"Баян" Р.Базарыг баривчилсан нь Ш.Раднаасэд, М.Энхболдын фракцыг онилов уу, эсвэл Д.Амарбаясгалан уу?

ЭЦА-ны хийсэн нэгжлэг, баривчилгаа энэ долоо хоногийн улс төрийг эхлүүллээ.

"Баян" гэгддэг Р.Базар, түүний "Алтайн хүдэр" ХХК-ийн захирал Х.Бат-Эрдэнэ нарыг хойшлуулшгүйгээр баривчлав. Ажлын газрыг нь нэгжсэн, одоо гэрт нь нэгжлэг хийнэ гэсэн мэдээлэл байна. Мөн Э.Хаш-Эрдэнэ нарын 10 хүнийг хамт баривчилжээ.

Эх сурвалжууд үүнийг Говь-Алтайн нэр бүхий улстөрч рүү чиглүүлсэн шинэхэн акц гэж тайлбарлаж байна.

Албан бус ч ил болоод буй мэдээллээр, Р.Базарыг нэр бүхий улстөрчийг сонгуульд зориулж, хууль бусаар санхүүжүүлсэн, мөнгө угаасан үндэслэлээр баривчилсан гэх. Харин чухам мөнөөх улстөрч нь Говь-Алтайн гаралтай гэгдэж байна.

Үнэн байх талтай. Учир нь Р.Базар Говь-Алтай аймгийн Цээл суманд уурхайтай. "Алтайн хүдэр" ХХК нь нэлээд асуудал дагуулж ирсэн. Р.Базарыг хөрөнгөждөг, мөнгө угаадаг, улмаар хууль бус элдэв үйл ажиллагаанд санхүүжүүлэгчээр оролцдог гэх бүх яриа Говь-Алтайн тэрхүү уурхайд нь холбогддог.

Харин өдгөө нэр холбогдож буй улстөрч нь (тодруулбал Говь-Алтайн) хэн бэ.

Хоёр сэжим яригдаж байна.

• Нэгт, Ш.Раднаасэд
• Хоёрт, Д.Амарбаясгалан.

Ш.Раднаасэдийн хувьд МАН-аас мандат авна гэж найдалтгүй болоод буй улстөрч. Түүнд холбогдох авлигын хэрэг "Оймсчин" дуулианаар олны анхааралд өртөж байсан. Эртнээс МАН түүний Говь-Алтай дахь тойргийг сулласан гэж яригдаж байна. Харин Л.Оюун-Эрдэнийн фракц хүчирхэгжихээс өмнө Ш.Раднаасэд Мие.Энхболдын хүн байв. 2016-2020 оны парламентад тэр хүчирхэг байсан.

Говь-Алтайн улстөрчийн хувьд түүнийг "баян" гэгдэх Р.Базартай холбоо хамаарал бий гэж ярьдаг талтай.

Харин эрх баригч намын лидерүүд Ш.Раднаасэд рүү чиглүүлэх замаар Мие.Энхболдыг, мөн үүгээр дамжуулан Н.Номтойбаярын эвслийг онилох магадлал бий. Н.Номтойбаяр улс төрд эргэн ирэхдээ эвсэл байгуулж, их хэмжээний мөнгө босгон бэлтгэж байна. Түүнтэй Мие.Энхболдыг нэг тал болоод амжсан гэх яриа бий юм.

Хамгийн бодит үндэслэл бол Р.Базарын "Алтайн хүдэр" нь Ш.Раднаасэд, Мие.Энхболд нар луу чиглэх схем.

Нөгөө талд, МАН-ын генсек Д.Амарбаясгаланг энэ акцын хүрээнд онилно гэж тайлбарлах хэсэг ч байна. Д.Амарбаясгалан бол Говь-Алтайгаас нэн тэргүүнд нэрлэгдэх улстөрч мөн. Нүүрсний хэргээс хойш Л.Оюун-Эрдэнэ Д.Амарбаясгалан нар муудсан гэдэг мэдээлэл хөврөөд удаж байгаа. Гэхдээ нэгэнт хүч зангидсаны хувьд 2024 оны УИХ-ын сонгуулийн өмнө нэг нэгэн рүүгээ ноцох үндэслэл төдийлөн харагдахгүй байна. Д.Амарбаясгалангийн намтарт "Алтайн хүдэр"-т холбогдсон түүх ч бас ховор юм. Гэхдээ эх сурвалжуудын бараг тал нь түүнийг эдгээр үйл явдалд холбон тайлбарлаж, баривчлагдаад буй рекетчин гэх Э.Хаш-Эрдэнэ нарыг түүний хүмүүс гэж онцолж байгаа юм.

Ямартай ч урт удаан хугацаанд домог мэт яригдаж ирсэн "баян" Р.Базарыг баривчилсан явдал томоохон улстөрийн акц болох нь тодорхой. Үүний цаана Л.Оюун-Эрдэнийн фракц ажиллаж буй нь дамжиггүй. Хамгийн цэврээр бодоход, МАН доторх "цэвэрлэгээ" байх л хамгийн өндөр магадлалтай.

М.ТЭНГИС

Өөрийн сэтгэгдлээ илэрхийл

Share Tweet