Кахраманмараш мужийг нэрвэсэн хүчтэй газар хөдлөлтийн гамшгаас болоод Турк улс энэ жил сонгуулиа товлосон цагтаа явуулж чадахгүй байж магадгүй талаар хэвлэлүүд мэдээлж байна. Тус улс ирэх тавдугаар сарын 14-нд Парламентын сонгуулиа зохион байгуулахаар төлөвлөөд байгаа юм. Эрх баригч Шударга ёс, хөгжлийн намаас энэ асуудлаар ямар нэг байр суурь илэрхийлээгүй ч ийм мэдээлэл гараад буй юм.
Турк, Сирийн нутаг дамнасан газар хөдөлийн улмаас амиа алдсан хүний тоо 33,000-аас давсан бол гэмтэж бэртэгсдийн тоо 100,000-д дөхжээ.
Эдийн засгаар дагнадаг олон улсын байгууллагууд гамшгаас болж энэ жил Турк улсын ДНБ хоёр хувиар буурна гэсэн таамаг дэвшүүлж байгаа юм.
"Шударга ёс хөгжлийн намын зөвлөлд одоогоор ийм асуудал яригдаагүй. Өөрөөр хэлбэл, тавдугаар сарын сонгуулийг цуцлах асуудал байхгүй. Гэхдээ хугацаандаа явагдах боломж багасаж байна" гэж эрх баригч намын өндөр тушаалтан хэлсэн байна.
Эрх баригч нам ийнхүү сонгууль хойшлуулах асуудлыг үгүйсгэсэн ч сөрөг хүчин Ардын бүгд найрамдах нам ""Р.Т.Эрдоган сонгуулийг дор хаяж нэг жилээр сунгах саналыг удахгүй оруулна" гэсэн яриа гарчээ.
Туркийн үндсэн хуулиар бол зөвхөн дайн болсон тохиолдолд л сонгууль хойшлуулах ёстой. Тодруулбал, 78 дугаар зүйлд "Дайны үед сонгуулийг нэг жилээр хойшлуулж болно" гэж заасан байдаг аж. Гэхдээ зарим намууд Сонгуулийн төв комисс шийдвэр гаргаж, гамшгийн үед сонгууль хойшлуулах боломжтой гэж буй юм.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.