ХӨШИГНИЙ АРД: Хидэо Савада банкны хувиа 300 сая ам.доллараар зарахаар ХЭЛЦЭЛ ЭХЛҮҮЛЖЭЭ

Ж.ОДЖАРГАЛ, Д.ЭРДЭНЭБИЛЭГ, Ч.БАЗАРАА, Ц.БААТАРСАЙХАН НАРТ ЗАРАХ САНАЛ ХҮРГҮҮЛЖЭЭ

Хаан банкны 41.3 хувийг албан ёсоор эзэмшдэг Япон улсын иргэн Хидэо Савада Монголын нэр бүхий 4-6 бизнесмэнд хандаж, өөрийн хувиа худалдах санал тавьсан талаарх мэдээлэл хөшигний ард нэлээд яригдсан. Эх сурвалжуудын өгч буй мэдээллийг нийтлэг байдлаар дүгнэж үзэхэд,  Япон улсын иргэн Хидео Савадагийн зүгээс 2019 онд MCS группийн Ерөнхийлөгч Ж.Оджаргал, “Баян” Ч.Базараа, ХХБ-ны ТУЗ-ийн дарга “сахал” Д.Эрдэнэбилэг, Хаан банкны 22.9 хувийг эзэмшдэг “Таван Богд” группийн ерөнхийлөгч Ц.Баатарсайхан нарт АЛБАН БИЧГЭЭР худалдах санал тавьсан байна.

Улмаар Ерөнхийлөгч Х.Баттулга, УИХ-ын дарга Г.Занданшатар, Ерөнхий сайд У.Хүрэлсүх нарт хандаж,  Монголд банкны системийн соёлыг төлөвшүүлж, жишиг тогтоож өгсөн банкныхаа хувийг нээлттэйгээр зарах хүсэлтэй буйгаа УЛАМЖИЛЖ, МЭДЭЭЛЭЛ ХҮРГҮҮЛСЭН  гэх мэдээлэл байгаа юм. Энэ нь худалдах саналаас өөр утгыг агуулсан бололтой.

Тэрбээр албан бичигтээ худалдан авах хэлцлийг 300 сая орчим ам.доллараар хийх боломжтой гэж дурдсан талаар эх сурвалжууд мэдээлдэг. Одоогоор хэлцэл өрнөж байгаа аж. Хаан банкны өнөөгийн эзэмшлийн хувь хэмжээний талаарх мэдээллийг дор хавсаргав.

ХИДЭО САВАДАГИЙН САНАЛЫН ХАРИУД ТОМЧУУД ЯМАР ҮЙЛДЭЛ ҮЗҮҮЛСЭН БЭ

Ерөнхийдөө өнгөрсөн зунаас Хидео Савадагийн эзэмшдэг хувь Монголын талд шилжиж байгаа гэх яриа хүчтэй тарсан. Ингэхдээ хэд хэдэн хувилбар яригдсан юм. Үүнд,

НЭГ: ХХБ-ны ТУЗ-ийн дарга Д.Эрдэнэбилэг дангаараа эсвэл Ерөнхийлөгч Х.Баттулгатай хамтран, хувийг нь шилжүүлж  авах хувилбар

ЭХ СУРВАЛЖ БА ЛОГИК: “Эрдэнэт” үйлдвэрийн 49 хувийг оруулж ирэхдээ 400 сая ам.доллар босгосон тул санхүүгийн шууд боломж хязгаарлагдмал. Мөнхүү Д.Эрдэнэбилэг өөрөө Улаанбаатар хотын банк, ХХБ-уудад хувь эзэмшилтэй. Тэрбээр Хаан банкыг Ерөнхийлөгчийн улстөрийн нөлөөллийг хавсаргах байдлаар худалдан авах сонирхолтой гэгдэж буй. Ерөнхийлөгч Х.Баттулгатай уулзах хүсэлт тавьсан ч хүлээж авахгүй байгаа талаар мэдээлэл байгаа юм. Гэвч Д.Эрдэнэбилэгт ч, Ерөнхийлөгч Х.Баттулгад ч Хаанбанкны тодорхой хувийг авах хүсэл, амбиц өндөр байгаа нь тодорхой юм.

ХОЁР: Ерөнхийлөгч Х.Баттулгыг Д.Дагвадорж, сайд Д.Сумъяабазар нараар дамжуулан Хаан банкны хувийг авсан гэх хувилбар

ЭХ СУРВАЛЖ БА ЛОГИК: Их аварга Д.Дагвадоржийн хувьд Үндэсний хөрөнгө оруулалтын банкны тогтвортой үйл ажиллагааг хангахад сүүлийн жилүүдэд анхааран ажиллаж буй. Түүнчлэн уг мэдээллийг Д.Сумъяабазар сайд үгүйсгэж байгаагаас харахад тэднээр дамжсан хэлцэл хийгдээгүй байх талтай. Ерөнхийлөгчийн ойрын эх сурвалжууд “Тийм бодолгүй байгаа” гэж тодотгосон нь анхаарал татав.

ГУРАВ: УИХ-ын дарга Г.Занданшатараар дамжуулж, “Сод монгол” группийн Ерөнхийлөгч Ц.Анандбазар Хаан банкны хувийг сонирхсон уу

ЭХ СУРВАЛЖ БА ЛОГИК: Япон Улсын иргэн Хидео Савада төрийн гурван өндөрлөгт худалдан авах биш мэдээлэл хүргүүлэх албан бичиг хүргүүлсэн гэх мэдээлэл бий. Гэхдээ энэ нь тэдний улстөрийн хүчийг хэн нэг бизнестэй холбох сонирхол ч байж болох. Тухайлахад, УИХ-ын дарга Г.Занданшатараар дамжуулж, бизнесийг нь улс төрийн хүрээнд хүчтэй дэмждэг “Сод монгол” группийн Ерөнхийлөгч Ц.Анандбазарыг Хаан банкны хувийг сонирхсон гэж хардах өнцөг  байгаа юм. Гэвч Ц.Анандбазарт 300 сая ам.доллар гаргах хэмжээний санхүүгийн эх үүсвэр гаргахад хүндрэлтэй билээ.

ДӨРӨВ: “Таванбогд” группийн Ерөнхийлөгч Ц.Баатарсайханд хувиа зарах хамгийн боломжтой хувилбар,

ЭХ СУРВАЛЖ БА ЛОГИК: Хөшигний ард Хидео Савада “Таванбогд” группийн Ерөнхийлөгч Ц.Баатарсайханд албан бичиг өгөөгүй, өгсөн гэх зөрүүтэй мэдээлэл явж буй. Энэ талаар “Таванбогд” группийн Ерөнхийлөгч Ц.Баатарсайхан тодорхой хариулт өгсөнгүй. Түүнийг Хаанбанкны хувиа ахиулах өндөр хүсэлтэй гэгддэг билээ. Бусад нэрлэгдэж буй эрхмүүдийг бодвол Ц.Баатарсайхан туршлагатай, харьцангуй цэвэр эх үүсвэртэй, банкны соёлыг улстөржүүлэхгүй байх хамгийн боломжит хувилбар гэгдэж байна.

ТАВ: “Баян” Ч.Базараа мөнгөгүй, MCS группийн Ерөнхийлөгч Ж.Оджаргал сонирхолгүй гэх хувилбарууд,

ЭХ СУРВАЛЖ БА ЛОГИК: “Баян” Ч.Базараагийн хувьд “Надад ийм санал ирсэн” гэж бизнесийн хүрээнийхэнд ярьж явсан ч яг худалдан авахаар сонирхсон эсэх нь тодорхойгүй байна. Уул уурхайн салбараас босгосон түүний мөнгө банкны салбарт хөрвөх боломж нь өөрөө эрсдэлтэй гэж үзэх хүмүүс ч бий. Харин MCS группийн Ерөнхийлөгч Ж.Оджаргалын хувьд  интернет банк байгуулах төсөл нь гацсан, Ерөнхийлөгч Х.Баттулгатай түнжин муутай зэрэг шалтгаануудын улмаас туйлаас сонирхож үзээгүй гэх мэдээлэл байна.

ХИДЭО САВАДА ХҮСЭЛТ ТАВЬСАН ЭРХМҮҮДТЭЙГЭЭ ТУХАЙЛАН УУЛЗЖЭЭ

Түүнчлэн улс төрийн хүрээнд Япон Улсын иргэн Хидэо Савадагийн зүгээс зориуд байдлаар Монголын нэр бүхий томоохон бизнесмэнүүдэд албан бичгээр хандсан нь улсдаа бизнесийнхээ нэр хүндийг өсгөх гэсэн тактик байсан. Түүнээс биш албан ёсоор зарах  зорилго агуулаагүй гэх яриа ч хөвөрч буй.

Мөнхүү түүнийг хүсэлт тавьсан бүх эрхмүүдтэйгээ албан ёсоор уулзсан гэдгийг эх сурвалжуудын мэдээлэл баталж байна. Гол нь, манай бизнесменүүд нэгнээ очиж муулах замаар үнийг бүр хөөрөгдсөн, хэлцлийг Японы талд ашигтай болгож хувиргасан гэгдэж буй. Ямартай ч дээрх мэдээллүүдээс харахад, Япон Улсын иргэн Хидео Савадагийн эзэмшдэг Хаанбанкны  хувьд Монголын талд одоогоор шилжээгүй байна. Хэлцлийн түвшинд яриа өрнөж байгаа нь үнэн аж.

ХААН банк нь Монгол улс даяар нийт 537 салбар нэгжтэй үндэсний хэмжээний тэргүүлэгч арилжааны банк бөгөөд нийт айл өрхийн 70 гаруй хувьд банкны цогц үйлчилгээг хүргэн ажилладаг. Санхүүгийн байдлаар бүрэн бэхэжсэн, системийн тэргүүлэгч банк. Сонгууль дамнасан ийм үеэр тодорхой хувь нь зарагдсанаар улстөрчдийн мөнгөний АТМ болох, бохир бизнесүүд рүү мөнгө нь урсах том эрсдэлтэй билээ.

Тиймээс ч үнэхээр зарагдахаар яригдаж байгаа бол Үндэсний хэмжээний эрх ашгийг хамгаалж чадах,  цэвэр санхүүгийн эх үүсвэртэй, бизнесийн цэвэр түүхтэй хүн авах нь ихээхэн чухал билээ. Эцэст нь хэлэхэд, банкны салбар өөрөө хэвлэлийн зүгээс тухайлан бичихэд хэт эрсдэлтэй, эмзэг тул дээрх мэдээллүүд нь эцсийн байдлаар баталгаажаагүй, гэвч улс төрийн хүрээнд хагас жил орчим ХҮЧТЭЙ яригдаж байгаа гэдгийг зориуд тодотгоё.

Ж.МЯДАГБАДАМ

Энэ мэдээнд өгөх таны үнэлгээ

Хуваалцаарай Жиргээрэй