ЦЕГ-ын даргаар У.Хүрэлсүх, Д.Амарбаясгалан, Л.Оюун-Эрдэнэ нарын хэн нь өөрийн хүнээ томилох вэ

ЦЕГ-ын дарга Ж. Болдыг өөрийнх нь хүсэлтээр албан үүргээс нь чөлөөлөх асуудлыг өнгөрөгч Лхагва гаригийн Засгийн газрын хуралдаанаар ХЗДХ-ийн сайд Х.Нямбаатар оруулсан.

Одоогоор Ж.Болдын оронд ЦЕГ-ын даргаар хэнийг томилох вэ асуудал улс төрийн хүрээнд хүчтэй яригдаж байна. Бидний өмнө нь мэдээлсэнчлэн, ЦЕГ-ын даргын албан тушаалд,

1. ДХИС-ийн захирал П.Батбаатар.
2. ГЕГ-ын дарга Р.Отгонжаргал нар яригдаж буй.

Үүн дээр нэмэгдээд, ШШГЕГ-ын даргаар ажиллаж байгаа О.Амарсанаа уг томилгооны нэг хувилбараар яригдаж байгаа аж.

Уг томилгоог үндсэн чиг үүргийнхээ хүрээнд ХЗДХ-ийн сайд Х.Нямбаатар Засгийн газрын хуралдаанд оруулах зохицуулалттай. Томилгооны голлох шийдвэрийг Засгийн газар, Ерөнхий сайдын хүрээнд гардаг.

ЦЕГ-ын даргаар яригдаж буй дээрх гурван эрхмийн улс төрийн нөлөөллийн тухайд,

О.Амарсанаа нь Ерөнхийлөгч У.Хүрэлсүхийн хамаатан бөгөөд түүний дэмжлэгээр ШШГЕГ-ын дарга болсон. Өнгөрөгч зун хурандаа цол хүртсэн нэгэн юм.

Р.Отгонжаргал нь Говь-Алтайн гаралтай, МАН-ын генсек, ЗГХЭГ-ын дарга Д.Амарбаясгалангийн дэмжлэгтэй албан тушаалтан юм. Тэрбээр С.Батболдын хүн болох Б.Асралтыг ГЕГ-ын даргаас чөлөөлж, оронд нь түүнийг томилсон ч өнөөг хүртэл жинхлээгүй байгаа билээ.

П.Батбаатар нь Говь-Алтайн гаралтай. Түүнийг ХЗДХ-ийн сайд Х.Нямбаатар, Ерөнхий сайд Л.Оюун-Эрдэнэ, Ерөнхийлөгч У.Хүрэлсүх нар дэмжих боломжтой дүрээр нэрлэгдэж байна.

Эх сурвалжуудын түвшинд яригдаж байгаагаар бол, томилгоог энэ долоо хоногт хийхгүй. Ирэх долоо хоногийн Лхагва гаригт Засгийн газрын хуралдаанд оруулах чигтэй байгаа аж. Тэр хүртэл ЦЕГ-ын даргаар ажиллахаар яригдаж буй эрхмүүдийн нэг хэд ч хувирч болох бөгөөд логикоороо Засгийн газар дангаараа шийдэх үү. Ерөнхийлөгчийн нөлөөлөл орох уу гэсэн хүлээлт үүсгээд байна.

Г.ИТГЭЛ

Өөрийн сэтгэгдлээ илэрхийл

Share Tweet