Т.Чимгээг ялласан Б.Цогт шүүгчээс татгалзсан ч шүүх бүрэлдэхүүн хүлээж авсангүй

Дэд бүтцийн сайд С.Зоригийг 1998 оны аравдугаар сарын 2-нд хөнөөсөн хэрэгт 20 жилийн ял авсан Б.Содномдаржаа, Т.Чимгээ нарын хэргийг дахин задалж, шинээр илэрсэн нөхцөл байдлын улмаас дахин хянах боломж нээгдсэн.

Хуулийн дагуу хэргийг задалж, дахин хянуулах дүгнэлтийг УЕП-оос Дээд шүүхэд хүргүүлээд байсан юм. Тэгвэл прокурорын эл дүгнэлтийг үндэслэлтэй эсэхийг хэлэлцэх шүүх хурал яг одоо болж байна.

Шүүх хурлын эхэнд Т.Чимгээ, Б.Содномдаржаа нарын өмгөөлөгч нар Б.Цогт шүүгчээс татгалзаж байгаагаа илэрхийлэв. Учир нь түүний эгч ТЕГ-т ажилладаг, Б.Хурцын хамааралтай хүн гэж үзэж байна гэв. Түүнчлэн Т.Чимгээ нарыг ялласан хүн дахин орж ирээд өөрийнхөө ялласан хэргийг хянана гэж байх ёсгүй. Тиймээс Б.Цогт шүүгчээс татгалзаж байна гэв.

Харин шүүгч Б.Цогт хэлэхдээ “Миний эгч ТЕГ-т ажилладаг нь үнэн. Гэхдээ би Б.Хурцтай хамаагүй. Би энэ хэргийг өмнө нь хэлэлцэхэд шүүгчээр оролцсон нь үнэн. Энэ шүүгчид ч хамт байсан. Хуралдаан даргалагч л өөрчлөгдсөн. Надад Дээд шүүхээс компьютэрээр хуваарилсан. Түүнээс биш би энэ хэргийг шүүе гэж санал гаргаагүй. Төрийн албан хаагчдын ингэж гутаан доромжилж болохгүй. Та мэргэжлийн хуульч, өмгөөлөгч хүн. Надад энэ хэрийг үнэн зөвөөр шийдэх хүсэл байна” гэлээ.

Ингээд өмгөөлөгч нарын татгалзлыг хүлээж авах эсэх талаар шүүгч нар зөвлөлдөөд хүлээж авсангүй. Шүүх хуралдаан үргэлжилж байна.

Дээд шүүх Т.Чимгээ, Б.Содномдаржаа нарт холбогдох хэргийг дахин шалгах ёстой гэж үзвэл 20 жилийн ял оноосон гурван шатны шүүхийн шийдвэрийг хүчингүй болгох юм. Ингээд хэргийг хянан шийдвэрлэх шүүхийн харьяаллыг дахин тогтоож, хэргийг дахин хэлэлцүүлэхээр шүүхэд буцаана. Эсвэл прокурорт буцаана. Дээд шүүхийн нийт шүүгчид эл асуудлыг олонхийн саналаар шийдэх юм.

Энэ мэдээнд өгөх таны үнэлгээ

Хуваалцаарай Жиргээрэй