Шүүхийн шийдвэр: Хэргийг нэмэлт мөрдөн байцаалт руу буцааж, ослын шинжээч дахин томилохоор боллоо

Долоон хүний амь нас хохирсон Дүнжингарав худалдааны төвийн урд замд гарсан дэлбэрэлтийн шүүх хурал өнөөдөр /2025.04.22/ Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд болж байгааг НЭГ ДОРООС хүргэж байна.

НЭМЭЛТ: 16:50

Завсарлагааны дараа шүүх хуралдаан шийдвэрээ танилцууллаа. Эрүүгийн хэрэг хянан шийдвэрлэх хуулийн 33-р зүйлийн 1.2, 1.3 дахь заалтыг үндэслэн хэргийг нэмэлт мөрдөн байцаалт руу буцаахаар шийдвэрлэлээ. Ингэхдээ дараах нөхцөл байдлыг шалгах шаардлагатай гэж үзлээ.

1. Мөрдөн байцаагч шийдвэр гаргаж зарим иргэдийг иргэний хэргийн нэхэмжлэгчээр тогтоосон ч энэ шийдвэр нь хууль зүйн үндэслэл шаардлагад нийцсэн нотлох баримтыг бүрдүүлсэн эсэхийг бүхэлд нь хянаж үздэг. Зарим иргэнийг иргэний нэхэмжлэгчээр тогтоосон мөрдөгчийн тогтоол нь хуульд заасан үндэслэл журмыг зөрчсөн байна гэж үзэж байна. Өмчлөгч бус иргэдийг  нэхэмжлэгчээр тодорхойлсон байсныг дахин шинжээчийн дүгнэлт гаргуулна. 
2. Зам тээврийн ослын шинжээчийн дүгнэлт ойлгомжгүй байгаа учир дахин шинжээч томилохоор шийдвэрлэлээ.
3. 207-р байрны улсын комисс хүлээж авахдаа галын аюулгүй байдлыг шалгаж хүлээж авсан эсэхийг тодруулах шаардлагатай хэмээлээ.

НЭМЭЛТ: 16:00

Шүүх хуралдаан үргэлжилж байна. Жилийн өмнө гарсан уг хэрэгт “Дашваанжил” ХХК-ийн захирал, том оврын машины жолооч Ч.Рэнцэндоржийг  яллагдагчаар татсан бөгөөд өмгөөлөгчийн зүгээс хэргийг прокурор руу буцааж, мөрдөн шалгах ажиллагааг дахин явуулах саналтай байгаагаа  өнөөдрийн шүүх хурал дээр илэрхийлсэн. Мөн хэрэгт холбогдолгүй гэж тогтоогдсон Ниссан патрол маркийн автомашины жолооч Э.Мөнхнаранг хэрэгт татан шалгах хүсэлтээ гаргасан юм.

Харин прокурорын байгууллагаас энэ оны нэгдүгээр сард нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх рүү шилжүүлсэн. Шүүхээс хэргийн материалыг хянаж үзээд, хүлээн авсан бөгөөд өнөөдрийн шүүх хурлын үеэр хэргийг буцаах боломжгүй гэх үндэслэл тайлбарыг прокурорын зүгээс хэлсэн бөгөөд хангалттай нотлох баримттай, хэргийг шүүх рүү шилжүүлэхээс өмнөх 4 сарын хугацаанд уг асуудлаар хандах боломжтой байсан хэмээсэн юм.

Шүүх хуралдааны шийдвэрийг танилцуулах хүртэл түр завсарлалаа.

НЭМЭЛТ: 15:00

Шүүх хуралдаан үргэлжилж байна. Газ тээвэрлэж явсан Ч.Рэнцэндоржийн өмгөөлөгч Х.Даваахүү "Шинжээчийн дүгнэлтээр Ч.Рэнцэндорж замын хөдөлгөөний дүрэм зөрчөөгүй бүх үйлдлээ зөв хийсэн байна гэх дүгнэлт гарсан учраас үүнийг харгалзах ёстой. Том оврын машин давуу эрхтэй. Патролын жолооч Э.Мөнхнаран зам тавьж өгөх ёстой байсан.

Тэр зам стандартын шаардлага хангаагүй байсан гэх шинжээчийн дүгнэлт гарсан шүү. Тиймээс хэргийг прокурорт буцааж мөрдөн шалгах ажиллагаа явуулах хэрэгтэй. Прокурор яагаад патролын жолооч Э.Мөнхнаранг хаацайлаад байна вэ. Батлан хамгаалах яамыг яагаад хэрэгт татахгүй байгаа юм. Энэ нь шударга ёсны зарчимд нийцэхгүй. Хөдөлшгүй нотлох баримтаар прокурор хэргийг зүйлчилж оруулж ирээгүй мөртлөө дутуу хагас юм хийж орж ирчхээд шүүх рүү шидэж байна. Прокурорууд хуулиа сайн унш" гэв.

Хариуд нь прокурорын зүгээс "Энд мэтгэлцээний нөхцөл байдал явагдахгүй ээ Х.Даваахүү өмгөөлөгчөө. УЕП-ын газарт хянагдаагүй хэргийг та нар дур мэдэж аваад ирчихсэн гэх юм ярилаа. 2024 оны 7 сард уг хэрэгт эрүүгийн хэрэг үүсгэж яллагдагчаар татсан. 4 сарын гаруйн хугацаа өнгөрсний дараа холбогдох гомдол, хүсэлт яагаад гаргаагүй вэ. Яллах дүгнэлт гараад, шүүхэд шилжчихсэн байхад гомдол гаргасан. Агуулгаараа зам тээврийн осол гэж гараагүй гэсэн атлаа эрүүгийн тодорхой заалтуудаар гэмт хэрэг үйлдээгүй гэдэг асуудал яриад байгаа. Ч.Рэнцэндорж нь Монгол Улсын стандарт, хөдөлмөрийн аюулгүй байдал, холбогдох дүрэм журмыг зөрцсөн үү гэдэг асуудал яригдаж байгаа. Хэрвээ нотлох баримтыг шинжлэн судлагдаад гараад ирвэл танай үйлчлүүлэгч цагаадна л биз дээ. Сайн л биз дээ. Прокуроруудын зүгээс цагаадах боломжгүй гэж үзэж байгаа. Зам тээврийн осол мөн гэдгийг нь тогтоочихсон гэчихээд зам тээврийн осол мөн эсэхийг тогтоолгомоор байна гэж яриад байх юм. Прокурорууд энд ашиг сонирхлын зөрчилтэй гэдэг юм ярьж та прокуроруудын нэр төрд халдлаа. Нотлох баримттай л юм гаргах ёстой" гэв.

НЭМЭЛТ: 12.20 цаг

Дашваанжил ХХК-ийн өмгөөлөгч Мөнхзолбоо: Хэрэг болсон нөхцөл байдлыг үнэн зөв тогтоосон эсэхэд эргэлзэж байна. Мөн иргэний хариуцагч нар дээр анхаарал хандуулаагүй. Хэрэг болсон үед шүүгдэгчээр татагдаад буй хоёр иргэнийг ямар зөрчил гаргасныг зөв зүйл ангиар тогтоогдоогүй. Хэрэв зөв тогтоосон бол өөр этгээд ч гэм буруутай болж мэднэ. Тиймээс хэргийг дахин шалгуулж, дүгнэлт гаргуулах хүсэлтэй байна.

НЭМЭЛТ: 11.50 цаг

Энэ үеэр Ч.Рэнцэндоржийн өмгөөлөгч: Тус дэлбэрэлтийн улмаас олон хүний амь нас хохирсонд харамсаж байна. Гэхдээ миний үйлчлүүлэгч тухайн үед гэрэл дохиогоо өгч хөдөлгөөнд оролцсон. Мөн гал унтраах явцад тоног төхөөрөмж, стандарт хангагдаагүй гэж үзэж буй бөгөөд аюултай ачаа тээвэрлэх стандартыг зөрчөөгүй. Хэрэгт авагдсан үйл баримт, яллагдагчаар татсан зүйл анги манай үйлчлүүлэгчийг илт буруутгаж буй тул хэргийг прокурорын байгууллага руу буцаах санал хүргүүлж байна.

ЭХЛЭЛ: 11.30 цаг

-Дүнжингаравын дэлбэрэлтийн ослын шүүх хурал эхэллээ-

2024 оны нэгдүгээр сарын 24-ний өдөр нийслэлийн Баянзүрх дүүргийн 26 дугаар хороонд байрлах “Дүнжингарав” худалдааны төвийн урд замд гааз тээвэрлэж явсан том оврын автомашин дэлбэрсэн. Дэлбэрэлтийн улмаас онцгой байдлын гурван албан хаагч, дөрвөн иргэн амиа алдаж, 228 иргэн, 15 аж ахуйн нэгж, байгууллагын эд хөрөнгөд 18.8 тэрбум төгрөгийн хохирол учирсан нь тогтоогдсон байдаг.

Тус хэргийн шүүх хурлын урьдчилсан хэлэлцүүлэг яг одоо болж байна. Энэ хэрэгт яллагдагчаар “Дашваанжил” ХХК-ийн захирал, том оврын машины жолоочийг татсан гэж хуулийн байгууллагаас мэдээлсэн билээ.

Хэргийг прокурорын байгууллагаас /2025.01.21/ нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүх рүү шилжүүлсэн. Шүүхээс хэргийн материалыг хянаж үзээд, хүлээн авсан байдаг.

З.УЧРАЛ

Энэ мэдээнд өгөх таны үнэлгээ

Хуваалцаарай Жиргээрэй