Гадаадын хэвлэлд: Орос, Монгол, Хятад гурвын хамтарсан хил дамнасан "Цайны их зам"

ОХУ-ын ТАСС агентлагт манай улстай холбоотой нийтэлсэн нийтлэлийг орчуулан хүргэе.

Орос болон Хятадтай хамтын ажиллагаагаа өргөжүүлэх нь Монголын хувьд нэн тэргүүний зорилт хэвээр байна хэмээн ОХУ-ын ГХЯ-ны Азийн асуудал эрхэлсэн газрын нэгдүгээр захирал Георгий Зиновьев Дорнын эдийн засгийн чуулга уулзалтын үеэр мэдээллээ.

Тэрбээр "Монголын нийгмийн тогтвортой байдал, эдийн засгийн сайн сайхан байдлын баталгаа болсон хоёр хөрш болох Орос, Хятад улстай хамтын ажиллагаагаа өргөжүүлэх нь манай түншүүдийн тэргүүлэх чиглэл хэвээр байна гэж бид үзэж байна. Гурван талт хамтын ажиллагааг цаашид хөгжүүлэхийг бид дэмжиж байна. Орос-Монгол-Хятадын эдийн засгийн коридорын хөтөлбөрийг эртнээс хэрэгжүүлснээр энэ бүс нутаг дахь хил дамнасан төслүүдийн дамжин өнгөрөх боломж нэмэгдэх болно гэдэгт бид итгэлтэй байна" гэв.

Москва, Улаанбаатарын харилцаанд сөрөг нөлөө үзүүлэх гэсэн барууны оролдлогын талаар Георгий Зиновьев "Бид хоёр талын улс төрийн яриа хэлэлцээг үргэлжлүүлж, яам, агентлагууд, олон нийтийн байгууллага, бизнес эрхлэгчдийн төлөөллүүдээр дамжуулан зохих түвшинд холбоотой байдаг. Парламент хоорондын хамтын ажиллагаа нэлээд эрчимжиж байна. Боловсрол, шинжлэх ухаан, соёл, спортын салбарын солилцоо өргөжиж байна. Бид хил дамнасан болон бүс нутаг хоорондын харилцааг бэхжүүлэх болно" хэмээлээ.

Монгол Улс бусад улс, тэр дундаа барууны орнуудтай харилцаагаа хөгжүүлэх хүсэлтэй байгааг Орос ойлгож байгааг дипломатч мөн онцлов. Тэрбээр “Улаанбаатар гадаад бодлого, худалдаа, эдийн засгийн харилцаагаа аль болох төрөлжүүлж, гуравдагч хөрш гэгдэх АНУ, ЕХ, Япон, Энэтхэг, БНСУ-ын боломжийг ашиглах хүсэлтэй байгааг бид ойлгож байна. Турк болон Монголтой хиллэдэггүй бусад улс орнууд хүн амын аж байдлыг дээшлүүлэх асуудлыг шийдвэрлэхийн тулд барууны орнуудаас ноцтой шахалт үзүүлж байгаа ч Монголын удирдлага төвийг сахих байр сууриа тууштай баримталж, нэгдэхээс татгалзсаар байгааг бид харж байна” гэв.

-Гурван улсын хамтарсан "Цайны их зам" брэнд-

“Цайны их зам” брэндийг хөгжүүлэх хил дамнасан аялал жуулчлалын талаарх гурван улсын хил дамнасан хэлэлцүүлэг БНХАУ-ын Хубэй мужийн Ухань хотод удахгүй болно гэж Буриадын Аялал жуулчлалын сайд Алдар Доржиев Дорнын эдийн засгийн чуулга уулзалтын үеэр мэдээллээ.

Түүний хэлснээр урд хөршийн зүгээс энэ төслийг хэрэгжүүлэх сонирхолтой байгаа ажээ. Энэ талаараа ч өнгөрөгч 6-10-ны өдрүүдэд Хөх хотод болсон Хятад-Монголын экспогийн үеэр хамтарч ажиллахад бэлэн гэдгээ Хятадын талаас илэрхийлжээ.

Түүхт "Цайны их зам"-ын чиглэл нь өдгөө худалдаа, аялал жуулчлалын чиглэлүүд бүхий авто зам, төмөр зам болж хувирсан билээ. Энэ замын дагуу янз бүрийн эрин үед хамаарах, олон үндэстэн, ястны түүхэн дурсгалт газрууд бий. Тиймээс соёлын өвөрмөц онцлог нь цай чанах, хэрэглэх уламжлалтай холбоотой нь уг төслийн гол агуулга ажээ.

Энэ чиглэлийн маршрутаар Балтын тэнгис, Санкт-Петербург, Москва, ОХУ-ын Алтан цагариг хотууд, Сибирь, Байгал нуур, Буриад, Хиагт, Улаанбаатар, Монголын хээр тал, Хөх хот, Бээжин, Хятадын өмнөд хэсгийн цайны тариалан, Шар тэнгис гээд гурван улсын алдартай аялал жуулчлалын бүс нутгуудаар аялах боломжтой юм байна.

Н.АННА

Өөрийн сэтгэгдлээ илэрхийл

Share Tweet