Х.Нямбаатарт пи-арыг нь хийж өгөөд Төв цэнгэлдэх хүрээлэнг "авсан" Ж.Энхжаргал ашиг сонирхлын зөрчилтэй

Өчигдөр /2024.04.18/ НИТХ-ын ээлжит хуралдаанаар “Төв цэнгэлдэх хүрээлэн” ХХК-ийг нийслэлийн өмчид 100 хувь авах тогтоолыг баталж, улсын бүртгэлийн гэрчилгээг нь хотын Захирагч Х.Нямбаатарт хүлээлгэн өгсөн.

Тэр даруйд “Төв цэнгэлдэх хүрээлэн” ХХК-ийн гүйцэтгэх захирлаар Нийслэлийн Засаг даргын нийгмийн хөгжил, бүтээн байгуулалтын бодлого хариуцсан зөвлөх Ж.Энхжаргаланг томилсноо зарлав.

Харин томилгоог хүлээн авсан Ж.Энхжаргалан "Одоо байгаа өмчийг бүрэн гүйцэд хүлээж авах, удахгүй болох төрийн их баяр наадмын бэлтгэл ажлыг өндөр түвшинд зохион байгуулах, цаашдаа жилийн дөрвөн улирал ашиглалттай урлаг соёл спортын арга хэмжээ явдаг бүрэн автомат дээвэртэй орчин үеийн 20-30 мянган хүний суудалтай Азидаа нэр хүнд бүхий шинэ мулти цэнгэлдэх хүрээлэн байгуулах төслийг олон нийтэд танилцуулах, Монголын хөрөнгийн биржээр дамжуулан IPO гаргах бэлтгэл ажлыг хангах үүргийг хүлээж авлаа" хэмээн мэдээлсэн.

Хотын дарга шоу бизнесийн салбарт удаан ажиллаж байгаа Ж.Энхжаргалан гэдэг залууг өнгөрсөн өвөл хөгжил, бүтээн байгуулалтын бодлогын зөвлөх гэсэн "шошго" зүүж дэргэдээ авсан.

Хуур музык фестиваль, дрон шоу, Драгон терминалийн дэргэдэх бүтээн байгуулалт, эхнэрийнхээ нь Хөгжлийн банкнаас авсан зээлийн асуудлаар Ж.Энхжаргалан олонд танигдсан. Ингэхдээ тийм ч таатайгаар биш.

Түүний фестивальдаа урьсан од ёс бус үйлдэл гаргаж, Соёлын яамнаас Дрон шоугаараа мөнгө гаргуулсан нь илэрч, эхнэрээ Хөгжлийн банкаас зээл авсныг мэдээгүй гэж мэлзсэн хүн.

Х.Нямбаатар даргын хувьд Ж.Энхжаргаланг нийгмийн хөгжил, бүтээн байгуулалттын бодлогын зөвлөхөөр авсан ч хамтдаа энд тэнд гарч ирж хашаа хайстай ноцолдож, хэрүүл маргаан хийсэн үйлдлүүдээ сошиалд онцгойлон байршуулах болсон нь анхаарал татсан. Тэр ингэж л зөвлөдөг хүн бололтой. Өөрөөр хэлбэл, хөшигний ард Ж.Энхжаргалан зөвлөх нэрээр, Х.Нямбаатарын сүүлийн үед хийх болсон сошиал бичлэг, шууд дамжуулалтуудын цаана буй гэж яригдаж байгаа.

Одоо ч энэ томилгоо оновчтой эсэх эргэлзээтэй. Шоу бизнесээр гаршсан энэ хүнд улсынхаа соёл, спорт, урлагийн ганц талбарыг "өгчхөж" байгаа юм. Адаглаад ашиг сонирхлын зөрчилтэй гэж шүүмжилцгээж байна. Тэр өөрөө шоу зохион байгуулдаг хүн. Эзэн нь болоод буй Төв цэнгэлдэх хүрээлэндээ хэд хэдэн удаа XMF шоу хийсэн. Өөрөө шоу хийдэг хүн Төв цэнгэлдэх хүрээлэнгийн захирал болбол яах вэ, хэрэв өөрийнх нь хамаарал бүхий компани энд эвент хийвэл хэрхэн хандах вэ зэрэг асуултууд үүсэж буй.

Б.ХАШ-ИЛД

Өөрийн сэтгэгдлээ илэрхийл

Share Tweet