ТАНИЛЦ: “Найрамдал”-д газар эзэмшдэг 62 иргэн, ААН-ийн дунд С.Эрдэнэ, Б.Хурц, Ж.Энхбаяр нар бий

ЗГХЭГ-ын дарга Л.Оюун-Эрдэнэ "Найрамдал” зусланд 100 гаруй ААН газар эзэмшдэг тул цэгцэлж, цуцална гэх сүржин мэдэгдэл хийж байв. Эрх мэдэлтнүүд хуваагаад эзэмшчихсэн хүүхдийн зуслангийн газрыг эргүүлэн олж авна гэдгээ зарласнаас хойш яг 1.5 жил өнгөрчээ. Харамсалтай нь хууль бус газар олголтын асуудал өдгөө хүртэл цэгцэрч, шийдвэрлэгдэж амжаагүй хэвээр байна.

Ийнхүү мэдэгдэл хийхтэй зэрэгцэн олон нийтийн сүлжээгээр Ерөнхий сайд У.Хүрэлсүхийн дүү У.Давхарбаяр, НИТХ-ын дарга асан Ц.Сандуй, МАХН-ын дарга Н.Энхбаяр, У.Барсболд, БОНХ-ийн сайд асан Д.Оюунхорол нар газар эзэмшдэг гэх нэрсийн жагсаалт цацагдаж байлаа. Гэвч хуурамч болох нь батлагдсан.

Улмаар дөрвөн сарын дараа буюу 2019 оны есдүгээр сарын 20-нд хууль бусаар олгосон 24 зөвшөөрлийг цуцалсан. Үлдсэн 69 газрыг нийслэлийн Мэргэжлийн хяналтын газарт хяналт шалгалт хийлгүүлэхээр шилжүүлсэн.

Одоогийн байдлаар Найрамдал зусланд газар эзэмшдэг эрх бүхий 62 иргэн, ААН байсаар байгаа юм.

Тэдний дунд С.Эрдэнэ, Б.Хурц, Ж.Энхбаяр, С.Төмөр-Очир, С.Энхцэцэг гэх мэт хүмүүсийн нэрс байгаа нь анхаарал татсан юм.

Бидэнд олдсон нэмэлт мэдээллээр, ОУХН зуслангийнхан улсын тусгай хамгаалалт бүхий газарт газар эзэмшиж буй доорх эрх бүхий 62 хүний газрын зөвшөөрлийг цуцлуулахаар шүүхэд хандаад байгаа аж.

---

• С.Эрдэнэ /АН-ын дарга асан/

Тухайн зуслангийн бүсэд “Молор констракшн” ХХК 143 айлын орон сууц барьсан. Улмаар 2014 онд ОУХН зуслантай Молор трейд компани 150 айлын орон сууц бариулах гэрээ байгуулсан байдаг. Тус хоёр компанийг үүсгэн байгуулагч нь С.Эрдэнийн ээж юм. Эдгээр нь Үндэсний аудитын газрын тайланд дурдагдсан байдаг.

---

• Батын Хурц /ТЕГ-ын дарга асан/

ТЕГ-ын дарга асан Б.Хурц эхнэрийн хамтаар Найрамдал зусланд газар эзэмшдэг байв. Тэрээр 2016 онд Дүүргийн засаг даргын захирамжаар 627м.кв газар бүхий зуслангийн газрыг 15 жилийн хугацаатайгаар эзэмшжээ. Харин түүний эхнэр Ү.Сарнай 2015 онд НЗД-ын захирамжаар мөн л тус зусланд газар авчээ. Харин 2019 оны есдүгээр сард Нийслэлийн газар зохион байгуулалтын албанаас Найрамдал зусланд хууль бусаар олгосон 24 зөвшөөрлийг цуцалсны нэг нь түүний газар эзэмших эрх байжээ.

---

• Жадамбын Энхбаяр /УИХ-ын гишүүн асан/

Гишүүн асан тэрбээр 2007 онд НЗД-ын захирамжаар 700м.кв бүхий зуслангийн газрыг 15 жилийн хугацаатайгаар эзэмшжээ. Тухайн газартаа гурван давхар хаус сүндэрлүүлсэн байгаа юм.

---

• Санжбэгзийн Төмөр-Очир

УИХ-ын дарга асан, Боловсролын сайд асан өдгөө Японы Оберлин Их сургуулийн зочин профессороор ажиллаж буй, Философийн ухааны доктор /Рh.D/, профессор Санжбэгзийн Төмөр-Очир мөн газар эзэмшигчдийн жагсаалтад буй. Тэрээр 2006 онд ТӨХ-ны 569 тогтоолоор, 2007 онд НЗД-ын 612 захирамжаар тус тус 5 жилээр 700м.кв газар эзэмших эрх авч байжээ. Газар эзэмших эрхийн гэрээ дутуу, хугацаа дууссан гэсэн зөрчилтэй байсаар байна.

---

• С.Энхцэцэг /ГХЯ-ны хоёрдугаар нарийн бичгийн дарга асан/

5660483 регистрийн дугаар бүхий “Шинэ хужирт” компани Найрамдлын хашаан дотор сувилал барьж буй. Сувилал баригдаж буй Найрамдал зуслан дахь газар эзэмшлийн эрхийг анх 2014 онд С.Энхцэцэг, М.Төмөрбаатар, М.Занданбат гэсэн хүмүүсийн нэр дээр олгож байж. Харин 2019 онд тухайн үеийн НЗД С.Амарсайханы захирамжаар Шинэ хужирт компанид газар эзэмших эрхийн гэрчилгээг шилжүүлжээ.

Тус компанийн хувь эзэмшигчдээр:

Т.Пүрэвхатан /Ардчилсан эмэгтэйчүүдийн холбооны дэд ерөнхийлөгч, Хот байгуулалт, хөгжлийн газрын дарга асан Б.Ууганбаярын эхнэр/

С.Энхцэцэг /ГХЯ-ны хоёрдугаар нарийн бичгийн дарга асан/

О.Цэцэгбал /Эл компанийн гүйцэтгэх захирал нь бөгөөд Өвөрхангайд Сэмжид Хужирт гэх сувилал ажиллуулдаг/

Ц.Ганболд /Ховд аймгийн цагдаагийн газар нэгжийн даргаар ажиллаж байсан/

Тэгэхээр С.Амарсайханы тушаалаар Хот байгуулалт, хөгжлийн газрын даргаар томилогдсон Б.Ууганбаяр эхнэрийнхээ хувь эзэмшдэг компанид газар авч өгсөн гэдэг нь тодорхой харагддаг. Б.Ууганбаярын эхнэр Т.Пүрэвхатан ч С.Амарсайханы Оюуны Ундраа группт ажиллаж байсан холбоо сүлбээтэй нэгэн юм.

---

Найрамдал зусланд газар эзэмшиж буй 62 иргэн, ААН-ийн жагсаалт: