3х3-ын талбайд цойлж буй 18 настай Н.Нандинхүсэл гэж хэн бэ

Монголын эмэгтэйчүүдийн 3х3 сагсан бөмбөгийн шигшээ баг 2025 оны Дэлхийн аварга шалгаруулах тэмцээний шөвгийн наймд хүчтэй өрсөлдөгч АНУ-ын багийг 18:15 харьцаатайгаар буулган авч, хагас шигшээд шалгарлаа. Тус тоглолтод шигшээ багийн залуу тоглогч Н.Нандинхүсэл чухал үүрэг гүйцэтгэж, торгуулийн шидэлтүүдээ өндөр хувьтай амжилттай болгосон нь ялалтад том түлхэц болжээ.

18 настай Н.Нандинхүсэл нь 3х3 төрлийн сагсан бөмбөгийн Монголын шигшээ багийн залуу, ирээдүйтэй тоглогчдын нэг юм. Тэрбээр 177 см өндөр, 65 кг жинтэй бөгөөд анх 14 настайдаа үндэсний шигшээ багийн бүрэлдэхүүнд багтсан байна. Мөн “Улаанбаатар Амазонс” багт 16 настайдаа тоглож эхэлсэн түүхтэй.

Н.Нандинхүсэл нь олон улсын тэмцээнүүдэд тоглолтоороо тодорч байсан.

Тухайлбал, 2022 оны Азийн 18 хүртэлх насны аварга шалгаруулах тэмцээнд мөнгөн медаль хүртсэн бөгөөд 2023 онд болсон 3x3 U18 дэлхийн аваргад эхний өдрийн дараа хамгийн өндөр оноотой эмэгтэй тоглогч болж байв.

Тэрбээр АНУ-ын Спайр академид суралцах зорилготой гэдгээ өмнө нь хэвлэлд ярьж байсан бол одоогоор “Улаанбаатар Амазонс” багтаа эргэн нэгдээд байгаа юм.

3х3 төрлийн дэлхийн чансаагаар тэрбээр 677 дугаар байрт, Монгол Улсын чансаагаар 30 дугаар байрт бичигдэж буй. Энэ үзүүлэлт нь түүнийг ирээдүйд мэргэжлийн түвшинд тоглох бүрэн боломжтой гэдгийг харуулж байна.

Монголын шигшээ багийн хувьд ДАШТ-ий хагас шигшээд шалгарсан нь түүхэн амжилтад тооцогдож буй бөгөөд уг тоглолтод Н.Нандинхүсэл шигшээ багийн чухал хөдөлгүүр болсон нь ийнхүү онцлогтой байлаа.

Энэ мэдээнд өгөх таны үнэлгээ

Хуваалцаарай Жиргээрэй