууллагын хамаарлын асуудлыг хэлэлцэнэ гэж хуралдаан даргалагч, УИХ-ын гишүүн Ж.Чинбүрэн онцоллоо.

Шинжээчийн мэдээлэлд: Эмийн үйлдвэр болон Эм ханган нийлүүлэх байгууллагын тусгай зөвшөөрөлтэй 2645 хуулийн этгээд байна.

Эрүүл мэндийн салбарын албан тушаалнуудын хамаарал бүхий аж ахуйн нэгжийг зарлалаа.  Эрүүл мэндийн яамны 110 албан тушаалтнаас 97 буюу 88.1 хувь нь хамаарал бүхий компанитай байна.

1. Эрүүл мэндийн дэд сайд асан Ш.Анхмаа Тахилтын овоо ХХК-тай
2. ЭМЯ Санхүү, эдийн засгийн газрын дарга Т.Мөнхтуул “Эс Би Ди фарм” ХХК
3. ЭМЯ НЭМГ, УСХЗХ-ийн дарга Б.Туяа “Баршим” ХХК-тай
4. ЭМЯ Ц.Балдандугар БАСА ХХК-тай
5. ЭМЯ Б.Буянтогтох “Монсан медикал сервис” ХХК-тай
6. ЭМЯ ТНБД асан Б.Бямбадорж “Космотек монгол” ХХК-тай
7. ЭМЯ Эм, эмнэлгийн хэрэгсэл, үйлдвэрлэлийн хэлтсийн дарга Г.Цэцэнсанаа “Жикүжи” ХХК-тай
8. ЭМЯ Эмнэлгийн тусламжийн чанар, аюулгүй байдлын хэлтсийн дарга Д.Золзаяа “Интернейшнл медикал сентер” ХХК-тай
9. ЭМЯ Олон нийттэй харилцах, тандалт, уурхай удирдлагын хэлтмийн дарга Д.Нарангэрэл “Монос-Улаанбаатар”
10. ЭМЯ Лувсанцэрэнгийн Дашравдан “Арсорогзон” ХХК-тай
11. ЭМЯ Төрийн Захиргааны Удирдлагын Газрын хуулийн хэлтэс  Лувсандоржийн Дашравдан “Номгон гэгээн фарм” ХХК-тай
12. ЭМЯ Хуулийн хэлтсийн дарга М.Ганзориг “Альфа инжиниринг инвест” ХХК-тай
13. ЭМЯ Г.Навчаа “Нэкст женерейшн хелп” ХХК-тай
14. ЭМЯ Хөрөнгө оруулалтын хэлтсийн дарга Т.Бямбасүрэн “Фореверрийч” ХХК-тай
15. ЭМЯ Нийгмийн эрүүл мэндийн газрын дарга Т.Энхзаяа МИССДИ ХХК-тай
16. ЭМЯ-ны дэд сайд С.Энхболд “Мөнхийн тун" ХХК-тай
17. ЭМДҮЗ-ийн гишүүн асан Д.Дэмбэрэл “Түмэн-Очир” ХХК-тай
18. ЭМЯ Эмнэлгийн тусламжийн газрын дарга Я.Буянжаргал МСМ групп ХХК-тай

гэхчилэн танилцуулав.

Монгол Улсын хэмжээнд бүртгэлтэй байгаа эмийн үйлдвэрийн 50 хувь, эм ханган нийлүүлэх байгууллагын 28 хувь, эмийн сангийн 17 хувь нь төрийн байгууллагын эрх бүхий албан тушаалтны хамаарал бүхий ААН-үүд байна.

ЭХЛЭЛ: 10.00 цаг

Эмийн үнэ, чанарын асуудлаарх нээлттэй мэдээллийг шинжлэн судлах сонсголын хоёр дахь өдөр /2024 оны 4 дүгээр сарын 16/ дараах асуудлуудыг хэлэлцэнэ.

• Эмийн үнэ ба шалтгаан нөхцөл ерөнхий сэдвийн хүрээнд эмийн үнийн бүрдэл болон эмийн үнийн өсөлтөд нөлөөлж буй хүчин зүйл,
• эмийн үнийн мэдээллийн ил тод байдал болон өнөөгийн нөхцөл байдал,
• чанаргүй болон хугацаа дууссан эмийн устгал болон хяналт шалгалтаар илэрсэн асуудал зэрэг сэдвээр

Эхний өдрийн сонсголын Нэг дороос | Иргэд: Гаж нөлөөтэй, үйлчилгээ муутай эм, тариа яагаад шахаад байдаг юм бэ мэдээлийг ЭНД дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй