"Д.Амарбаясгалан ажлаа өгөөд, шалгуул. Дараа нь улс төрийн карьераа үргэлжлүүлж болно"

Өнөөдөр /2025-10-03/ Гадаад харилцааны сайд Б.Батцэцэг улс төрд өрнөөд буй цаг үеийн байдалд өөрийн байр сууриа илэрхийллээ.

Ингэхдээ "Улс төрд үүсээд байгаа өнөөгийн нөхцөл байдалд харамсаж байна. УИХ-ын дарга Д.Амарбаясгалантай олон жил нэг намд зүтгэсэн, багаас нь мэднэ. УИХ-ын дарга гэдэг Монголын бүх дарга нарыг удирдаж байгаа хариуцлагатай албан тушаал. Өөрийнхөө үг, үйлдэл, үйл ажиллагаагаараа үлгэрлэж байх ёстой. Залуу хүнийх нь хувьд дэмжиж УИХ-ын даргаар ажиллуулж байгаа. Өнөөдөр нэгэнт нүүрсний хулгайд хардагдаж, авлига албан тушаалаа урвуулан ашигласан хэрэгт холбогдож байгаагийнх нь хувьд ажлаа өгөөд хуулийн байгууллагад шалгуулаад, нэр төртэйгөөр улс төрийнхөө карьерыг үргэлжлүүлэх боломжтой гэж бодож байна.

Намайг хов зөөдөг гэж ховын журмаар ярихыг нь би ойлгоогүй. Яагаад таван хүний нэр дурдаж байгааг ч ойлгоогүй. Би хувьдаа зарчимтай байхыг хичээж ажилладаг. Хов ярьсан зүйл надад огтоос байхгүй. Мөн намын даргын асуудлыг Их хурлаараа шийдэх ёстой гэж бодож байна.

Б.Энхбаярыг намаас хөөх шийдвэрийг Хяналтын ерөнхий хорооноос гаргасан. Энэ шийдвэрийг хууль бус гэж үзэж байгаа учир хүчингүй гэж харж байгаа. Б.Баярбаатарыг ч гэсэн ухаараасай гэж бодож байна. Найз нөхдийн холбоо бус хуульд захирагдаж, дүрмээрээ ажиллаасай.

Улс орны ажил тасралтгүй явж байх ёстой. Гэтэл өнөөдөр яагаад чуулган хуралдахгүй байгааг мэдэхгүй байна. Дүрэм, хуульдаа захирагдаад явбал шийдэл нь маш амархан шүү дээ" гэв.

Сануулахад, МАН-ын Бага хурал болохоос өмнө УИХ-ын дарга Д.Амарбаясгалан мэдэгдэл хийхдээ хов зөөдөг хүмүүсийн нэгээр Гадаад харилцааны сайд Б.Батцэцэгийг нэрлэсэн билээ. Өнөөдрийн байр суурь нь “Ховч” гэснийх нь хариуд УИХ-ын даргад барьсан хариу гэж ойлгогдож байна.

Г.МИШЭЭЛ

Энэ мэдээнд өгөх таны үнэлгээ

Хуваалцаарай Жиргээрэй