БАРИМТ: С.Бямбацогтын бизнесийн сүлжээ ба ТӨСВӨӨС 95 тэрбумыг хувийн компани руугаа оруулсан түүх

Ховд аймгаас УИХ-ын гишүүнээр ГУРАВ дараалан сонгогдож, УИХ дахь МАН-ын бүлгийн дарга, ХЗДХ-ийн сайдын албан тушаалыг хүртэл хашсан эрхэм бол С.Бямбацогт. Нэгэн үес С.Бямбацогт гишүүн Ерөнхийлөгч Ц.Элбэгдоржтой нэг нутаг, амь нэгтэй байдаг гэдгээрээ төрийн аливаа ажилд давуу эрх эдэлдэг гэх яриа хөвөрдөг байв. Эдүгээ бол тэр өөрөө хүч сууж, жил бүрийн төсөв дээр хувийн бизнестээ багагүй мөнгө суулгадгаараа алдартай болсон.

Тухайлахад, С.Бямбацогт гишүүн 2019 оны улсын төсвөөс 42.2 тэрбум, 2020 оны улсын төсвөөс 53.1 тэрбум төгрөгийг ХУВИЙН БИЗНЕСТЭЭ ШИНГЭЭСЭН нь баримтаар нотлогддог. Үндсэндээ С.Бямбацогт гишүүн сүүлийн хоёр жилд 95.1 тэрбум төгрөгийг төсвөөс халаасалсан гэсэн үг. Уг мөнгөний ажлууд хэрхэн явагдсаныг баримтаар хүргэе.

 С.БЯМБАЦОГТЫН ХУВИЙН БИЗНЕСИЙН СҮЛЖЭЭ

УИХ-ын гишүүн С.Бямбацогт ЗУРГААН ДҮҮТЭЙ. Эдгээр дүү нарынхаа С.Баянчулуун, С.Баянмөнх, С.Балжинням нартай хамтран “Ньюпрогресс” группийг үүсгэн байгуулсан.  С.Бямбацогт гишүүн 2016 оны ХОМ-тээ “Ньюпрогресс” группийн хувьцаа эзэмшигчээр өөрийгөө бүртгүүлсэн. Тэрбээр уг группийн үүсгэн байгуулагч юм.

Тэрбээр 2016 онд “Ньюпрогресс” группийн хувьцаа эзэмшилтээ Бямбацогт овогтой Билгүүн рүү  шилжүүүлж, өөрийгөө хассан байдаг. Эдүгээ “Ньюпрогресс” группийг С.Бямбацогтын төрсөн дүү С.Балжинням удирддаг.

“Ньюпрогресс” групп нь “Алтайтрест” компанийн албан ёсны хувьцаа эзэмшигч. Эдүгээ С.Бямбацогтын төрсөн дүү С.Баянчулуун “Алтайтрест” компанийн Гүйцэтгэх захирлаар ажилладаг. Эндээс “Ньюпрогресс” группийг төрсөн дүүгээрээ удирдуулж, төрсөн хүүгээрээ дамжуулан хувьцааг нь эзэмшдэг С.Бямбацогт нь “Алтайтрест” компанид шууд хамааралтай нь нотлогдож байгаа юм.

Энэ удаа бид зөвхөн “Алтайтресс” компани руу ТЕНДЕР, КОНЦЕСС хэлбэрээр улсын төсвөөс сүүлийн хоёр жил дараалан орсон мөнгөн дүнгүүдийн мэдээллийг хүргэж байна. Мэдээллийг боловсруулахдаа ГҮТГЭХ зорилго агуулаагүй бөгөөд Улсын бүртгэл, ХОМ, Тендерийн дата сан, Улсын төсвийн мэдээллийг ашиглан бэлтгэв.

БАРИМТ 1. “Алтай трест”  концессоор 67.7 тэрбумыг төсвөөс авсан ч 14.1 тэрбумын үлдэгдэл үүсчээ

С.Бямбацогт ХЗДХ-ийн сайд байхдаа “Алтай трест” компанийн “Чойр дэд станцын өргөтгөл, шинэчлэл”-ийн төслийн концессыг 77 тэрбум 695 сая төгрөгөөр батлуулсан байдаг. Гэвч 2020 онд уг концессын төсөвт өртгийг 81.8 тэрбум болгон нэмэгдүүлэн батлуулсан. Ингэснээр С.Бямбацогт гишүүн концессоор 2019 онд 37.2 тэрбумыг авч, 2020 онд 30.2 тэрбум төгрөгийг дахин төсөвлүүлсэн.  

Ирэх онд үлдэгдэл 14.1 тэрбум төгрөгийг авах юм. Төсөвт өртгийг нь энэ онд 3.6 тэрбумаар нэмэгдүүлсэн үйлдлээ дахин давтвал уг мөнгөн дүн өснө гэсэн үг юм.

БАРИМТ 2.Зөвшөөрөгдсөн дүнгээс 7.3 тэрбумаар нэмсэн санал өгч ялснаар 21.1 тэрбумыг төсвөөс авах болзлоо хангажээ

“Алтайтрест” ХХК-ийг https://www.tender.gov.mn/ цэснээс шүүж үзэхэд “Хөшөөтийн уурхайгаас Ховд аймгийн Үенч сум хүртэл 35 кВ-ын цахилгаан дамжуулах агаарын шугам барих, Үенч дэд станцыг өргөтгөх төсөл”-д гүйцэтгэгчээр шалгарсан байдаг. Анх 2017 онд зарлагдаж байсан уг төслийн нийт санхүүжигдэх өртөг 13.8 тэрбум байсан ч “Алтайтрест” компани 21.1 тэрбумаар гүйцэтгэх санал өгч, шалгарсан нь анхаарал татдаг.

Тендерт аль бага санал өгсөн нь ялдаг жишиг бий. Гэтэл “Алтайтрест” компани зарлагдсан дүнгээс 7.3 тэрбумаар өгсгөсөн санал өгөөд, ШАЛГАРЧЭЭ. Уг төслийн гүйцэтгэлд 2019 онд улсын төсөвт 5 тэрбумыг суулгуулсан бол 2020 онд 16.1 тэрбумыг суулгаж өгснийг ЭНДЭЭС харж болно.

Сонирхолтой нь, “Алтай трест” ХХК тендэрт ялсныхаа дараа Эрчим хүчний яамтай гэрээ хийгээгүй байхад шууд төслийн гүйцэтгэлээ эхлүүлснээс маргаан үүсч, одоогоор шүүхийн шатанд яваа аж.  Асуудал нь шүүхийн шатанд яваа ч 2020 оны төсөвт 16.1 тэрбумыг суулгуулсан нь С.Бямбацогтыг ямар хэмжээний лоббичин болохыг  харуулна.

БАРИМТ 3. “Алтайтрест” 5.8 тэрбумаар тендерт ялаад, 700 саяар өсгөж, төсөвт суулгуулжээ

“Алтайтрест” ХХК дээр дурдсан баримтуудаас харахад, 2020 оны улсын төсвөөс концессоор 30.2 тэрбум, тендерээр 16.1 тэрбумыг тус тус авахаар байгаа. Үүн дээр  нэмж Увс аймгийн Наранбулаг сумын  төвийн 35 кВ-ын цахилгаан дамжуулах агаарын шугмын тендерийг гүйцэтгэх юм. Түлхүүр гардуулах нөхцөлтэй зарлагдсан уг тендерийн гүйцэтгэл 90 хувьтай явааг Сангийн яамны ЭНЭ ЦЭСНЭЭС харж болно.

Мөн л уг тендер анх 5.8 тэрбумын төсөвт өртгөөр тендерт шалгасан хэдий ч 6.5 тэрбум болж, 700 сая төгрөгөөр зардлаа нэмжээ.

ДҮГНЭЛТ: 95 СУМЫН 14250 ХҮҮХДИЙГ ЦЭЦЭРЛЭГТ ХАМРУУЛАХ МӨНГИЙГ ХУВЬДАА ХАЛААСЛАГЧ С.БЯМБАЦОГТ

Төрийн ордон дотроос хувийн ажлаа хөөцөлдөх ийм урамтай сайхан байдгийг дээрх жишээнүүдээс харж болно. УИХ-ын гишүүн болохын тулд тойрогтоо календарь, хэдэн кг гурил будаа тарааж, орон нутгийн телевизээр хэд гараад ерөнхийдөө болчихно. Гарах зардал үсрээд л 1 тэрбум төгрөг. С.Бямбацогт гишүүний тухайд 1 тэрбумыг зараад, хувийн компанидаа 95 тэрбумыг төсвөөс оруулан ажиллажээ. Үүнийг л улстөрийн нөлөөгөө ашиглаж, ХУВИЙН БИЗНЕСЭЭ ТЭТГЭХ гэж хэлээд байгаа юм.

Хөдөөгийн нэг суманд 150 хүүхдийн багтаамжтай цэцэрлэгийг 1 тэрбум төгрөгөөр барьчихдаг тооцоо бий. Ийм тооцооллоор хөөвөл, С.Бямбацогт гишүүн 95 суманд цэцэрлэг барьж, 14.250 хүүхдийг цэцэрлэгжүүлэх боломжтой мөнгийг ХУВИЙН КОМПАНИДАА маш боловсон аргаар авчээ. Ашгаа улам өсгөхийн тулд тендер, концессынхоо төсөвт өртгийг жил бүр өсгөсөн дүнгээр суулгуулсаар ирж.

Төрд орох гээд үхэн хатан зүтгээд байдгийн цаад учир л энэ юм. Эрх нөлөөгөө ашиглах замаар хувийн бизнесээ өргөх боломж төрийн ордонд л байна.  С.Бямбацогтод хамаарах зөвхөн нэг компанийн түүх нь ийм. 2008 онд парламентад суусан түүхээс нь хойш ухвал үүнээс илүү их зүйл гарна. Сонгогчид илүү хэрсүү болж байгаа ийм цаг үед төрөөс төрсөн тендерчид, концесчдыг бүү дэмж гэж Eguur.mn редакцийн зүгээс уриалж байна.

Энэ мэдээнд өгөх таны үнэлгээ

Хуваалцаарай Жиргээрэй