Монголд торгуулийг өршөөдөг, зээлийг тэглэдэг, хар тамхичныг сулладаг, хахуульчдыг өмгөөлдөг!

Эрх баригчдын хэрэгжүүлж буй хууль, шийдвэрүүдийг харахад Монголд хариуцлагатай амьдрах хэрэг байна уу гэж аргагүй бодогдоно.

УЧИР НЬ:

ТОРГУУЛИЙГ НЬ ӨРШӨӨДӨГ

Замын хөдөлгөөний дүрэм зөрчвөл торгоно, гэхдээ удахгүй өршөөлийн хуульд хамруулчихдаг. Хэзээ нэг өдөр өршөөгдөхөөс хойш жолоочид дүрмээ зөрчиж, торгуулиа төлдөггүй. Өчигдөр /2020.01.03/ Тээврийн цагдаагийн албанаас нийслэлийн хэмжээнд 1.7 сая торгууль ноогдуулсан ч төлсөн байдал 78 хувьтай байгааг дуулгав. 2015 онд торгуулийг Өршөөлийн хуулиар өршөөж байсан тул торгуулах бүрдээ үнэнчээр төлж явсан иргэд хариуцлагатай байсныхаа төлөө “хохирч” байв.

ЗЭЭЛИЙГ НЬ ТЭГЛЭДЭГ

Харин шинэ он гарахтай зэрэгцэн Монгол улсын Ерөнхийлөгч Х.Баттулга тэтгэврийн зээлийг нэг удаа тэглэх гэж буй тухайгаа дуулгаж, Үндэсний аюулгүй байдлын зөвлөлөөс зөвлөмж гарган Засгийн газарт хүргүүлсэн. Засгийн газар ирэх даваа гарагт уг зөвлөмжийг хэлэлцэн УИХ-д хүргүүлэх юм.

Тэтгэврийн зээлтэй иргэдийн зээлийг тэглэхэд зээлгүй ахмадуудыг хоосон үлдээх үү? тэтгэврийн зээлийг нь тэглэлээ гэхэд ахмадуудыг ахин зээл авах боломжгүй болгох заалт оруулах уу? гэх мэт олон асуулт иргэдийн дунд хөвөрч байна. Учир нь хэрэв тэтгэврийн зээлийг тэглэх юм бол өдийг хүртэл өдөр тутмын амьжиргаагаа залгуулахын тулд зээл авалгүй тэсдэг ахмадууд ч хохирч үлдэх юм.

ХАР ТАМХИ ХЭРЭГЛЭВЭЛ СУЛЛАДАГ

Монгол улс хар тамхины эсрэг хуультай, хар тамхи хэрэглэсэн бол дайчлан баривчилж сүрийг үзүүлдэг. Гэвч тун удалгүй суллачихна. Тухайлбал, хамгийн сүүлд Буриад улсын Ардын жүжигчин, дуучин Б.Амархүүг хар тамхи хэрэглэж байхад нь үйлдэл дээр нь барьж саатуулсан. Шүүх хурлаар түүнийг хоёр жилийн хугацаанд хорихоор болсон ч тун удалгүй суллагдаж, шинэ оноо гэртээ өнгөрүүлэв.

Ингэхээр залуус хар тамхи хэрэглэсэн ч хариуцлага үүрдэггүй юм байна гэх сэдлийг авч байгаа нь дамжиггүй.

ХАХУУЛЬ АВСАН Ч СУЛЛАГДАНА

Зам тээвэр хөгжлийн яамны Зам ашиглалтын газрын дарга Х.Оргил-Эрдэнэ албан өрөөндөө /2019.12.30/ Улаанбаатар-Дархан чиглэлийн авто замыг барьж байгаа БНХАУ-ын компанийн хятад иргэдээс 20 мянган юанийн авилга авч байгаад, үйлдэл дээрээ АТГ-ын албан хаагчдад баригдсан. Гэвч түүний өмгөөлөгч Б.Баатарсайхан энэ талаар “Авилга авсан зүйл байхгүй, хоёр Хятад иргэн өрөөнд нь орж ирээд боодолтой юм тавьчихаад гарсан, манай үйлчлүүлэгч юу байсныг нь мэдээгүй ” гэх тайлбарыг өгч, шүүх хурлаас  Х.Оргил-Эрдэнэд цагдан хорих таслан сэргийлэх арга хэмжээ авахуулах тухай прокурорын санал баримтаар нотлогдохгүй байх тул Сүхбаатар дүүргийн Эрүүгийн хэргийн анхан шатны шүүх хүлээн авахаас татгалзаж шийдвэрлэсэн байна.

Үйлдэл дээрээ баригдсан ч нотлогдоогүй гэх шалтгаанаар суллагддаг байхад цаашид залуус хариуцлагатай байж, албан тушаал нэр хүндээ хууль бусаар ашиглах болох юм байна гэх сэдэлтэй үлдэх нь гарцаагүй.

Дээрх жишээ бүр, Монгол улсын хариуцлагатай иргэд хохирч, хариуцлагагүй хууль зөрчигчид хожиж үлддэг гэх логикыг харуулж буй юм.

Энэ мэдээнд өгөх таны үнэлгээ

Хуваалцаарай Жиргээрэй