Г.Дамдинням: Бусад намаас томилогдох сайд нар ажилчдаа халаад эхэлвэл яах вэ

Зарим байнгын хороодын дарга нарыг сонгосноос УИХ-ын чуулганы хуралдаан түр завсарлаад байсан билээ. Тэгвэл 18.40 цагт хуралдаан үргэлжилж эхэллээ. 

Хуралдаанаар Засгийн газрын бүтцийн тухай, Засгийн газрын бүрэлдэхүүний тухай хуулийн төслүүд болон хамт өргөн мэдүүлсэн хуулийн төслүүдийг хэлэлцэж байна.

Энэ үеэр УИХ-ын гишүүд, хууль санаачлагч Ерөнхий сайд Л.Оюун-Эрдэнээс асуулт асууж, хариулт авлаа. Үүнээс зарим зүйлсийг онцлон хүргэе.

УИХ-ын гишүүн Г.Дамдинням: Хамтарсан Засгийн газарт хэн нь яамдуудыг авахыг одоогоор мэдэхгүй байна. Гэхдээ МАН өөрсдийн мөрийн хөтөлбөрөө хэрэгжүүлэх ёстой. Үүний тулд хоёр их сургуулийг дэлхийн топ 1000-д оруулна. Боловсролын салбарт инновац нэвтрүүлнэ гэж нэмсэн. Боловсролын салбарын эрхлэх ажилд шинжлэх ухаан, инновац байхгүй болсон байна. Үүнийг анхаарч, нэмж өгвөл яасан юм. Хоёрдугаарт, шинэ Засгийн газар байгуулаад явах нь. Ингэснээр яамдад харьяалагдаж буй төрийн албан хаагчид ажилгүй болох эрсдэлтэй. ХЗДХЯ-ыг Ардчилсан намд өгөх юм байна, хомроголон халаад эхлэх вий дээ. Үүнээс хамгаалах тал дээр ямар арга хэмжээ авах вэ?

Ерөнхий сайд Л.Оюун-Эрдэнэ: Бид хуулиа л барина. Үндсэн агуулга руугаа ч орох хэрэгтэй. Тэр нь, бид төрийн бүцтийг данхгар байна гэж ярьдаг. Энэ бол 76-г 126 болгосон асуудал биш. 225 мянган төрийн албан хаагчийг л чиг үүргийн хувьд давхцалгүй болгох вэ гэдэг асуудал юм. Зарим төрийн албан хаагчид гэртээ ч харьж чаддаггүй. Зарим нь маш бага ачаалалтай явдаг. Энэ бүтцийн реформыг хийхэд өмнө нь улс төрийн намууд зөвшилцөж чадаагүй. УИХ-ын гишүүн ингэж ярихаар төрийн албан хаагчид "Биднийг халах нь" гээд ойлгочихдог. Тэгээд ҮЭ-үүд босдог, улстөрчид өлгөж аваад улс төр хийдэг. Ингээд хойшлуулдаг. Ийм маягаар олон жил явсан. Энэ зөвшилцөл хийгдсэнээр төрийн албан хаагчдын эрх ашгийг хөндөхгүй гэдгийг албан ёсоор хэлье. Харин давхардсан чиг үүргийг салгах, цалинг нь нэмэх чиглэлд ажиллана. Засаглалыг нь сайжруулна.

Энэ мэдээнд өгөх таны үнэлгээ

Хуваалцаарай Жиргээрэй