₮28.6 тэрбумын зураг төсөлтэй гүүрний тендерт БНХАУ, БНСУ-ын 2, Монгол 6 компани үнийн санал ирүүлэв

Түгжрэлийг бууруулна хэмээн төлөвлөж буй нэгэн ажил бол Туул голын дээгүүр тавигдах ган татлагат гүүрэн байгууламж.

Үүний зураг төслийг 28.6 тэрбумаар хийлгэхээр төлөвлөж, тендер зарласан үеэс эхлэн бид мэдээлж буй. Анх зарлахдаа уг тендертэй холбоотой ТЭЗҮ-ийн мэдээлэл Төрийн худалдан авах ажиллагааны цахим системд байршаагүй, зөвхөн ажлын даалгаврыг дурдсан байсан. Харин хэсэг хугацааны дараа тухайн тендерийн мэдээллийг устгаж, дахин шинэчлэгдсэн байдаг.

Улмаар “Өөдөө тэмүүлэх Монгол” ган татлагат гүүрэн байгууламжийн урьдчилсан техник, эдийн засгийн үндэслэл, зураг төсөв /Улаанбаатар, Үндэсний цэцэрлэгт хүрээлэнгээс хүрхрээн ам хүртэл/” төсөл, арга хэмжээний хүрээнд “Хөнгөн төмөр замын тээвэр (LRT) төслийн техник, эдийн засгийн үндэслэл, зураг төсөв /Улаанбаатар/ Багц-2” боловсруулах зөвлөх үйлчилгээг авна" хэмээсэн юм.

ТЭЗҮ-г тодруулан харвал урьдчилсан техник, эдийн засгийн үндэслэл, зураг төсвийг 28.6 тэрбумаар хийлгэнэ. Харин 2.8 их наядаар барилга угсралтаас ашиглалтад орох хүртэлх ажлыг хийлгэнэ гэж төлөвлөсөн байдаг.

Уг тендерийн материал хүлээн авах хугацаа энэ оны гуравдугаар сарын 26-ны өдөр дууссан бөгөөд дараах найман байгууллагаас 18.4-20.8 тэрбум төгрөгийн үнийн санал ирүүлсэн байна.

Оролцсон байгууллагуудын мэдээллийг нягтлан хүргэж байна.

1. Guangzhou Metro Design & Research Institute Co Ltd -19.9 тэрбум төгрөгийн үнийн санал явуулсан байна. Уг компани Монгол Улсын хөрөнгө оруулалттай, үйл ажиллагааны чиглэл нь дизайн. Монгол Улсын Төрийн худалдан авах ажиллагааны цахим системд /2024-11-13/-нд бүртгүүлсэн байна.

Тус компанийн хувьд 2024 онд Хөнгөн төмөр замын тээвэр /LRT/ төслийн техник, эдийн засгийн үндэслэл, зураг төсөв, Хөшигийн хөндий туннел” төслийн урьдчилсан техник, эдийн засгийн үндэслэл, зураг төсөв гэх хоёр тендерт үнийн санал явуулсан хэдий ч шалгараагүй байна.

2. Yooshin Engineering Corporation - 18.4 тэрбум төгрөгийн үнийн санал ирүүлсэн. Өмнөд Солонгос улсаас хөрөнгө оруулалттай, үйл ажиллагааны чиглэлийн хувьд Төмөр замын зураг төсөл, зохиох, боловсруулах. Монгол Улсын Төрийн худалдан авах ажиллагааны цахим системд /2022-10-13/-нд бүртгүүлсэн байна.

Бүртгүүлсэн цагаасаа хойш хоёр дахь тендерт үнийн санал явуулж буйн энэ аж. Өмнө нь 2023 онд Тавантолгой төмөр замаас зарласан Хил холболтын төмөр замын техник эдийн засгийн үндэслэл (ТЭЗҮ), иж бүрэн зураг төсөл боловсруулах тендерт үнийн санал явуулсан ч хасагдсан байна.

3. SOOSUNG ENGINEERING CO., LTD. - 20.2 тэрбум төгрөгийн үнийн санал ирүүлсэн. Хөрөнгө оруулалт: Монгол, үйл ажиллагааны чиглэл нь инженерийн зөвлөх үйлчилгээ. Монгол Улсын Төрийн худалдан авах ажиллагааны цахим системд /2022-10-21/-нд бүртгүүлсэн байна.

Хоёрдох удаагаа тендерт үнийн санал хүрүүлж байгаа бөгөөд өмнө нь 2024 онд Бүтээн байгуулалтын төслүүдийн нэгдсэн менежментийн зөвлөх үйлчилгээ тендерт оролцох санал хүрүүлэн хасагдаж байжээ.

4. CHANGSHA PLANNING & DESIGN INSTITUTE CO.,LTD. - 20.5 тэрбум төгрөгийн үнийн санал ирүүлсэн. Үйл ажиллагааны чиглэлийн хувьд Улаанбаатар хотод интернэт телефоны үйлчилгээ, интернэтийн станц. Монголын хөрөнгө оруулалттай компани бөгөөд Монгол Улсын Төрийн худалдан авах ажиллагааны системд /2024-12-05/-д бүртгүүлсэн.

Өмнө нь ямар нэгэн тендерт оролцож байсан туршлага байхгүй.

5. Хятадын Хотын Инженерийн Хойд Хятадын Зураг төсөл, судалгааны хүрээлэн -20.8 тэрбум төгрөгийн үнийн санал ирүүлсэн. Монголын хөрөнгө оруулалттай, үйл ажиллагааны чиглэл нь барилгын зураг төсөл. Монгол Улсын Төрийн худалдан авах ажиллагааны системд / 2024-12-05/-д бүртгүүлсэн.

Өмнө нь Зам тээврийн яамнаас зарласан “Хөшигийн хөндий туннел” төслийн урьдчилсан техник, эдийн засгийн үндэслэл, зураг төсөв тендерт үнийн санал хүргүүлсэн ч хасагдсан. Өөр ямар нэгэн тендерт оролцож байгаагүй.

6. АО "Институт Гипростроймост-Санкт-Петербург" - 20.8 тэрбум төгрөгийн үнийн санал ирүүлсэн. Монголын хөрөнгө оруулалттай, Зам гүүрний зураг төсөл, шинжилгээ судалгаа, барилгын төсөв гэх үйл ажиллагааны чиглэлтэй. /2024-12-01/-нд Төрийн худалдан авах ажиллагааны системд бүртгүүлсэн байна.

2024 онд Нийслэлийн худалдан авах ажиллагааны газраас зарласан Улаанбаатар хотын "Шинэ их тойруу" хурдны зам төслийн техник, эдийн засгийн үндэслэл, зураг төсөв, “Хөшигийн хөндий туннел” төслийн урьдчилсан техник, эдийн засгийн үндэслэл, зураг төсөв тендерт үнийн санал ирүүлсэн ч хасагдсан.

7. Poly Changda Engineering Co Ltd - 19.3 тэрбум төгрөгийн үнийн санал ирүүлсэн. Хятадын хөрөнгө оруулалттай, Төмөр зам болон авто замын байгууламж барих үйл ажиллагааны чиглэлтэй. Монгол Улсын Төрийн худалдан авах ажиллагааны цахим системд /2024-11-09/-нд бүртгүүлсэн байна.

Тухайн компанийн хувьд өнгөрөгч онд Зам тээврийн яамнаас зарласан “Хөшигийн хөндий туннел” төслийн урьдчилсан техник, эдийн засгийн үндэслэл, зураг төсөв, НЗДТГ-аас зарласан "Шинэ тойрог авто зам" төслийн урьдчилсан техник, эдийн засгийн үндэслэл, зураг төсөв гаргах тендерт үнийн санал явуулсан хэдий ч шалгараагүй. Харин энэ онд дээрх тендерээс гадна 1.9 их наядаар барих "Туулын хурдны зам"-ын тендерт үнийн санал хүргүүлсэн, хариугаа хүлээж байна.

8. Dohwa Engineering Co., Ltd. - 18.4 тэрбум төгрөгийн үнийн санал ирүүлсэн. Монголын хөрөнгө оруулалттай компани бөгөөд үйл ажиллагааны чиглэл нь Инженерийн зөвлөх үйлчилгээ. Төрийн худалдан авах ажиллагааны системд /2024-03-13/-нд бүртгүүлсэн.

2024 онд хоёр тендерт оролцож нэгд нь буюу Нийслэлийн худалдан авах ажиллагааны газраас зарласан Их багтаамжийн нийтийн тээврийн хэрэгсэл "Метро"-г барих төслийн зөвлөх үйлчилгээ тендерт 145.9 тэрбумын үнийг санал болгож шалгарсан байна. Харин Зам тээврийн яамнаас зарласан “Хөшигийн хөндий туннел” төслийн урьдчилсан техник, эдийн засгийн үндэслэл, зураг төсөв тендерт үнийн санал ирүүлэн бүдэрч байжээ.

Энэ мэдээнд өгөх таны үнэлгээ

Хуваалцаарай Жиргээрэй