Эд хөрөнгөө бусдад залилуулсан иргэн Прокурорын байранд өөрийгөө шатаахыг завдсан байна

Хоёр хоногийн өмнө буюу /2025-04-07/-ны өдөр 31 настай эрэгтэй Б Сүхбаатар дүүргийн Прокурорын газрын уулзалтын өрөөнд бие дээрээ шингэн зүйл асгаж, өөрийгөө шатаахыг завдсан байна.

Тодруулбал, өөрийгөө шатаахыг завдсан тус иргэн эд хөрөнгөө бусдад залилуулсан хохирогч байсан бөгөөд уг өдөр хяналтын прокурортойгоо уулзах хүсэлттэй орсон бөгөөд хохирлоо хурдан барагдуулах, холбогдогчийнх нь хэргийг шуурхай шийдвэрлэх шаардлага прокурорт тавьсан нь энэ байжээ.

Одоогоор түүний биеийн байдал хэвийн байгаа бөгөөд цээж, мөрөндөө түлэгдсэн шархтай ГССҮТ-ийн харьяа эмнэлгээс тусламж үйлчилгээ авсан байна.

Монгол Улсын хэмжээнд эхний гурван сарын байдлаар 14416 гэмт хэрэг гарсан байна. Энэ нь өнгөрсөн оны мөн үеэс 4.4 мянгаар буюу 44.4 хувиар өссөн үзүүлэлт юм. Цагдаагийн байгууллагад бүртгэгдсэн эл гэмт хэргийн дийлэнх буюу 12311 нь хөнгөн, 2105 нь хүнд гэмт хэрэг эзэлж байна.

Бүртгэгдсэн нийт гэмт хэргийг аймаг, нийслэлд харьцуулсан инфографик

Үүнээс Эрүүгийн хуулийн 17.3 дугаар заалтад хамаарах Залилах гэмт хэргийн гарал Монголд тэргүүлж байна. Тодруулбал, эхний гурван сарын байдлаар залилах гэмт хэрэг 4466 бүртгэгдсэн байна. Энэ нь өнгөрсөн оны мөн үеэс 53.8 хувиар буюу 1563-аар нэмэгджээ.

Иймд бусдад эд хөрөнгөө залилуулахгүй байхад анхаарахыг албаныхан сануулж байна.

О.ОНОН

Өөрийн сэтгэгдлээ илэрхийл

Share Tweet