Ж.Баярмаа: Аль ч том лидер надад үг заадаггүй. Миний ард хэн ч байхгүй

УИХ-ын гишүүн Ж.Баярмаа Ардчилсан намын даргын сонгуульд нэр дэвших хүсэлтээ ҮБХ-ны дотоод сонгуулийн хороонд өгч, мэдээлэл хийлээ.

-Би энэ намыг мэддэг, тодорхой хугацааг өнгөрүүлсэн. Анхан, дунд, дээд шатны гишүүдтэйгээ ойр ажилладаг. Гишүүдийнхээ хүсэл, сонирхлыг мэддэг учир өөрийгөө дэвшүүлсэн. Би 2001 оноос Үндэсний зөвлөлдөх хорооны гишүүнээр анхны 30 эмэгтэйн нэг болж сонгогдсон. Мөн 2019 оноос АН-ын ҮБХ-ны гишүүнээр ажилласан. Үндэсний бодлогын тэргүүлэгчээр 2023 онд сонгогдсон зэрэг байдлаар тодорхой хэмжээнд АН-тай үйл хэргээ уяж, нэгтгэсэн хүн.

Манай намын дараагийн дарга төрийн албаны туршлагыг тодорхой хэмжээнд хангасан байх ёстой гэж үзэж байгаа. Учир нь бидний эцсийн зорилго, төрийг тогтвортой авч явах, Монгол Улсын хөгжлийг эрчимжүүлэх. Тиймээс төрд ажилласан туршлага маань надад тусална гэж найдаж байна. Энэ утгаараа би өөрийгөө АН-ын даргад нэрээ дэвшүүлж байгаадаа баяртай байна.

Хэрэв би АН-ын удирдлагаар сонгогдвол даргалдаг дарга хэзээ ч болохгүй. Би ухардаггүй тэмцэгч, урагшилдаг манлайлагч байна гэж бодож байгаа.

Улс төрийн намын эрхэм зорилго бол сонгуульд ялж, Засгийн газрыг удирдах. Харин Засгийн газрыг удирдахдаа ямар бодлог шийдлийг гаргах вэ гэдэг чухал. Манай нам баруун төв гэдэг үзэл баримтлал дээр нэгдсэн нэгдэл. Энэ баримтлалын хүрээнд бид 35 жилийн түүхтэй нам учир асуудал бүрд хэрхэн хандах вэ гэдгээ хэдийн гаргачихсан. Би үүнийг хэрэгжүүлэхийн төлөө явна. Мөн хувь хүний бөгөөд иргэний эрх чөлөөг бүрэн дүүрэн хангаж, үг хэлэхдээ хэнээс ч айдаггүй нийгмийг цогцлоохын төлөө явна.

АН сайн нам болж байж сайн засаглал бий болно. Намаа сайн болгохын төлөө би ганцаараа мэдээж ажиллахгүй. Бага хамт олон маань байгаа. Бас бүх зүйлийг судалгаа шинжилгээнд үндэслэж хийнэ. Тэдгээрийг хэрэгжүүлэх манай АН-ын мянга мянган залуучууд бидний ард цуг байгаа. Тиймээс залуустайгаа хамтарч ажлаа эхлүүлнэ гэж би бодож байна.

Сэтгүүлчдийн асуулт:

-АН-ын даргад нэр дэвшигчид 200 сая төгрөг хураалгана гэх мэдээллийг Ө.Шижир гишүүн нийтэлсэн байна. Энэ ямар учиртай вэ?

-Аливаа арга хэмжээ цаанаа санхүүгийн зохицуулалттай байдаг. Бид удирдлагаа сонгосны дараа АН-ын Их хурлаа хийдэг. Энэ хуралд 21 аймаг есөн дүүргийн төлөөлөгчид сонгогдож ирдэг. Үүний зэрэгцээ бид намын дүрмээ хэлэлцэж байгаа. Тэгэхээр энэ бүх үйл ажиллагаанд тодорхой хэмжээний зардал гаргах нь зүй ёсны асуудал. Хэдэн ч төгрөг нэхсэн бай. Тэр нь тодорхой үйл ажиллагаанд зарцуулагддаг. Маш шударга мөнгө. Гарах ёстой зардал нь гардгаараа гарах байх. Мөн нуулгүй хэлэхэд тэр 200 саяын асуудал руу би орж хараахан амжаагүй байна. Тиймээс нэмж хэлэх зүйл алга.

-Таныг тэрний хүн, энэний хүн гэж их цоллодог. Хэрэв та АН-ын дарга болбол хэн нэгний ашгийн төлөө ажиллахгүй гэдгээ баталж чадах уу?

-Засгийн газрын шүүмжилсэн хүн бүхэнд тухайн засаг хайртай байдаггүй. Үзэн ядаж, харлуулахыг оролддог. Би Ерөнхий сайд Л.Оюун-Эрдэнэ болон төсөв шүүмжилсэн. Энэ үест MSC-ийн болон Баярцогтын хүн гэх яриа гарсан. Гэтэл аль ч том лидер нь миний ард байж, үг зааж өгдөггүй. Миний ард “Нээлттэй ардчилал” гэж хамтдаа байгуулсан клубийн журмын нөхөд маань байдаг. Миний ард хэн нэгэн хүн хэзээ ч байгаагүй, байх ч үгүй

.

Энэ мэдээнд өгөх таны үнэлгээ

Хуваалцаарай Жиргээрэй